Vaibhav Sooryavanshi: మా దగ్గర వైభవ్ పప్పులు ఉడకవ్.. కివీస్ కోచ్ కీలక వ్యాఖ్యలు..!

Vaibhav Sooryavanshi: భారత క్రికెట్ జట్టు (Team India)కు రానున్న సీజన్‌లో వరుస సవాళ్లు ఎదురుకానున్నాయి. వెస్టిండీస్‌తో పోరు ముగిసిన తరువాత న్యూజిలాండ్ పర్యటనకు వెళ్లే భారత జట్టులో యువ బ్యాటర్ వైభవ్ సూర్యవంశీ (Vaibhav Sooryavanshi)పై ప్రత్యేక ఆసక్తి నెలకొంది.

అక్టోబర్ 22 నుంచి కివీస్ గడ్డపై ఐదు టీ20లు, ఐదు వన్డేలు, రెండు టెస్టుల సిరీస్ జరగనుంది. ఈ పర్యటన వైభవ్‌కు కొత్త అనుభవం కానుంది. ఐపీఎల్ 2026లో 16 ఇన్నింగ్స్‌ల్లో 776 పరుగులు చేసి భారత్‌కు ఎంపికైన అతడు ఇప్పటివరకు ఆరు టీ20 అంతర్జాతీయ మ్యాచ్‌లు ఆడాడు. ఇంగ్లాండ్‌లో అరంగేట్రం చేసిన అతడికి తొలి సిరీస్ అంతగా కలిసిరాలేదు. మూడు ఇన్నింగ్స్‌ల్లో 42 పరుగులే చేశాడు.

జింబాబ్వేతో జరిగిన సిరీస్‌లో మాత్రం వైభవ్ తన సత్తా చూపించాడు. మూడు ఇన్నింగ్స్‌ల్లో 151 పరుగులు సాధించి రెండు అర్ధశతకాలు నమోదు చేశాడు. ప్రస్తుతం సంజూ శాంసన్ (Sanju Samson) తరువాతి స్థానంలో ఉన్న వైభవ్ ఆసియా క్రీడలు 2026 కోసం జపాన్‌లో ఉన్నాడు. తదుపరి పెద్ద అవకాశం న్యూజిలాండ్ పర్యటన రూపంలో ఎదురుకానుంది.

బౌన్సీ పిచ్‌లపై పరీక్ష..

న్యూజిలాండ్ హెడ్ కోచ్ రాబ్ వాల్టర్ (Rob Walter) వైభవ్ బ్యాటింగ్‌ను అక్కడి పరిస్థితుల్లో చూడాలని ఆసక్తిగా ఉన్నట్లు చెప్పాడు. పేస్, బౌన్స్ ఎక్కువగా ఉండే వికెట్లపై అతడు ఎలా స్పందిస్తాడో పరీక్షించాలనుకుంటున్నట్లు పేర్కొన్నాడు.

ఐపీఎల్‌లో ప్రపంచ స్థాయి బౌలర్లపై వైభవ్ ఆధిపత్యం చూపించాడని వాల్టర్ గుర్తుచేశాడు. అదే ఆటను భిన్నమైన పరిస్థితుల్లో ఎలా కొనసాగిస్తాడన్నదే అసలు పరీక్షగా అభివర్ణించాడు. తమ దేశంలో అతడిని ఎదుర్కొనేందుకు బౌలింగ్ వ్యూహం కూడా కీలకమని చెప్పాడు.

యువ ఆటగాడిపై ఒత్తిడి ఎలా పనిచేస్తుందో చూడాలనే ఆసక్తి కోచ్‌గా తనకు ఉంటుందని వాల్టర్ పేర్కొన్నాడు. వైభవ్ జట్టులో లేకపోయినా భారత్ వద్ద ప్రతిభావంతులైన ఆటగాళ్లు చాలామంది ఉన్నారని స్పష్టం చేశాడు.

SENA దేశాల్లో వైభవ్ రికార్డు..

న్యూజిలాండ్‌లో వైభవ్‌కు పరిస్థితులు కొత్తవే అయినా, విదేశీ పరిస్థితుల్లో అతడికి అనుభవం లేదని చెప్పలేం. ఇంగ్లాండ్, ఆస్ట్రేలియాలో నాలుగు యూత్ టెస్టులు ఆడి ఏడు ఇన్నింగ్స్‌ల్లో 223 పరుగులు చేశాడు. SENA దేశాల్లో యూత్ టెస్టుల్లో అతడి సగటు 33.33గా ఉంది.

యూత్ వన్డేల్లోనూ వైభవ్ మంచి గణాంకాలు నమోదు చేశాడు. 11 ఇన్నింగ్స్‌ల్లో 685 పరుగులు సాధించాడు. కఠిన పరిస్థితుల్లో యువ స్థాయిలోనే ఆడిన అనుభవం అతడికి ఉంది. ఇప్పుడు న్యూజిలాండ్‌లోని పేస్, బౌన్స్, స్వింగ్‌కు అనుకూలించే పరిస్థితుల్లో అంతర్జాతీయ స్థాయిలో తన బ్యాటింగ్‌ను నిరూపించుకోవాల్సిన సవాలు ఎదురవుతోంది.