Yuzvendra Chahal: ముదిరిన 'క్యూట్' మెసేజ్ వివాదం: కోర్టు మెట్లెక్కిన యుజ్వేంద్ర చాహల్.. తాన్యా ఛటర్జీకి షాక్!

Yuzvendra Chahal: ఐపీఎల్ 2026లో పంజాబ్ కింగ్స్ తరఫున ఆడుతున్న స్టార్ స్పిన్నర్ యుజ్వేంద్ర చాహల్ మరోసారి వార్తల్లో నిలిచారు. ఈసారి ఆటతో కాకుండా ఒక వివాదంతో ఆయన పేరు మార్మోగుతోంది. తన ఇన్‌స్టాగ్రామ్ స్టోరీకి స్పందిస్తూ చాహల్ 'క్యూట్‌గా ఉన్నావు' (Cute) అంటూ ప్రైవేట్ మెసేజ్‌లు పంపారన్న నటి తాన్యా ఛటర్జీ ఆరోపణలను ఆయన తీవ్రంగా పరిగణించారు. తన వ్యక్తిత్వాన్ని హననం చేసేలా అసత్య ఆరోపణలు చేశారంటూ తాన్యాపై చాహల్ పరువు నష్టం (Defamation) దావా వేశారు.

కొద్ది రోజుల క్రితం తాన్యా ఛటర్జీ ఒక ఇంటర్వ్యూలో తన ఫోన్ చూపిస్తూ.. చాహల్ తనకు నేరుగా మెసేజ్ చేశారని ఆరోపించారు. దీనికి సంబంధించిన స్క్రీన్‌షాట్లు మరియు వీడియో నెట్టింట వైరల్ కావడంతో చాహల్‌పై తీవ్ర స్థాయిలో విమర్శలు వచ్చాయి. దీనిపై చాహల్ పిఆర్ (PR) టీమ్ స్పందించి, ఆ వీడియోను తొలగించాలని ఆమెను కోరినట్లు సమాచారం. అయితే, ఈ విషయాన్ని ఆమె మరింత రచ్చ చేయడంతో చాహల్ న్యాయపరంగా ముందుకు వెళ్లాలని నిర్ణయించుకున్నారు.

పరువు నష్టం దావాపై తాన్యా తాజాగా స్పందిస్తూ భావోద్వేగానికి లోనయ్యారు. "చాహల్ పంపిన మెసేజ్‌లు చూపినందుకు నన్నే అందరూ ట్రోల్ చేస్తున్నారు. పరువు పోయింది నాది, కానీ నాపైనే కేసు వేశారు. ఎందుకు ఎవరూ చాహల్‌ను ప్రశ్నించట్లేదు?" అని ఆమె ప్రశ్నించారు. తనకు చాహల్ అంటే గౌరవం ఉందని, కేవలం వాస్తవాలనే బయటపెట్టానని ఆమె వాదిస్తున్నారు. ప్రస్తుతం ఈ వివాదం న్యాయస్థానంలో ఉండటంతో చాహల్ దీనిపై ఎలా స్పందిస్తారో చూడాలి.