Kanchili: మూడు దశాబ్దాలుగా హిందీ భాషా వికాసానికి నిరంజన్ ఖడంగా విశేష సేవలు

Kanchili: కంచిలి హిందీ భాష దేశంలోని భిన్న ప్రాంతాలు, సంస్కృతులు, భాషల మధ్య వారధిగా నిలుస్తోంది. స్వాతంత్ర్యోద్యమ సమయంలో ప్రజలను ఏకతాటిపైకి తీసుకురావడంలో హిందీ కీలక పాత్ర పోషించింది. 1949 సెప్టెంబరు 14న రాజ్యాంగంలోని 343వ అధికరణం ప్రకారం హిందీని కేంద్ర ప్రభుత్వ అధికార భాషగా ఆమోదించారు. ఈ నేపథ్యంలో ఏటా సెప్టెంబరు 14న హిందీ దివస్‌ను నిర్వహిస్తున్నారు.

హిందీ భాషపై ఉన్న అభిమానంతో కంచిలి మండలం బూరగాం ఉన్నత పాఠశాలలో హిందీ ఉపాధ్యాయుడిగా పనిచేస్తున్న నిరంజన్ ఖడంగా మూడు దశాబ్దాలుగా హిందీ భాషాభివృద్ధికి కృషి చేస్తున్నారు. దక్షిణ భారత హిందీ ప్రచార సభ ఆధ్వర్యంలో వివిధ కార్యక్రమాలు నిర్వహిస్తూ విద్యార్థుల్లో హిందీపై ఆసక్తి పెంపొందించేందుకు కృషి చేస్తున్నారు.

ఇచ్ఛాపురం నియోజకవర్గంలోని వివిధ పాఠశాలల్లో ఏటా హిందీ పక్షోత్సవాలు నిర్వహిస్తూ ర్యాలీలు, సమావేశాలు, అవగాహన కార్యక్రమాలు చేపడుతున్నారు. 2016లో హిందీ భాషకు మరింత ప్రాధాన్యం కల్పించాలనే లక్ష్యంతో ఇచ్ఛాపురం నుంచి శ్రీకాకుళం కలెక్టరేట్‌ వరకు పాదయాత్ర నిర్వహించారు. జిల్లాలో ఒడియా మాధ్యమంలో చదువుతున్న విద్యార్థులకు ద్వితీయ భాషగా హిందీకి గుర్తింపు కల్పించాలని పలుమార్లు ఉన్నతాధికారులు, మంత్రులను కలిసి వినతిపత్రాలు సమర్పించారు.

హిందీ ఉపాధ్యాయులు లేని పాఠశాలల్లో సెలవు రోజుల్లో ప్రత్యేక తరగతులు నిర్వహిస్తూ విద్యార్థులకు హిందీ బోధిస్తున్నారు. హిందీ ప్రచార సభల ఆధ్వర్యంలో నిర్వహించే వివిధ పరీక్షలకు ఉచిత శిక్షణ అందిస్తూ వేలాది మంది విద్యార్థులను హిందీ విద్యలో ముందుకు తీసుకువచ్చారు. ఆయన వద్ద శిక్షణ పొందిన పలువురు హిందీ ఉపాధ్యాయులుగా స్థిరపడేలా కృషి చేశారు.

ప్రాథమిక స్థాయి నుంచే విద్యార్థులు సులభంగా హిందీ నేర్చుకునేలా అక్షరమాల, లిపి పుస్తకాలను రూపొందించి పాఠశాలలకు ఉచితంగా అందిస్తున్నారు. విద్యార్థుల్లో భాషపై ఆసక్తి పెంచేందుకు హిందీ పాఠ్యాంశాల్లో మరింత కొత్తదనం అవసరమని సూచిస్తున్నారు. భారతీయ ఇతిహాసాలు, రామాయణం, మహాభారతం, భగవద్గీత వంటి అంశాలను సులభమైన హిందీ పాఠ్యాంశాల్లో చేర్చడం ద్వారా విద్యార్థులకు భాషను మరింత చేరువ చేయవచ్చని చెబుతున్నారు.

హిందీ భాష ప్రాధాన్యాన్ని గ్రామీణ ప్రాంతాల విద్యార్థులకు చేరువ చేస్తూ, భాషాభివృద్ధికి తన వంతు సేవ చేయాలనే లక్ష్యంతో నిరంజన్ ఖడంగా కొనసాగిస్తున్న కృషి హిందీ దివస్ సందర్భంగా ప్రత్యేకంగా నిలుస్తోంది.