Kanchili: అవకతవకలు జరిగితే కఠిన చర్యలు.. కంచిలి తహశీల్దార్ హెచ్చరిక

Kanchili: శ్రీకాకుళం జిల్లా కంచిలి మండలంలో నిత్యావసర సరుకుల పంపిణీ వ్యవస్థను మరింత పారదర్శకంగా, సమర్థవంతంగా అమలు చేయాలనే ఉద్దేశంతో కంచిలి తహశీల్దార్ కార్యాలయంలో మంగళవారం రేషన్ డీలర్లతో సమీక్షా సమావేశం నిర్వహించారు. తహశీల్దార్ ఎన్. రమేష్ కుమార్ అధ్యక్షతన జరిగిన ఈ సమావేశంలో సరఫరా విధానం, డీలర్ల బాధ్యతలు, ప్రజలకు అందుతున్న సేవలపై సమగ్రంగా చర్చించారు.

ఈ సందర్భంగా తహశీల్దార్ మాట్లాడుతూ ప్రతి లబ్ధిదారునికి సకాలంలో, పూర్తి స్థాయిలో రేషన్ సరుకులు అందేలా చర్యలు తీసుకోవాలని స్పష్టం చేశారు. పంపిణీ ప్రక్రియలో పారదర్శకతకు ప్రాధాన్యం ఇవ్వాలని, ఎటువంటి నిర్లక్ష్యం లేదా అవకతవకలు చోటుచేసుకుంటే కఠిన చర్యలు తప్పవని హెచ్చరించారు.

స్టాక్ రిజిస్టర్లు, ఈ-పాస్ యంత్రాల నిర్వహణలో నిర్లక్ష్యం వహించరాదని, ప్రభుత్వ నిబంధనలు కచ్చితంగా అమలు చేయాలని ఆదేశించారు. బయోమెట్రిక్ విధానంలోనే సరుకుల పంపిణీ జరగాలని, లబ్ధిదారులకు ఎటువంటి ఇబ్బందులు కలగకుండా సేవలు అందించాలని సూచించారు.

ప్రజల నుంచి ఫిర్యాదులు రాకుండా పనితీరును మెరుగుపరుచుకోవాలని, గ్రామాల్లో రేషన్ దుకాణాల పనివేళలను తప్పనిసరిగా పాటించాలని దిశానిర్దేశం చేశారు. డీలర్లు ఎదుర్కొంటున్న సమస్యలను ఈ సందర్భంగా అడిగి తెలుసుకుని, పరిష్కారానికి హామీ ఇచ్చారు. ఈ సమావేశంలో మండల పరిధిలోని రేషన్ డీలర్లు, రెవెన్యూ సిబ్బంది పాల్గొన్నారు.