Etcherla: కౌంటింగ్ ఏర్పాట్లను పరిశీలించిన జేసీ ఫర్మాన్ అహ్మద్ ఖాన్!

Etcherla: శ్రీకాకుళం, ఆమదాలవలస మున్సిపల్ ఎన్నికల కౌంటింగ్ ఏర్పాట్లను చిలకపాలెం శ్రీ శివాని కళాశాలలో జేసీ ఫర్మాన్ అహ్మద్ ఖాన్ బుధవారం పరిశీలించారు.

Varaprasad, Staff Reporter -Srikakulam
Published on: 18 Nov 2026 8:26 PM IST
Etcherla
X

Etcherla: కౌంటింగ్ ఏర్పాట్లను పరిశీలించిన జేసీ ఫర్మాన్ అహ్మద్ ఖాన్!

శ్రీకాకుళం (ఎచ్చెర్ల): శ్రీకాకుళం నగరపాలక సంస్థ, ఆమదాలవలస పురపాలక సంఘం ఎన్నికల నేపథ్యంలో చిలకపాలెం సమీపంలోని శ్రీ శివాని ఇంజనీరింగ్ కళాశాలలో ఏర్పాటు చేస్తున్న ఓట్ల లెక్కింపు కేంద్రాలను జాయింట్ కలెక్టర్ ఫర్మాన్ అహ్మద్ ఖాన్ క్షేత్రస్థాయిలో పరిశీలించారు. ఈ నెల 26న పోలింగ్ నిర్వహించి, 30వ తేదీన ఓట్ల లెక్కింపు చేపట్టనున్న నేపథ్యంలో రెవెన్యూ, పోలీసు, మున్సిపల్ తదితర శాఖల అధికారులతో కలిసి కళాశాల ప్రాంగణాన్ని సందర్శించిన ఆయన, కౌంటింగ్ ప్రక్రియకు సంబంధించి చేపట్టిన ముందస్తు ఏర్పాట్లపై సమీక్ష నిర్వహించారు.

ఈ సందర్భంగా బ్యాలెట్ బాక్సులను భద్రపరిచే స్ట్రాంగ్ రూమ్‌ల పటిష్టత, కౌంటింగ్ హాళ్లలో టేబుళ్ల ఏర్పాటు, బారికేడింగ్, నిరంతరాయ విద్యుత్ సరఫరా, సీసీ కెమెరాల నిఘా, అగ్నిమాపక చర్యలు, మీడియా సెంటర్ తదితర మౌలిక సదుపాయాలను ముందస్తుగా జేసీ తనిఖీ చేశారు. కౌంటింగ్ ఏజెంట్లు, సిబ్బంది రాకపోకలకు ప్రత్యేక మార్గాలు, పార్కింగ్ ఏర్పాట్లు, మూడంచెల పోలీసు భద్రతపై అధికారులకు కీలక సూచనలు జారీ చేశారు.

ఎన్నికల సంఘం మార్గదర్శకాలకు అనుగుణంగా ఎటువంటి లోటుపాట్లు లేకుండా పకడ్బందీగా ఏర్పాట్లు పూర్తి చేయాలని ఆదేశించారు. ఈ పరిశీలనలో శ్రీకాకుళం, ఆమదాలవలస మున్సిపల్ కమిషనర్లు జి.శ్రావణ్ కుమార్, టి.రవి, సీఐలు సన్యాసినాయుడు, అవతారం తదితర శాఖల అధికారులు పాల్గొన్నారు.

Varaprasad, Staff Reporter -Srikakulam

Varaprasad, Staff Reporter -Srikakulam

మూడు దశాబ్దాలకు పైగా (36 ఏళ్లు) సుదీర్ఘ అనుభవంతో, శ్రీకాకుళం జిల్లా రాజకీయ, సామాజిక పరిణామాలపై అపారమైన పట్టున్న ‘సీనియర్ స్టాఫ్ రిపోర్టర్’.