ఎయిర్‌టెల్ యూజర్లకు ఊరట.. 3 నెలల్లోనే ఆ పాపులర్ ప్లాన్ రీఎంట్రీ..!

Airtel 299 Plan Return: దిగ్గజ టెలికాం కంపెనీ భారతీ ఎయిర్‌టెల్ పెద్ద యూ-టర్న్ తీసుకుంది. తన ప్రజాదరణ పొందిన రూ.299 ప్రీపెయిడ్ ప్లాన్‌ను తిరిగి అందుబాటులోకి తెచ్చి కస్టమర్లకు ఊరటనిచ్చింది. కేవలం మూడు నెలల క్రితం టెలికాం కంపెనీలు తమ టారిఫ్ ప్లాన్ల ధరలు పెంచినప్పుడు, ఎయిర్‌టెల్ ఈ చవక ప్లాన్‌ను ఆపేసింది. ఇప్పుడు మళ్లీ దీన్ని తీసుకొచ్చింది.

ప్లాన్ వివరాలు..

రూ.299 ప్లాన్ రోజువారీ వినియోగానికి సంపూర్ణ ప్యాకేజీగా ఉంటుంది.

వాలిడిటీ: 28 రోజులు

కాలింగ్: ఏ నెట్‌వర్క్‌కైనా అన్‌లిమిటెడ్ కాలింగ్

డేటా: రోజుకు 1.5GB హై-స్పీడ్ డేటా

SMS: రోజుకు 100 SMSలు

అదనపు ప్రయోజనాలు..

డేటా, కాలింగ్‌తో పాటు ఈ ప్లాన్‌తో ఎయిర్‌టెల్ మరికొన్ని అదనపు బెనిఫిట్లు కూడా ఇస్తోంది.

అడోబ్ ఎక్స్‌ప్రెస్ ప్రీమియం: సుమారు రూ.4,000 విలువైన ఈ సబ్‌స్క్రిప్షన్ 12 నెలలపాటు ఉచితంగా లభిస్తుంది.

ఎయిర్‌టెల్ సేఫ్ (Airtel Safe): పెరుగుతున్న ఆన్‌లైన్ స్కామ్‌ల నేపథ్యంలో ఈ ఫీచర్‌ను ఇస్తోంది. రియల్ టైమ్ స్పామ్ కాల్ అలర్ట్, ఫ్రాడ్ లింక్ బ్లాకింగ్, OTP ద్వారా జరిగే బ్యాంక్ ఫ్రాడ్‌ల నుంచి రక్షణ కల్పిస్తుంది.

ఉచిత హలోట్యూన్స్: పాటల ప్రియుల కోసం ఈ సదుపాయం ఉంది. ప్రతి 30 రోజులకు ఒకసారి కొత్త ట్యూన్‌ను సెట్ చేసుకోవచ్చు.

కంపెనీ ఈ నిర్ణయం ఎందుకు తీసుకుంది?

మూడు నెలల క్రితం టారిఫ్ పెంపు తర్వాత నుంచి కస్టమర్లు 28 రోజుల వాలిడిటీ ఉన్న చవకైన, మంచి ప్లాన్‌ను కోరుతున్నారు. రూ.299 ప్లాన్ అకస్మాత్తుగా ఆగిపోవడంతో రోజుకు 1.5GB డేటా అవసరమైన మధ్యతరగతి యూజర్లు నిరాశ చెందారు. భారీ డిమాండ్, కస్టమర్లను తమ నెట్‌వర్క్‌లోనే ఉంచుకునే వ్యూహంలో భాగంగానే ఎయిర్‌టెల్ ఈ యూ-టర్న్ తీసుకుంది. రూ.299 ఆప్షన్ మళ్లీ అందుబాటులోకి రావడంతో ఎయిర్‌టెల్ కస్టమర్లకు పెద్ద ఊరట లభించింది.