iPhone: యాపిల్ సంచలన నిర్ణయం.. ఇకపై ఒక్కో కస్టమర్ కు కేవలం రెండే ఐఫోన్లు

iPhone: టెక్ దిగ్గజం యాపిల్ కంపెనీ ఐఫోన్ కొనుగోలుదారుల కోసం ఒక కఠినమైన నిబంధనను తీసుకువచ్చింది. ఇకపై భారతీయ ఆన్‌లైన్ స్టోర్ ద్వారా ఎవరైనా సరే ఒకే ఆర్డర్‌లో గరిష్టంగా కేవలం రెండు ఐఫోన్‌లను మాత్రమే కొనుగోలు చేయడానికి అనుమతి ఉంటుంది. ఈ తాజా నిబంధన కేవలం కొత్తగా మార్కెట్లోకి వస్తున్న ఐఫోన్ డ్యూయో, ఐఫోన్ 18 ప్రో, ఐఫోన్ 18 ప్రో మాక్స్ మోడళ్లకు మాత్రమే కాకుండా, కంపెనీ విక్రయించే అన్ని రకాల ఐఫోన్ మోడళ్లకు వర్తిస్తుంది. కొనుగోలుదారులు ఒకే మోడల్‌కు చెందిన రెండు ఫోన్లు తీసుకోవచ్చు లేదా వేర్వేరు మోడళ్లను కూడా ఎంచుకోవచ్చు. అయితే షాపింగ్ కార్ట్‌లో మూడో ఐఫోన్‌ను యాడ్ చేయడానికి ప్రయత్నిస్తే వెబ్‌సైట్ వెంటనే ఒక అలర్ట్ మెసేజ్ చూపుతుంది.

బ్లాక్ మార్కెటింగ్, రీసేల్ దందాలకు అడ్డుకట్ట

ఈ సరికొత్త పరిమితి వెనుక ప్రధాన ఉద్దేశం ఫోన్లను పెద్ద ఎత్తున కొనుగోలు చేసి అధిక ధరలకు బ్లాక్‌లో విక్రయించే రీసేల్ దందాలను అరికట్టడమే అని నిపుణులు భావిస్తున్నారు. చాలా మంది బ్లాక్ మార్కెట్ వ్యాపారులు కొత్త ఐఫోన్లు మార్కెట్లోకి రాగానే బల్క్ ఆర్డర్లు పెట్టి స్టాక్‌ను బ్లాక్ చేస్తుంటారు. దీనివల్ల సాధారణ కస్టమర్లకు ఫోన్లు దొరకకుండా పోతుంటాయి. ఈ సమస్యకు శాశ్వత పరిష్కారంగా యాపిల్ ఈ నిబంధనను అమలులోకి తెచ్చింది. కుటుంబ సభ్యుల కోసం లేదా గిఫ్ట్ ఇవ్వడం కోసం ఒకేసారి మూడో ఫోన్ కొనాలనుకునే వారికి ఆన్‌లైన్ స్టోర్ ద్వారా ఈ అవకాశం లభించదు. సాధారణ వినియోగదారులందరికీ సమానంగా ఫోన్లు అందుబాటులో ఉంచడమే దీని ప్రధాన లక్ష్యం.

ఐఫోన్ డ్యూయోకు విపరీతమైన డిమాండ్

యాపిల్ తీసుకొచ్చిన ఈ తాజా నిబంధన సరిగ్గా కంపెనీ మొదటి ఫోల్డబుల్ స్మార్ట్‌ఫోన్ అయిన ఐఫోన్ డ్యూయో విక్రయాల ముందస్తు వేళ ప్రాధాన్యత సంతరించుకుంది. అక్టోబర్ 23 నుంచి భారత్‌లో ఈ ఫోన్ అమ్మకాలు ప్రారంభం కానుండగా, అక్టోబర్ 16 నుంచి ప్రారంభమైన ప్రీ-బుకింగ్స్‌కు ఊహించని స్పందన లభించింది. బుకింగ్‌లు మొదలైన కొద్ది క్షణాల్లోనే డెలివరీ తేదీలు వచ్చే ఏడాది జనవరికి వాయిదా పడే స్థాయికి డిమాండ్ పెరిగిపోయింది. ఈ భారీ డిమాండ్‌ను దృష్టిలో ఉంచుకునే కంపెనీ సిబ్బంది బ్లాక్ మార్కెటింగ్ కార్యకలాపాలను ముందే గుర్తించి ఈ కఠిన నిర్ణయం తీసుకుంది.

హిస్టరీ రిపీట్

యాపిల్ కంపెనీ ఇలాంటి పరిమితులు విధించడం ఇదే మొదటిసారి కాదు. సరిగ్గా 19 సంవత్సరాల క్రితం, అంటే 2007లో మొట్టమొదటి ఐఫోన్ లాంచ్ అయిన సమయంలో కూడా స్టీవ్ జాబ్స్ ఇదే విధమైన నిబంధనను తీసుకువచ్చారు. అప్పట్లో కూడా ఒక కస్టమర్ కేవలం రెండు ఫోన్లు మాత్రమే కొనుగోలు చేసేలా రూల్ పెట్టారు. కాలక్రమేణా ఆ నిబంధనను సడలించినప్పటికీ, మార్కెట్లో ఉత్పత్తుల కృత్రిమ కొరతను నివారించడానికి ఇప్పుడు మళ్లీ అదే విధానాన్ని తెరపైకి తీసుకువచ్చారు. టెక్ ప్రపంచంలో ఈ నిర్ణయం ఇప్పుడు తీవ్ర చర్చనీయాంశంగా మారింది.