Apple Smart Glasses : కళ్లజోడే కంప్యూటర్ కానుందా.? యాపిల్ సీక్రెట్ ప్రాజెక్ట్‌ లీక్.!

Apple Smart Glasses : గత దశాబ్ద కాలంలో యాపిల్ వాచ్‌ (Apple Watch) తో స్మార్ట్‌వాచ్ విభాగంలో ఎలాంటి అద్భుత విజయాన్ని అందుకుందో, రాబోయే రోజుల్లో 'స్మార్ట్ గ్లాసెస్' (Smart Glasses) రంగంలోనూ అలాంటి రికార్డులనే సృష్టించడానికి యాపిల్ సంస్థ భారీ ప్లాన్ చేస్తోంది. స్మార్ట్ గ్లాసెస్ అనేది భవిష్యత్తులో తదుపరి ప్రధాన కంప్యూటింగ్ ప్లాట్‌ఫారమ్‌గా మారనుందని యాపిల్ భావిస్తోంది. ప్రస్తుతం మార్కెట్లో ఉన్న రే-బాన్ మెటా గ్లాసెస్ (Ray-Ban Meta Glasses) వంటి వాటికి గట్టి పోటీ ఇచ్చేలా యాపిల్ తన సరికొత్త గ్లాసెస్‌ను సిద్ధం చేస్తోంది.

లాంచ్ ఎప్పుడంటే.?

బ్లూమ్‌బెర్గ్ ప్రముఖ జర్నలిస్ట్ మార్క్ గుర్మన్ అందించిన సమాచారం ప్రకారం.. ప్రస్తుతం ఈ స్మార్ట్ గ్లాసెస్ ప్రాజెక్ట్ యాపిల్ సంస్థలో ‘N50’ అనే కోడ్‌నేమ్‌తో అభివృద్ధి దశలో ఉంది. నిజానికి ఈ ఉత్పత్తిని 2026 చివరి నాటికి పరిచయం చేసి, 2027 ప్రారంభంలో మార్కెట్లోకి విడుదల చేయాలని కంపెనీ తొలుత భావించింది. అయితే కొన్ని సాంకేతిక కారణాల వల్ల ఈ ప్రాజెక్ట్ మరింత ఆలస్యమైంది. ప్రస్తుత నివేదికల ప్రకారం, యాపిల్ ఈ స్మార్ట్ గ్లాసెస్‌ను వచ్చే ఏడాది (2027) చివరలో లాంచ్ చేయడమే లక్ష్యంగా పెట్టుకుంది.

ధర , పోటీదారులు

ప్రస్తుతం స్మార్ట్ గ్లాసెస్ మార్కెట్లో రే-బాన్ మెటా గ్లాసెస్‌తో పాటు గూగుల్ ఐఓ 2026 (Google I/O 2026) లో ఆవిష్కరించిన శామ్‌సంగ్ ఆండ్రాయిడ్ ఎక్స్ఆర్ (Android XR) స్మార్ట్ గ్లాసెస్ వంటి కొన్ని ఉత్పత్తులు మాత్రమే ఉన్నాయి. మార్కెట్ పరిమాణం చాలా చిన్నదిగా ఉండటంతో ఇక్కడ భారీ అవకాశాలు ఉన్నాయని యాపిల్ నమ్ముతోంది. ముఖ్యంగా సాధారణ వినియోగదారులను ఆకట్టుకునేలా వీటి ధరను $200 నుండి $500 (సుమారు రూ.16,500 నుండి రూ.41,500) మధ్య నిర్ణయించాలని యాపిల్ భావిస్తోంది. ఈ ధరతో మార్కెట్లోకి వస్తే ప్రముఖ ఐవేర్ దిగ్గజాలైన ఎస్సిలార్ లక్సోటికా (EssilorLuxottica), సఫిలో (Safilo), వార్బీ పార్కర్ (Warby Parker) వంటి బ్రాండ్లకు యాపిల్ గట్టి పోటీ ఇవ్వనుంది.

ఏఐ ఫీచర్లు.. లీడర్‌షిప్ సపోర్ట్

ఈ సరికొత్త స్మార్ట్ గ్లాసెస్ పూర్తిగా ఆర్టిఫిషియల్ ఇంటెలిజెన్స్ (AI) , సరికొత్తగా అప్‌గ్రేడ్ చేసిన 'సిరి' (Siri) వాయిస్ అసిస్టెంట్ అనుభవంతో పనిచేస్తాయి. ప్రపంచవ్యాప్తంగా ఉన్న 200 కోట్లకు పైగా యాక్టివ్ యాపిల్ డివైజ్‌ల ఎకోసిస్టమ్‌తో ఈ గ్లాసెస్ సులభంగా కనెక్ట్ అవుతాయి. ఫస్ట్‌ జనరేషన్‌కు చెందిన ఈ గ్లాసెస్‌లో వివిధ రకాల ఫ్రేమ్ స్టైల్స్, ఆకర్షణీయమైన కలర్ ఆప్షన్లు , ప్రత్యేకమైన కెమెరా హార్డ్‌వేర్‌ను డిజైన్‌లోనే అమర్చనున్నారు. యాపిల్ కొత్త సీఈఓ జాన్ టెర్నస్ (John Ternus) ఈ ప్రాజెక్ట్‌ను కంపెనీ టాప్ ప్రయారిటీలలో ఒకటిగా గుర్తించడంతో, దీనికి సీనియర్ లీడర్‌షిప్ నుండి గట్టి మద్దతు లభిస్తోంది.

2029 నాటికి ‘విజన్ ఎయిర్’ హెడ్‌సెట్.?

స్మార్ట్ గ్లాసెస్‌తో పాటు యాపిల్ తన విప్లవాత్మక 'విజన్ ప్రో' (Vision Pro) హెడ్‌సెట్‌కు తదుపరి వెర్షన్‌గా బరువు తక్కువగా, స్లిమ్‌గా ఉండే 'విజన్ ఎయిర్' (Vision Air) పై కూడా పని చేస్తోంది. ప్రస్తుతం ఉన్న విజన్ ప్రో బరువు, సైజు , అధిక ధరపై వచ్చిన విమర్శలను దృష్టిలో ఉంచుకుని క్రోమా ఈ కొత్త మోడల్‌ను మరింత సౌకర్యవంతంగా డిజైన్ చేస్తోంది. అయితే ఈ విజన్ ఎయిర్ హెడ్‌సెట్ 2028 చివరిలో లేదా 2029 నాటికి మాత్రమే మార్కెట్లోకి వచ్చే అవకాశం ఉంది. అంటే డబ్ల్యూడబ్ల్యూడీసీ 2023 (WWDC 2023) లో మొదటి విజన్ ప్రోను పరిచయం చేసిన దాదాపు ఆరేళ్ల తర్వాతే ఈ సరికొత్త ‘విజన్ ఎయిర్’ అందుబాటులోకి రానుంది.