Robot ID system :చైనా సంచలనాత్మక నిర్ణయం.. హ్యూమనాయిడ్ రోబోలకు ఐడీ కార్డులు

Robot ID system : సాధారణంగా మనుషుల గుర్తింపును ధృవీకరించడానికి, రికార్డులను నిర్వహించడానికి ప్రభుత్వాలు , వివిధ సంస్థలు ప్రత్యేక గుర్తింపు సంఖ్యలను (ID numbers) ఉపయోగిస్తుంటాయి. ఇప్పుడు చైనా దేశం సరిగ్గా ఇలాంటి విధానాన్నే హ్యూమనాయిడ్ రోబోల (మనిషి పోలికలతో ఉండే రోబోలు) కోసం తీసుకురాబోతోంది. దేశంలో తయారయ్యే ప్రతి AI-ఆధారిత రోబోకు ఒక ప్రత్యేకమైన కోడ్‌ను కేటాయించేందుకు చైనా జాతీయ డిజిటల్ గుర్తింపు వ్యవస్థను ప్రారంభించింది. ఈ ఐడీ కార్డ్ ఫ్యాక్టరీలో రోబో తయారీ దశ నుండి దాని నిర్వహణ, రీసైక్లింగ్ , రిటైర్మెంట్ (పనిచేయని స్థితి) వరకు ఒక 'డిజిటల్ పాస్‌పోర్ట్' లాగా పనిచేస్తూ దాన్ని వెంటాడుతుంది.

హ్యూమనాయిడ్ ఫుల్ లైఫ్‌సైకిల్ మేనేజ్‌మెంట్ సర్వీస్ ప్లాట్‌ఫారమ్

చైనా ఈ వినూత్న కార్యక్రమానికి 'హ్యూమనాయిడ్ ఫుల్ లైఫ్‌సైకిల్ మేనేజ్‌మెంట్ సర్వీస్ ప్లాట్‌ఫారమ్' అని పేరు పెట్టింది. ఈ కొత్త వ్యవస్థ ప్రకారం, దేశంలో తయారయ్యే ప్రతి హ్యూమనాయిడ్ రోబోకు 29-అంకెల ప్రత్యేక గుర్తింపు కోడ్ కేటాయించబడుతుంది. దీని ద్వారా రోబో ఉత్పత్తి, అమ్మకాలు, నిర్వహణ, రీసైక్లింగ్ , చివరగా దాన్ని స్క్రాప్ చేసే ప్రక్రియ వరకు ప్రతి దశను అధికారులు ట్రాక్ చేయవచ్చు. వేగంగా అభివృద్ధి చెందుతున్న హ్యూమనాయిడ్ రోబోటిక్స్ రంగాన్ని పర్యవేక్షించడానికి, ఉమ్మడి ప్రమాణాలను తీసుకురావడానికి , మెరుగైన పారదర్శకతను నిర్ధారించడానికి చైనా ప్రభుత్వ అధికారిక మీడియా ఈ కార్యక్రమాన్ని రూపొందించినట్లు తెలిపింది.

రోబో ఐడీ కార్డు చేసే పనులు

చైనా ప్రభుత్వానికి చెందిన 'మినిస్ట్రీ ఆఫ్ ఇండస్ట్రీ అండ్ ఇన్ఫర్మేషన్ టెక్ناطజీ' తన 'హ్యూమనాయిడ్ రోబోటిక్స్ అండ్ ఎంబోడీడ్ ఇంటెలిజెన్స్ స్టాండర్డైజేషన్ కమిటీ' ద్వారా ఈ ప్రాజెక్టును పర్యవేక్షిస్తోంది. ఈ ఐడీ కార్డు రోబోకు సంబంధించిన కీలక సమాచారాన్ని రికార్డ్ చేస్తుంది. ఆ రోబోను ఎవరు తయారు చేశారు, అది ఏ మోడల్, ప్రస్తుతం ఎక్కడ ఉపయోగించబడుతోంది, దాని సర్వీసింగ్ చరిత్ర ఏమిటి , దాని జీవితకాలం ముగిసిన తర్వాత దాన్ని ఏం చేశారు వంటి విషయాలన్నీ ఈ సిస్టమ్‌లో నమోదవుతాయి. దీనివల్ల భద్రతా పరమైన నష్టాలను పర్యవేక్షించడం, లోపాలున్న రోబోలను గుర్తించడం , ఏదైనా సమస్య తలెత్తితే దానికి ఎవరు బాధ్యులో తేల్చడం అధికారులకు చాలా సులువవుతుంది.

29-అంకెల కోడ్ ప్రత్యేకత

ఈ ప్రత్యేకమైన 29-అంకెల ఐడీ కోడ్‌ను నాలుగు భాగాలుగా విభజించారు. ఇందులో మొదటి రెండు అంకెలు కంట్రీ కోడ్‌ను, తర్వాతి నాలుగు అంకెలు మ్యానుఫ్యాక్చరర్ (తయారీదారు) కోడ్‌ను, ఆపై వచ్చే ఆరు అంకెలు ప్రొడక్ట్ మోడల్ కోడ్‌ను సూచిస్తాయి. ఇక చివరిగా ఉండే 17 అంకెలు ప్రతి రోబోకు విడివిడిగా ఉండే ఒక విలక్షణమైన యూనిక్ సీరియల్ నంబర్‌ను కలిగి ఉంటాయి. ఈ నాలుగు వివరాలు కలిసి ప్రతి హ్యూమనాయిడ్ రోబోకు ఒక విలక్షణమైన డిజిటల్ గుర్తింపును ఇస్తాయి. దీనివల్ల వేర్వేరు పరిశ్రమలలో అవి ఎలా పనిచేస్తున్నాయో సులభంగా తెలుసుకోవడానికి వీలవుతుంది.

కోడ్ లేకపోతే మార్కెట్లోకి నో ఎంట్రీ

ఈ కొత్త విధానం ఈకోసిస్టమ్‌లోని తయారీదారులు, విక్రేతలు, సర్వీస్ ప్రొవైడర్లు, వినియోగదారులు , రీసైక్లింగ్ కంపెనీలందరికీ వర్తిస్తుంది. ఇందులో భాగంగా చైనా ప్రభుత్వం తయారీదారులకు కఠినమైన రూల్స్ పెడుతూ, "నో కోడ్, నో మార్కెట్ యాక్సెస్" అనే పాలసీని తీసుకువచ్చింది. అంటే, ఈ సిస్టమ్‌లో రిజిస్టర్ కాకుండా ఏ హ్యూమనాయిడ్ రోబోను చైనాలో అమ్మడానికి, ఉపయోగించడానికి వీల్లేదు. ఒకవేళ రోబోలలో ఏదైనా సాధారణ లోపం కనిపిస్తే కంపెనీలు కచ్చితంగా వాటిని వెనక్కి తీసుకోవాల్సి ఉంటుంది. అలాగే, స్క్రాప్ చేసిన పాత రోబోల భాగాలను ఉపయోగించి రీఫర్బిష్డ్ రోబోలను మార్కెట్లోకి తీసుకురావడాన్ని పూర్తిగా నిషేధించారు.

పరిశ్రమల్లో అమలు , కంపెనీల భాగస్వామ్యం

ఈ నూతన డిజిటల్ గుర్తింపు వ్యవస్థ చైనా రోబోటిక్స్ పరిశ్రమలో ఇప్పటికే వేగంగా అమలువుతోంది. నివేదికల ప్రకారం, 100 కంటే ఎక్కువ చైనీస్ హ్యూమనాయిడ్ రోబో తయారీ కంపెనీలు ఇప్పటికే ఈ ప్లాట్‌ఫారమ్‌లో చేరాయి. ప్రస్తుతం మార్కెట్లో ఉన్న దాదాపు 200 రకాల విభిన్న మోడళ్లకు చెందిన 28,000 కంటే ఎక్కువ రోబోలకు ఈ డిజిటల్ ఐడీలను విజయవంతంగా కేటాయించారు. రోబోల వల్ల భవిష్యత్తులో వచ్చే భద్రత, జవాబుదారీతనం వంటి సవాళ్లను అధిగమించడానికి చైనా తీసుకున్న ఈ నిర్ణయం ప్రపంచవ్యాప్తంగా చర్చనీయాంశంగా మారింది.