Deepinder Goyal Temple: తలకు పెట్టుకుంటే చాలు.. బ్రెయిన్‌ను చదివే డివైజ్.. నవంబర్ 1 నుంచి బుకింగ్స్..!

Deepinder Goyal Temple: జొమాటో వ్యవస్థాపకుడు దీపిందర్ గోయల్ (Deepinder Goyal)కు చెందిన కొత్త డివైజ్ టెంపుల్ త్వరలో కొనుగోలుకు అందుబాటులోకి రానుంది. ఇది సాధారణ స్మార్ట్‌వాచ్ లేదా ఫిట్‌నెస్ బ్యాండ్ కాదు. చేతికి ధరించడానికి బదులుగా తలపై కనపటి ప్రాంతంలో అమర్చుకునేలా దీన్ని రూపొందించారు. దీని సాయంతో మెదడులో రక్త ప్రసరణకు సంబంధించిన మార్పులను ట్రాక్ చేయవచ్చు. తాజాగా కంపెనీ దీని ప్రీ-బుకింగ్ తేదీని ప్రకటించింది. టెంపుల్ బుకింగ్స్ 2026 నవంబర్ 1 నుంచి ప్రారంభం కానున్నాయి.

6 రంగుల్లో టెంపుల్.. Templeను ప్రారంభంలో ఆరు విభిన్న రంగుల్లో అందించనున్నారు. అవి:

ట్రూ గోల్డ్, రోజో గోల్డ్, బ్లాక్ మిర్రర్, రియల్ జాడే, డీప్ బ్లూ, పర్పుల్ ఫంక్, వీటిలో Real Jade, Deep Blue, Purple Funk రంగులు లిమిటెడ్ ఎడిషన్ ఆప్షన్లుగా ఉంటాయి.

ఈ డివైజ్‌పై ఇప్పటికే ఆసక్తి పెరగడానికి ప్రధాన కారణం దీని డిజైన్, పనిచేసే విధానం. ఇవి ప్రస్తుతం మార్కెట్లో ఉన్న ఇతర వేరబుల్ డివైజ్‌లతో పోలిస్తే భిన్నంగా ఉన్నాయి.

కంపెనీ సమాచారం ప్రకారం ప్రారంభ బ్యాచ్‌లో ఆర్డర్ వచ్చిన తర్వాతే డివైజ్‌లను తయారు చేయనున్నారు. అందువల్ల బుకింగ్స్ ఫస్ట్ కం, ఫస్ట్ సర్వ్ విధానంలో ఉండనున్నాయి.

టెంపుల్ డివైజ్ ఏం చేస్తుంది?

సాధారణంగా స్మార్ట్‌వాచ్‌ల ద్వారా హార్ట్‌రేట్, అడుగుల సంఖ్య, నిద్ర వంటి అంశాలను ట్రాక్ చేస్తుంటారు. అయితే టెంపుల్ ప్రధానంగా మెదడులో రక్త ప్రసరణకు సంబంధించిన సంకేతాలపై దృష్టి పెడుతుంది. ఈ టెక్నాలజీకి కంపెనీ బ్రెయిన్ ప్లో అనే పేరు పెట్టింది.

ఈ డివైజ్‌ను తల పక్కభాగంలో, నుదురు-చెవి మధ్య ఉండే కనపటి ప్రాంతం దగ్గర అమర్చుకోవాలి. ఇందులో ఆప్టికల్ సెన్సర్లను ఉపయోగించారు. ఇవి రక్తం, టిష్యూలలో జరిగే మార్పులకు సంబంధించిన సంకేతాలను ట్రాక్ చేస్తాయి.

ఈ సంకేతాల ద్వారా వ్యాయామం, నిద్ర, ఇతర కార్యకలాపాల సమయంలో మెదడులో రక్త ప్రసరణకు సంబంధించిన మార్పులను అర్థం చేసుకోవడానికి సహాయపడవచ్చు.

అయితే టెంపుల్‌ను మెదడు ఆరోగ్యాన్ని పూర్తిగా పరీక్షించే డివైజ్‌గా భావించకూడదు. అలాగే ఏదైనా వ్యాధిని గుర్తించేందుకు ఇది మెడికల్ టెస్ట్‌కు ప్రత్యామ్నాయం కాదు.

టెంపుల్ ధర ఎంత?

టెంపుల్ ధరకు సంబంధించి కంపెనీ ఇంకా అధికారిక వివరాలను వెల్లడించలేదు. అలాగే పూర్తి స్పెసిఫికేషన్లు, డెలివరీ తేదీ గురించి కూడా సమాచారం ఇవ్వలేదు. అందువల్ల కొనుగోలు చేసే ముందు ఈ వివరాలు అధికారికంగా వెల్లడయ్యే వరకు వేచి చూడాల్సి ఉంటుంది.

ప్రస్తుతం ఈ డివైజ్‌కు సంబంధించిన అతిపెద్ద అప్‌డేట్ నవంబర్ 1, 2026 నుంచి ప్రారంభమయ్యే ప్రీ-బుకింగ్స్. దీపిందర్ గోయల్ కొత్త వేరబుల్ మార్కెట్లోకి వచ్చిన తర్వాత వినియోగదారుల నుంచి ఎలాంటి స్పందన వస్తుందో చూడాలి.