Digital Gold: డిజిటల్ గోల్డ్ కొంటున్నారా? రూ. 100కు ఎంత బంగారం వస్తుందంటే.!

Digital Gold: ఫోన్‌పే, పేటీఎం వంటి యాప్స్‌లో డిజిటల్ గోల్డ్ కొనేటప్పుడు 3 శాతం జీఎస్టీ కట్ అవుతుందని, అమ్మేటప్పుడు కొనుగోలు ధరతో పోలిస్తే 3 నుంచి 4 శాతం వరకు వ్యత్యాసం ఉంటుందని, బంగారం ధరలు పడిపోయిన ఈ సమయంలో ఈ తేడాను గమనించాలని నిపుణులు సూచిస్తున్నారు.

Ravi
By Ravi
Published on: 20 Nov 2026 7:17 PM IST
Digital Gold
X

Digital Gold: డిజిటల్ గోల్డ్ కొంటున్నారా? రూ. 100కు ఎంత బంగారం వస్తుందంటే.!

Digital Gold: ఫోన్‌పే, పేటీఎం వంటి యాప్స్‌లో బంగారం కొనుగోలు, అమ్మకం సమయంలో తేడాలుంటాయి. ఉదా. రోజూ రూ.100తో గోల్డ్ కొంటే అందులో 3 శాతం GST కట్ అవుతుంది. అంటే మీరు రూ.97 విలువైన గోల్డ్ మాత్రమే కొన్నట్లు. అదే అమ్మే సమయంలో కొనుగోలు ధరతో పోల్చితే 3-4శాతం వరకు వ్యత్యాసం ఉంటుంది. తాజాగా బంగారం ధరలు పడిపోవడంతో డిజిటల్ గోల్డ్ విక్రయించాలనుకునేవారు కొనుగోలు, అమ్మకం ధరల మధ్య తేడాను గమనించాలని నిపుణులు సూచిస్తున్నారు.

డిజిటల్ గోల్డ్ అంటే యాప్ ద్వారా రూపాయి నుంచి కొనగలిగే 24 క్యారెట్ల బంగారం. ఈ బంగారాన్ని కంపెనీ భాగస్వామ్య వాల్ట్‌లో భద్రపరుస్తుంది. కొనుగోలు సమయంలో 3 శాతం జీఎస్టీ చెల్లించాలి. ఈ జీఎస్టీని అమ్మేటప్పుడు తిరిగి ఇవ్వరు. అందువల్ల కొన్న వెంటనే అమ్మితే నష్టం వస్తుంది. బంగారం ధర బాగా పెరిగాకే లాభం కనిపిస్తుంది.

కొనుగోలు, అమ్మకం ధరల మధ్య తేడా ప్లాట్‌ఫామ్ బట్టి మారుతుంది. కొన్ని సోర్సులు 2 నుంచి 3 శాతమని, మరికొన్ని 4 నుంచి 7 శాతమని చెబుతున్నాయి. నిల్వ, బీమా, మార్జిన్ ఖర్చులను ఇది కవర్ చేస్తుందని ప్లాట్‌ఫామ్‌లు చెబుతాయి. కొన్ని ప్లాట్‌ఫామ్‌లు కొన్నేళ్ల తర్వాత నిల్వ రుసుము కూడా వసూలు చేయవచ్చు. కాబట్టి కొనే ముందు ఆ యాప్ చూపే రెండు ధరలనూ పక్కపక్కనే పరిశీలించాలి.

డిజిటల్ గోల్డ్‌కు సెబీ రక్షణ లేదు. 2025 నవంబర్ 8న సెబీ ఈ విషయంపై హెచ్చరిక జారీ చేసింది. డిజిటల్ గోల్డ్ ఉత్పత్తులు సెక్యూరిటీలు కాదని, కమోడిటీ డెరివేటివ్‌లుగానూ నియంత్రణలో లేవని, సెబీ పరిధికి పూర్తిగా వెలుపల ఉన్నాయని ప్రకటించింది. వాల్ట్‌లలో నిజంగా బంగారం ఉందా, దాని స్వచ్ఛత ఎంత అనేది నియంత్రణ సంస్థలు పరిశీలించలేవని కూడా పేర్కొంది. దీంతో ఏదైనా సమస్య వస్తే పెట్టుబడిదారులకు నియంత్రణ రక్షణ ఉండదు.

ఈ హెచ్చరిక తర్వాత డిజిటల్ గోల్డ్ ఫిన్‌టెక్‌ల నుంచి విత్‌డ్రాలు సుమారు మూడు రెట్లు పెరిగాయని బిజినెస్ స్టాండర్డ్ రిపోర్ట్ చేసింది. నవంబర్ 2025లో యూపీఐ ద్వారా డిజిటల్ గోల్డ్ కొనుగోళ్ల విలువ అక్టోబర్‌లోని రూ.2,290 కోట్ల నుంచి 47 శాతం తగ్గి రూ.1,215 కోట్లకు చేరింది. లావాదేవీల సంఖ్య మాత్రం 6.44 శాతం పెరిగి 12.34 కోట్లకు చేరింది. అంటే చిన్న మొత్తాల కొనుగోళ్లు కొనసాగాయి.

బంగారంలో పెట్టుబడి పెట్టాలనుకునేవారికి గోల్డ్ ఈటీఎఫ్‌లు, గోల్డ్ మ్యూచువల్ ఫండ్లు ప్రత్యామ్నాయాలు. వీటిపై సెబీ నియంత్రణ ఉంటుంది. జీఎస్టీ వర్తించదు. ఖర్చులు డిజిటల్ గోల్డ్‌తో పోలిస్తే తక్కువగా ఉంటాయని ఆర్థిక విశ్లేషకులు చెబుతున్నారు. పెద్ద మొత్తాల పెట్టుబడికి ఈ ఆప్షన్లు మెరుగైనవని కూడా సూచిస్తున్నారు. ఇవి సాధారణ సమాచారం మాత్రమే, పెట్టుబడి సలహా కాదు. నిర్ణయం తీసుకునే ముందు సెబీ రిజిస్టర్డ్ ఆర్థిక సలహాదారుని సంప్రదించాలి.

Ravi

Ravi

2017లో వెబ్ జర్నలిస్ట్‌గా నా కెరీర్ ప్రారంభించాను. పలు వెబ్‌సైట్స్‌లో కంటెంట్ రైటర్‌గా పని చేశాను. డిజిటల్ మీడియాలో 7 ఏళ్ళకుపైగా అనుభవం ఉంది. ట్రెండింగ్, బిజినెస్, ఆంధ్రప్రదేశ్ & తెలంగాణకు సంబంధించి బ్రేకింగ్ కంటెంట్ రాస్తుంటాను.