Facebook: మ‌రింత స్మార్ట్‌గా మారుతోన్న ఫేస్‌బుక్‌.. కొత్త ఏఐ ఎడింటింగ్ టూల్స్

Facebook: సోషల్ మీడియా దిగ్గజం మెటా తన ఫేస్‌బుక్ ప్లాట్‌ఫామ్‌లో కొత్త AI ఫీచర్లను తీసుకొచ్చింది. ఇందులో ప్రధానంగా ఏఐ మోడ్‌ అనే కొత్త సెర్చ్ సదుపాయం అందుబాటులోకి వచ్చింది. దీని ద్వారా వినియోగదారులు సాధారణ భాషలో ప్రశ్నలు అడిగితే, AI వాటికి సమాధానాలను తయారు చేసి చూపిస్తుంది. అంతేకాకుండా ఫోటోలు, వీడియోలను మరింత ఆకర్షణీయంగా మార్చే కొత్త AI ఎడిటింగ్ టూల్స్‌ను కూడా మెటా ప్రవేశపెట్టింది.

ఏఐ మోడ్‌ అంటే ఏమిటి?

AI Mode అనేది ఫేస్‌బుక్‌లో కొత్త తరహా సెర్చ్ అనుభవం. ఇప్పటి వరకు సెర్చ్‌లో పోస్టులు లేదా లింకులు మాత్రమే కనిపించేవి. ఇప్పుడు వినియోగదారులు ప్రశ్న అడిగితే, Meta AI ఫేస్‌బుక్‌లోని పబ్లిక్ పోస్టులు, గ్రూపులు, రీల్స్‌లో ఉన్న సమాచారాన్ని విశ్లేషించి ఒక సమగ్ర సమాధానాన్ని అందిస్తుంది. ఉదాహరణకు, ఒక అంశంపై సమాచారం కావాలంటే అనేక పోస్టులు వెతకాల్సిన అవసరం లేకుండా AI సంక్షిప్తంగా వివరాలను అందిస్తుంది.

పబ్లిక్ పోస్టులు, గ్రూపుల నుంచి సమాచారం

ఈ AI Mode ఫేస్‌బుక్‌లో అందరికీ కనిపించే పబ్లిక్ కంటెంట్‌ను ఆధారంగా తీసుకుంటుంది. పబ్లిక్ పోస్టులు, గ్రూప్ చర్చలు, రీల్స్‌లో ఉన్న సమాచారాన్ని సేకరించి సమాధానాలు రూపొందిస్తుంది. ఇటీవల మెటా విడుదల చేసిన Forum యాప్‌లో కూడా ఇలాంటి AI ఆధారిత "Ask" ఫీచర్‌ను అందించింది. గ్రూపుల్లో జరిగే చర్చలను ఆధారంగా చేసుకుని సమాధానాలు ఇవ్వడం దాని ప్రత్యేకత. అయితే, యూజ‌ర్లు పోస్ట్ చేసిన సమాచారమే AIకి ఆధారం కావడం వల్ల సమాధానాల ఖచ్చితత్వంపై కొన్ని సందేహాలు కూడా వ్యక్తమవుతున్నాయి.

ఫోటోలు, వీడియోలకు కొత్త AI ఎడిటింగ్ టూల్స్

AI Modeతో పాటు కంటెంట్ క్రియేటర్ల కోసం కొత్త ఎడిటింగ్ ఫీచర్లను కూడా మెటా అందుబాటులోకి తెచ్చింది.

వీడియోల కోసం కొత్త ట్రాన్సిషన్ ఎఫెక్ట్స్, కొలాజ్ కట్‌అవుట్ ఫీచర్, AI ఆధారిత ఫోటో ప్రీసెట్స్, దుస్తులు, హెయిర్‌స్టైల్, యాక్సెసరీస్‌ను వర్చువల్‌గా మార్చుకునే అవకాశం వంటివి ఇందులో ప్ర‌ధాన‌మైన‌వి. దీంతో ఫోటోలను మరింత ఆకర్షణీయంగా మార్చుకోవచ్చు.

స్టోరీస్, ప్రొఫైల్ ఫోటోలకు AI మేకోవర్

ఫేస్‌బుక్ స్టోరీస్‌లో "AI Edit" ఎంపిక ద్వారా వినియోగదారులు వర్చువల్‌గా కొత్త దుస్తులు ట్రై చేయవచ్చు. ఉదాహరణకు స్పోర్ట్స్ జెర్సీలు ధరించినట్లుగా ఫోటోలను మార్చుకోవచ్చు. అలాగే ప్రొఫైల్ పిక్చర్లకు AI స్టైలింగ్ ఫీచర్‌ను కూడా తీసుకొచ్చింది. దీనితో ఫోటోలకు కొత్త లుక్ ఇవ్వడం సులభమవుతుంది.

AI ఆధారిత భవిష్యత్‌పై మెటా దృష్టి

గత కొన్ని నెలలుగా మెటా ఫేస్‌బుక్‌లో అనేక AI ఫీచర్లను ప్రవేశపెడుతోంది. ఇప్పటికే AI యానిమేటెడ్ ప్రొఫైల్ ఫోటోలు, మార్కెట్ ప్లేస్ విక్రేతలకు AI సహాయం, క్రియేటర్లకు పోస్టింగ్ సూచనలు ఇచ్చే AI అసిస్టెంట్, ప్రేక్షకుల స్పందనపై విశ్లేషణలు వంటి ఫీచర్లు అందుబాటులో ఉన్నాయి. అదే సమయంలో ఫేస్‌బుక్, ఇన్‌స్టాగ్రామ్, వాట్సాప్ కోసం సబ్‌స్క్రిప్షన్ సేవలను కూడా మెటా విస్తరిస్తోంది. భవిష్యత్‌లో ప్రత్యేక AI సేవల కోసం కొత్త సబ్‌స్క్రిప్షన్ ప్లాన్‌లు తీసుకొచ్చే అవకాశం ఉందని టెక్ రంగం భావిస్తోంది.