Garmin Smartband : స్క్రీన్ లేని సరికొత్త స్మార్ట్‌బ్యాండ్.. కానీ ఫీచర్లు మాత్రం అదిరిపోయాయి!

Garmin Smartband : ప్రముఖ ఫిట్‌నెస్ డివైజెస్ తయారీ సంస్థ 'గార్మిన్' (Garmin) అంతర్జాతీయ మార్కెట్లలో 'గార్మిన్ సిర్కా' పేరిట ఒక సరికొత్త స్మార్ట్‌బ్యాండ్‌ను మంగళవారం అధికారికంగా ఆవిష్కరించింది. ఇటీవల మార్కెట్‌లోకి వచ్చిన గూగుల్ ఫిట్‌బిట్ ఎయిర్ , వూప్ 4.0 డివైజ్‌లకు గట్టి పోటీగా దీనిని డిజైన్ చేశారు. స్క్రీన్ లేని వినూత్న డిజైన్‌తో పూర్తిస్థాయి నిరంతర హెల్త్ ట్రాకింగ్ కోసం రూపొందించిన ఈ బ్యాండ్ ద్వారా, వినియోగదారులు తమ ఫిట్‌నెస్ సమాచారాన్ని కనెక్ట్ చేసిన స్మార్ట్‌ఫోన్ యాప్‌లో నేరుగా వీక్షించవచ్చు.

ధర, లభ్యత , విభిన్న రంగులు

అమెరికా మార్కెట్‌లో గార్మిన్ సిర్కా ప్రారంభ ధర $199.99 (భారత కరెన్సీలో సుమారు రూ. 19,000) గా నిర్ణయించారు. ఈ స్మార్ట్‌బ్యాండ్ జులై 24 నుంచి గార్మిన్ అధికారిక ఆన్‌లైన్ స్టోర్ ద్వారా ఎంపిక చేసిన అంతర్జాతీయ మార్కెట్లలో అందుబాటులోకి రానుంది. యూజర్ల మణికట్టు పరిమాణానికి తగినట్లుగా ఇది 'S - M' , 'L - XL' పరిమాణాల్లో లభిస్తుంది. అలాగే దీనికి ఉపయోగించిన ప్రీమియం ఫ్యాబ్రిక్ బ్యాండ్‌ను మణికట్టుకు లేదా ఆర్మ్‌బ్యాండ్‌గా ధరించే వెసులుబాటు ఉంది. ఇది బ్లాక్, కెప్టెన్ బ్లూ, సిట్రాన్ గ్రే, డార్క్ ఆలివ్, ఫ్రెంచ్ గ్రే, ఫ్రెంచ్ బ్లూ , మావ్ వంటి ఏడు ఆకర్షణీయమైన రంగుల్లో వినియోగదారులను ఆకట్టుకుంటోంది.

డిస్‌ప్లే లేని వినూత్న డిజైన్ – ఆటోమాటిక్ ట్రాకింగ్

గార్మిన్ సిర్కా ప్రధాన ప్రత్యేకత దీని స్క్రీన్-లెస్ డిజైన్. డిస్‌ప్లే లేకపోవడం వల్ల తరచుగా వచ్చే నోటిఫికేషన్లు, డిస్ట్రాక్షన్స్ ఉండవని కంపెనీ వెల్లడించింది. ఆండ్రాయిడ్ , ఐఫోన్ రెండింటికీ సపోర్ట్ చేసే ఈ డివైజ్, యూజర్లు చేసే శారీరక కార్యకలాపాలను స్వయంచాలకంగా గుర్తించి రికార్డ్ చేస్తుంది. ఈ డేటాను 'గార్మిన్ కనెక్ట్' యాప్‌లో చూసుకోవడమే కాకుండా, అవసరమైతే ఎడిట్ చేసుకునే సదుపాయం కూడా ఉంది. కాలక్రమేణా ఇది వినియోగదారుడి అలవాట్లను అర్థం చేసుకుని భవిష్యత్తులో మరింత ఖచ్చితమైన సమాచారాన్ని అందిస్తుంది.

80కి పైగా వర్కౌట్ మోడ్స్ & అడ్వాన్స్డ్ ఫిట్‌నెస్ మెట్రిక్స్

ఈ స్మార్ట్‌బ్యాండ్‌లో రన్నింగ్, వాకింగ్, యోగాతో సహా 80కి పైగా విభిన్న కార్యకలాపాలను మ్యాన్యువల్‌గా ట్రాక్ చేయవచ్చు. బ్యాండ్ పక్కన ఉండే బటన్‌ను ప్రెస్ చేయడం ద్వారా ముందే సెట్ చేసిన యాక్టివిటీలను సులభంగా ఎంచుకోవచ్చు. వర్కౌట్ చేసేవారికి ఎంతగానో ఉపయోగపడే ట్రైనింగ్ రెడీనెస్, HRV స్టేటస్, VO2 మ్యాక్స్ , ట్రైనింగ్ స్టేటస్ వంటి అధునాతన ఫిట్‌నెస్ మెట్రిక్స్‌ను ఇది అత్యంత ఖచ్చితత్వంతో లెక్కిస్తుంది.

సుదీర్ఘమైన బ్యాటరీ లైఫ్ , హెల్త్ ఫీచర్లు

గార్మిన్ సిర్కా ఒక్కసారి ఛార్జ్ చేస్తే నిరంతర హెల్త్ అండ్ ఫిట్‌నెస్ ట్రాకింగ్‌తో ఏకంగా 10 రోజుల వరకు బ్యాటరీ లైఫ్ ఇస్తుంది. ఇందులో కనెక్టెడ్ GPS ఫంక్షనాలిటీతో పాటు 'లైవ్‌ట్రాక్' లోకేషన్ షేరింగ్ ఫీచర్ కూడా ఉంది. ఆరోగ్య పర్యవేక్షణ కోసం SpO2 సెన్సార్ ద్వారా రక్తం లోని ఆక్సిజన్ శాతాన్ని నిరంతరం ట్రాక్ చేయవచ్చు. వీటితో పాటు హార్ట్ రేట్ మానిటరింగ్, అసాధారణ హార్ట్ రేట్ అలర్ట్‌లు, శ్వాసక్రియ రేటు, ఫిట్‌నెస్ ఏజ్, బాడీ బ్యాటరీ ఎనర్జీ, స్ట్రెస్ ట్రాకింగ్, స్లీప్ ట్రాకింగ్ , మహిళల ప్రత్యేక ఆరోగ్య ట్రాకింగ్ వంటి ఆధునిక ఫీచర్లు ఇందులో పొందుపరిచారు.