Gen Z: మనుషుల కంటే ఏఐతోనే జెన్ జీ స్నేహం.. అసలు కారణం ఇదేనంట..?
Gen Z: ప్రస్తుతం యువత జీవితంలో AI వినియోగం రోజురోజుకూ పెరుగుతోంది. చదువు, ఉద్యోగం, సమాచారం సేకరించడం వంటి అవసరాలతో పాటు తమ భావాలను పంచుకోవడానికి కూడా కొందరు AIని ఉపయోగిస్తున్నారు.
Gen Z: మనుషుల కంటే ఏఐతోనే జెన్ జీ స్నేహం.. అసలు కారణం ఇదేనంట..?
Gen Z: టెక్నాలజీ వేగంగా అభివృద్ధి చెందుతున్న ఈ రోజుల్లో యువత జీవనశైలిలో ఆర్టిఫిషియల్ ఇంటెలిజెన్స్ (AI) కీలకంగా మారుతోంది. చదువు, ఉద్యోగం, రోజువారీ సందేహాలకు సమాధానాలు తెలుసుకోవడం మాత్రమే కాదు.. ఒంటరితనాన్ని దూరం చేసుకోవడానికి కూడా కొందరు యువత AI చాట్బాట్లను ఆశ్రయిస్తున్నారు. ఏకంగా స్నేహితుడిలా AIతో మాట్లాడుతున్నట్లు ఓ అధ్యయనంలో వెల్లడైంది. గ్యాలప్ నిర్వహించిన పరిశోధనలో 33 శాతం మంది యువత AIని తోడుగా భావిస్తున్నట్లు తేలింది. అయితే AIతో స్నేహం చేయడం నిజంగానే ఒంటరితనాన్ని తగ్గిస్తుందా? ఈ అధ్యయనంలో వెల్లడైన ఆసక్తికర విషయాలేంటో తెలుసుకుందాం.
ప్రస్తుతం యువత జీవితంలో AI వినియోగం రోజురోజుకూ పెరుగుతోంది. చదువు, ఉద్యోగం, సమాచారం సేకరించడం వంటి అవసరాలతో పాటు తమ భావాలను పంచుకోవడానికి కూడా కొందరు AIని ఉపయోగిస్తున్నారు. గ్యాలప్ అధ్యయనం ప్రకారం.. 82 శాతానికి పైగా యువత సమాచారం తెలుసుకోవడానికి AIని ఉపయోగిస్తున్నారు. 68 శాతం మంది సలహాలు, సూచనలు పొందడానికి వినియోగిస్తుండగా.. 33 శాతం మంది AIని ఒక తోడుగా, స్నేహితుడిగా భావిస్తూ మాట్లాడుతున్నారు.
ఒక్కో దేశంలో AI వినియోగం ఒక్కోలా..
ప్రపంచంలోని వివిధ దేశాల్లో యువత AI వినియోగంలో తేడాలు ఉన్నట్లు అధ్యయనంలో వెల్లడైంది.
- అమెరికా, కెనడా, బ్రిటన్ దేశాల్లో 20 శాతం మంది యువత రోజుకు కనీసం ఒక్కసారైనా AIని ఉపయోగిస్తున్నారు.
- బ్రెజిల్లో ఈ సంఖ్య 40 శాతంగా ఉంది.
- జపాన్, ఇటలీలో 35 శాతం మంది యువత రోజూ AIని వినియోగిస్తున్నారు.
అయితే అమెరికా, బ్రిటన్, కెనడాల్లో దాదాపు సగం మంది యువత గత నెలలో AIని అసలు ఉపయోగించలేదని లేదా చాలా తక్కువసార్లు మాత్రమే ఉపయోగించారని అధ్యయనం తెలిపింది.
AIతో స్నేహం విషయంలో యువత అభిప్రాయాలు ఎలా ఉన్నాయి?
AIని స్నేహితుడిగా భావించడంపై వివిధ దేశాల్లోని యువత అభిప్రాయాలు భిన్నంగా ఉన్నాయి. ఆస్ట్రేలియాలో దాదాపు సగం మంది యువత AIతో స్నేహాన్ని మంచి సంబంధంగా అభివర్ణించారు. పోలాండ్లో మాత్రం ఇలా భావించిన వారి సంఖ్య కేవలం 12 శాతమే. చాలా దేశాల్లో యువత AIతో స్నేహాన్ని సాధారణ సంబంధంగా పరిగణించినట్లు అధ్యయనం వెల్లడించింది.
AIతో మాట్లాడేవారిలో ఒంటరితనం ఎక్కువా?
AIని స్నేహితుడిగా ఉపయోగించే యువతలో ఒంటరితనం ఎక్కువగా కనిపించినట్లు పరిశోధకులు గుర్తించారు. అయితే దీనికి కచ్చితమైన కారణం ఏమిటనేది స్పష్టంగా తెలియలేదు.
ఒంటరితనం కారణంగా యువత AIతో మాట్లాడుతున్నారా? లేదా AI వినియోగం వారి సామాజిక జీవితంపై ప్రభావం చూపుతోందా? అనే విషయాలను ఈ అధ్యయనం నిర్ధారించలేదు. దీనిపై మరింత పరిశోధన అవసరమని పరిశోధకులు అభిప్రాయపడ్డారు.
సోషల్ మీడియా స్క్రోలింగ్లోనే ఎక్కువ సమయం
Gen Z యువతలో సోషల్ మీడియా వినియోగం కూడా ఎక్కువగా ఉన్నట్లు అధ్యయనంలో వెల్లడైంది.
- 72 శాతం మంది టిక్టాక్, ఇన్స్టాగ్రామ్ వంటి ప్లాట్ఫామ్లలో షార్ట్ వీడియోలు, ఇతర కంటెంట్ను స్క్రోల్ చేస్తూ సమయం గడుపుతున్నారు.
- ప్రతి 10 మందిలో ఆరుగురు ఒంటరిగా ఉన్నప్పుడు సోషల్ మీడియా కంటెంట్ను స్క్రోల్ చేస్తున్నట్లు తెలిపారు.
అయితే సోషల్ మీడియాలో సమయం గడపడం, ఇతర వ్యక్తులతో ప్రత్యక్షంగా సమయం గడపడం.. ఈ రెండు మార్గాలు యువతకు దాదాపు సమాన స్థాయిలో సహాయపడినట్లు పరిశోధకులు గుర్తించారు.
ముఖాముఖి స్నేహాలతో ఒంటరితనం దూరం..
ఈ అధ్యయనంలో మరో ఆసక్తికరమైన విషయం వెలుగులోకి వచ్చింది. నిజ జీవితంలో మంచి స్నేహితులు ఉన్న యువతలో ఒంటరితనం తక్కువగా కనిపించింది. అదే ఆన్లైన్లో మాత్రమే స్నేహితులు ఉన్నవారిలో స్నేహం ఎంత బాగున్నప్పటికీ ఒంటరితనంలో పెద్దగా మార్పు కనిపించలేదు.
అపరిచితులతో లేదా ఆన్లైన్ స్నేహితులతో ఎక్కువగా మాట్లాడే యువతలో ఒంటరితనం ఎక్కువగా ఉన్నట్లు పరిశోధకులు గుర్తించారు. దీనిని బట్టి ప్రత్యక్షంగా కలుసుకుని మాట్లాడే స్నేహాలకు ప్రత్యేక ప్రాధాన్యత ఉందని తెలుస్తోంది.
కుటుంబం బయట కూడా నమ్మకమైన వ్యక్తులు అవసరం..
యువత జీవితంలో కుటుంబ సభ్యులతో పాటు నమ్మకంగా మాట్లాడగలిగే ఇతర పెద్దలు కూడా ఉండటం ముఖ్యమని పరిశోధన సూచిస్తోంది.
తమ జీవితంలో నమ్మకంగా మాట్లాడగలిగే పెద్ద వ్యక్తి ఎవరూ లేరని చెప్పిన యువతపై పరిశోధకులు ప్రత్యేకంగా దృష్టి పెట్టారు. ఎలాంటి స్నేహాలు లేని యువతకు కుటుంబం బయట కూడా నమ్మదగిన పెద్ద వ్యక్తి లేరని గుర్తించారు.
యువత వయసు, లింగం, నివసించే ప్రాంతం, తల్లిదండ్రులతో సంబంధాలు వంటి అంశాలను పరిగణనలోకి తీసుకున్నప్పటికీ ఈ విషయం కనిపించినట్లు అధ్యయనం వెల్లడించింది.
AI స్నేహం కంటే నిజమైన మనుషులతో సంబంధాలే ముఖ్యం!
AIతో మాట్లాడటం కొంతమంది యువతకు మానసికంగా తోడుగా అనిపించవచ్చు. తమ ఆలోచనలు, భావాలను పంచుకోవడానికి ఒక అవకాశం లభించవచ్చు. అయితే AI ఇచ్చే తోడును నిజమైన మానవ సంబంధాలతో పోల్చలేం.
స్నేహం మంచిదా, చెడ్డదా అనేది దాని నాణ్యతపై ఆధారపడి ఉంటుందని పరిశోధకులు పేర్కొన్నారు. ముఖ్యంగా యువత చుట్టూ ఉండే సామాజిక వాతావరణం, వారికి అందుబాటులో ఉండే నమ్మకమైన వ్యక్తులు కీలకమని అధ్యయనం సూచిస్తోంది.
మొత్తంగా చూస్తే.. AI యువత జీవితంలో ఒక భాగంగా మారుతున్నప్పటికీ నిజమైన స్నేహాలు, కుటుంబ బంధాలు, ప్రత్యక్షంగా కలుసుకుని మాట్లాడే సంబంధాల ప్రాధాన్యత తగ్గలేదు. AIని మనుషుల స్నేహానికి ప్రత్యామ్నాయంగా కాకుండా అవసరమైనప్పుడు ఉపయోగపడే సాధనంగా చూడటం మంచిది.




