వామ్మో.. 3.2 కోట్ల దోమలను ప్రకృతిలోకి వదలనున్న గూగుల్.. అసలు సీక్రెట్ ఏంటో తెలుసా?

Google Mosquito Project: ప్రపంచవ్యాప్తంగా ప్రతి ఏటా లక్షలాది మంది ప్రాణాలను బలితీసుకుంటున్న భయంకరమైన శత్రువు 'దోమ'. డెంగ్యూ, మలేరియా, చికెన్‌గున్యా వంటి ప్రాణాంతక వ్యాధులతో మానవాళిని పీడిస్తున్న ఈ కీటకాల అంతానికి ప్రముఖ సాంకేతిక దిగ్గజం గూగుల్ ఒక సంచలన వ్యూహాన్ని సిద్ధం చేసింది. వినడానికి వింతగా ఉన్నా.. ఏకంగా 3.2 కోట్ల దోమలను ప్రకృతిలోకి వదిలిపెట్టేందుకు అమెరికా ప్రభుత్వ అనుమతి కోసం వేచి చూస్తోంది.

దోమల నిర్మూలనకు గూగుల్ 'మెగా ప్లాన్'..

సాధారణంగా దోమలంటేనే మనం ఆమడ దూరం పారిపోతాం. అలాంటిది కోట్ల సంఖ్యలో దోమలను ల్యాబ్‌లలో పెంచి మరీ జనావాసాల్లోకి వదలడం ఏంటని ఆశ్చర్యపోతున్నారా? దీని వెనుక శాస్త్రవేత్తల దశాబ్దాల కష్టం దాగి ఉంది. గూగుల్ సంస్థ 2014 నుంచే 'డీబగ్' (Debug) అనే ప్రత్యేక ప్రాజెక్టుపై పరిశోధనలు చేస్తోంది. ఫ్లోరిడా, కాలిఫోర్నియాలోని అత్యాధునిక ప్రయోగశాలల్లో శాస్త్రవేత్తలు సుమారు 3.2 కోట్ల మగ దోమలను ప్రత్యేకంగా పెంచారు. ఈ మగ దోమల ద్వారానే ప్రపంచంలో దోమల సంతతిని పూర్తిగా నియంత్రించవచ్చని వారు బలంగా నమ్ముతున్నారు.

బ్యాక్టీరియాతో వింత ప్రయోగం.. అసలు కథ ఇదే!

ఈ ప్రాజెక్టు విజయవంతం కావడం కోసం గూగుల్ శాస్త్రవేత్తలు ఒక వినూత్న ప్రయోగాన్ని చేపట్టారు. ప్రయోగశాలలో పెంచిన మగ దోమలకు 'వోల్బాచియా పిపియెంటిస్' (Wolbachia pipientis) అనే ప్రత్యేకమైన బ్యాక్టీరియాను ఎక్కిస్తారు. ఈ బ్యాక్టీరియా సోకిన మగ దోమలు, బయట తిరిగే ఆడ దోమలతో సంపర్కం జరిపినప్పుడు.. వాటి కలయిక వల్ల పుట్టే గుడ్లు అస్సలు పొదగవు. అంటే ఆ గుడ్ల నుంచి కొత్త దోమలు పుట్టవు. ఫలితంగా కాలక్రమేణా దోమల సంఖ్య గణనీయంగా తగ్గిపోతుంది. తద్వారా దోమల వల్ల వ్యాపించే ప్రమాదకర వైరస్‌లకు శాశ్వతంగా అడ్డుకట్ట వేయవచ్చని శాస్త్రవేత్తలు వివరిస్తున్నారు.

రెండు దశల్లో అమలు.. మనుషులకు కుడతాయా?

ఈ బృహత్తర ప్రణాళికను రెండు విడతల్లో అమలు చేయడానికి గూగుల్ ప్రణాళికలు రచిస్తోంది. మొదటి ఏడాదిలో భాగంగా ఫ్లోరిడా, కాలిఫోర్నియా ల్యాబ్‌ల నుంచి 1.6 కోట్ల మగ దోమలను వదులుతారు. రెండో ఏడాదిలో మిగిలిన 1.6 కోట్ల దోమలను ప్రకృతిలోకి విడుదల చేస్తారు. అయితే ఇన్ని కోట్ల దోమలను వదిలితే మనుషులను కుట్టి మరింత రక్తాన్ని పీల్చేయవా? అనే అనుమానం రావడం సహజం. దీనిపై శాస్త్రవేత్తలు స్పష్టత ఇస్తూ.. మనుషులను కుట్టి రక్తం తాగేవి కేవలం ఆడ దోమలు మాత్రమేనని, తాము విడుదల చేసేది కేవలం మగ దోమలనే కాబట్టి జనాభా పెరిగే అవకాశం అస్సలు లేదని భరోసా ఇస్తున్నారు.

ఐదు నెలలుగా పెండింగ్‌లో అనుమతులు..

ఈ విప్లవాత్మక ప్రయోగాన్ని ప్రారంభించేందుకు గూగుల్ గతేడాది డిసెంబర్ 2025లోనే అమెరికా పర్యావరణ పరిరక్షణ సంస్థకు దరఖాస్తు చేసుకుంది. అయితే గత ఐదు నెలలుగా అమెరికా ప్రభుత్వం దీనిపై ఎలాంటి తుది నిర్ణయం తీసుకోకుండా తర్జనభర్జన పడుతోంది. ఈ ప్రయోగం ఎక్కడ, ఎప్పుడు ప్రారంభమవుతుందనే దానిపై ఇంకా స్పష్టత రాలేదు. మరోవైపు, ఈ ప్రాజెక్టు గనుక విఫలమైతే ఇప్పటికే దోమల సమస్యతో సతమతమవుతున్న ప్రజల పరిస్థితి మరింత ఘోరంగా మారుతుందేమోనని కొందరు నిపుణులు ఆందోళన వ్యక్తం చేస్తున్నారు. కానీ గూగుల్ మాత్రం తమ ప్రయోగం 100 శాతం సురక్షితమైనదని నమ్మకంగా చెబుతోంది.

టెక్నాలజీ రంగంలోనే కాకుండా మానవాళి ఆరోగ్యాన్ని కాపాడటంలో కూడా తాము ముందుంటామని గూగుల్ ఈ ప్రాజెక్టు ద్వారా నిరూపిస్తోంది. పర్యావరణ సమతుల్యత దెబ్బతినకుండా, రసాయన మందులు వాడకుండా దోమలను అంతం చేసే ఈ వినూత్న ప్రయత్నం గనుక విజయవంతమైతే, భవిష్యత్తులో ప్రపంచం డెంగ్యూ, మలేరియా రహిత సమాజంగా మారే అవకాశం ఉంది.