AI Fashion Tool : పాత ఫొటోలే ఫ్యాషన్ గైడ్.. గూగుల్ AI అదిరింది.!

AI Fashion Tool : మనం రోజూ ఉదయాన్నే ఆఫీసుకో, కాలేజీకో , ఏదైనా ఫంక్షన్‌కో వెళ్లాల్సి వచ్చినప్పుడు 'ఏ బట్టలు వేసుకోవాలి?' అని తలలు పట్టుకోవడం కామన్‌. ఈ రోజువారీ సమస్యకు చెక్ పెడుతూ ప్రముఖ టెక్ దిగ్గజం గూగుల్ తన 'గూగుల్ ఫొటోస్' (Google Photos) యాప్‌లో సరికొత్త ఆర్టిఫిషియల్ ఇంటెలిజెన్స్ (AI) ఫీచర్‌ను పరిచయం చేసింది. అదే “డిజిటల్ వార్డ్‌రోబ్” (Digital Wardrobe). మనం గతంలో దిగిన ఫొటోల ఆధారంగా మన దగ్గర ఎలాంటి బట్టలు ఉన్నాయో ఈ ఫీచర్ ఆటోమేటిక్‌గా ఒక లిస్ట్‌ను తయారు చేస్తుంది. మన బట్టల అల్మారాను మన స్మార్ట్‌ఫోన్ స్క్రీన్‌పైకి తెచ్చే ఈ సరికొత్త అప్‌డేట్, రాబోయే ఎండాకాలంలో ఆండ్రాయిడ్ వినియోగదారులకు మొదటిగా అందుబాటులోకి రానుంది.

డిజిటల్ వార్డ్‌రోబ్ ప్రత్యేకతలు ఇవే

ఈ సరికొత్త ఏఐ ఫీచర్ మీ గూగుల్ ఫొటోస్ లైబ్రరీ మొత్తాన్ని క్షుణ్ణంగా స్కాన్ చేస్తుంది. మీరు గతంలో వేర్వేరు సందర్భాల్లో వేసుకున్న దుస్తులను గుర్తించి, వాటన్నింటినీ ఒక ప్రత్యేకమైన వార్డ్‌రోబ్ కలెక్షన్‌గా మారుస్తుంది. ఇందులో బట్టలను కేటగిరీల వారీగా ఫిల్టర్ చేసుకునే సదుపాయం కూడా ఉంది. అంటే మీరు కేవలం టాప్స్, బాటమ్స్, జ్యువెలరీ ఇతర యాక్సెసరీలను విడివిడిగా బ్రౌజ్ చేయవచ్చు. అయితే.. దీనివల్ల మీ అల్మారాలో ఉండిపోయి, మీరు ఎప్పుడో మరిచిపోయిన పాత దుస్తులను సైతం సులువుగా గుర్తుచేసుకోవచ్చు.

బట్టలు వేసుకోకుండానే ట్రై-ఆన్ ప్రివ్యూ

ఈ ఫీచర్‌లో అత్యంత ఆకర్షణీయమైన భాగం ఏమిటంటే, దుస్తులను ఒకదానితో ఒకటి కలిపి మ్యాచ్ చేసుకోవడం. ఆఫీస్ వర్క్, ట్రావెలింగ్, పెళ్లిళ్లు, క్యాజువల్ మీటింగ్స్ కోసం ఏ బట్టలు బాగుంటాయో డిజిటల్ మూడ్‌బోర్డ్‌లను క్రియేట్ చేసుకోవచ్చు. ఇంకా అద్భుతమైన విషయం ఏంటంటే, ఇందులో 'వర్చువల్ ట్రై-ఆన్' (Virtual try-on) ఆప్షన్ ఉంది. అంటే మీరు ఎంచుకున్న ప్యాంట్, షర్ట్.. వేరే ఏదైనా కాంబినేషన్ ఒకదానికొకటి ఎలా సెట్ అవుతాయో బట్టలు మార్చుకోకుండానే స్క్రీన్‌పై ముందుగానే ప్రివ్యూ చూసుకోవచ్చు. దీనివల్ల ఏ దుస్తులు వేసుకోవాలో తేల్చుకోవడం చాలా సరదాగా, సులువుగా మారుతుంది.

ఈ డిజిటల్ అల్మారాను వాడటం ఎలా?

ఈ సరికొత్త ఏఐ ఆధారిత ఫీచర్‌ను ఉపయోగించుకోవడం చాలా సులభం. దీనికోసం ముందుగా మీ మొబైల్‌లోని గూగుల్ ఫొటోస్ యాప్‌ను లేటెస్ట్ వెర్షన్‌కి అప్‌డేట్ చేసుకోవాల్సి ఉంటుంది. యాప్ ఓపెన్ చేయగానే ఏఐ ద్వారా ఆటోమేటిక్‌గా క్రియేట్ అయిన వార్డ్‌రోబ్ కలెక్షన్ మీకు కనిపిస్తుంది. అయితే.. అందులోకి వెళ్లి టాప్స్, బాటమ్స్, షూస్ వంటి విభిన్న కేటగిరీలను బ్రౌజ్ చేయవచ్చు. అక్కడ మీకు నచ్చిన దుస్తులను సెలెక్ట్ చేసుకొని, వర్చువల్ ట్రై-ఆన్ ద్వారా అవి ఒకదానికొకటి ఎలా మ్యాచ్ అవుతున్నాయో చెక్ చేసుకోవచ్చు. చివరగా మీకు నచ్చిన కాంబినేషన్లను వేర్వేరు సందర్భాల కోసం మూడ్‌బోర్డ్‌లలో సేవ్ చేసుకొని భద్రపరుచుకోవచ్చు. మీ స్టైల్ ఎంపికలను మార్చేయబోతున్న ఈ ఫీచర్ త్వరలోనే అందరికీ అందుబాటులోకి రానుంది.