ప్రతి ఫోటోను పంపాల్సిన పనిలేదు.. Google Photosలో ఈ సెట్టింగ్ ఆన్ చేస్తే చాలు.!

Google Photos : ఈ రోజుల్లో ప్రతి ఒక్కరూ తమ స్మార్ట్‌ఫోన్‌లలో ప్రత్యేక క్షణాలను ఫోటోలుగా బంధిస్తున్నారు. అయితే ఆ ఫోటోలను కుటుంబ సభ్యులతో, స్నేహితులతో పంచుకోవడం చాలా మందికి పెద్ద పనిగా మారుతుంది. ఒకే ఫోటోను వేర్వేరు వ్యక్తులకు పదే పదే పంపడం వల్ల సమయం వృధా అవ్వడమే కాకుండా, కొన్నిసార్లు ముఖ్యమైన ఫోటోలు పంపడం మరిచిపోతుంటాము. ఈ సమస్యకు గూగుల్ ఫోటోస్ (Google Photos) లోని ‘పార్ట్‌నర్ షేరింగ్’ (Partner Sharing) ఫీచర్ అద్భుతమైన పరిష్కారాన్ని అందిస్తోంది. ఈ ఫీచర్ ద్వారా మనకు నమ్మకమైన వ్యక్తితో ఫోటోలను ఆటోమేటిక్‌గా షేర్ చేసుకోవచ్చు, దీనివల్ల ఫోటోలు పంపే ప్రక్రియ చాలా సులభంగా, వేగంగా మారుతుంది.

గూగుల్ ఫోటోస్ పార్ట్‌నర్ షేరింగ్ ఫీచర్ అంటే ఏమిటి?

క్రమం తప్పకుండా తమ కుటుంబ సభ్యులతో, అత్యంత ఆప్తులతో ఫోటోలను పంచుకునే వారికి గూగుల్ ఫోటోస్ పార్ట్‌నర్ షేరింగ్ ఫీచర్ ఎంతో ఉపయోగపడుతుంది. ఈ ఫీచర్ ద్వారా యూజర్లు తమకు నమ్మకమైన ఒక వ్యక్తిని పార్ట్‌నర్‌గా యాడ్ చేసుకోవచ్చు. అలా యాడ్ చేసిన తర్వాత ఫోన్‌లో సేవ్ అయ్యే కొత్త ఫోటోలు ఆటోమేటిక్‌గా ఆ వ్యక్తితో షేర్ అవుతూ ఉంటాయి. కుటుంబ వేడుకలు, హాలీడేస్ , రోజువారీ ఫోటోలు ఇలా ఏవైనా సరే, ప్రతిసారీ మాన్యువల్‌గా సెలెక్ట్ చేసి పంపాల్సిన అవసరం ఉండదు. ముఖ్యంగా భార్యాభర్తలు, తోబుట్టువులు, అత్యంత సన్నిహిత కుటుంబ సభ్యుల మధ్య ఫోటోలను పంచుకోవడానికి ఇది ఒక చక్కని మార్గం.

ఈ ఫీచర్‌ను ఎలా ఆన్ చేయాలి?

గూగుల్ ఫోటోస్ పార్ట్‌నర్ షేరింగ్ ఫీచర్‌ను ఆన్ చేయడం చాలా సులభం. దీనికోసం ముందుగా మీ స్మార్ట్‌ఫోన్‌లో గూగుల్ ఫోటోస్ యాప్ ఓపెన్ చేయాలి. ఆ తర్వాత స్క్రీన్ పైభాగంలో కుడివైపున కనిపించే మీ ప్రొఫైల్ ఐకాన్‌పై ట్యాప్ చేసి, 'ఫోటో సెట్టింగ్స్' (Photo Settings) లోకి వెళ్లాలి. అక్కడ కనిపించే 'షేరింగ్' (Sharing) ఆప్షన్‌ను ఎంచుకుని, 'పార్ట్‌నర్ షేరింగ్' (Partner Sharing) పై క్లిక్ చేయాలి. అనంతరం 'గెట్ స్టార్టెడ్' , 'స్టార్ట్' బటన్‌పై ట్యాప్ చేసి, మీరు ఎవరితోనైతే ఫోటోలు షేర్ చేయాలనుకుంటున్నారో వారి గూగుల్ అకౌంట్ (Gmail ID) ను సెలెక్ట్ చేసుకోవాలి.

ఇక్కడ మీ గ్యాలరీలోని అన్ని ఫోటోలను షేర్ చేయాలా, లేదా కేవలం ఒక నిర్దిష్ట వ్యక్తి ఉన్న ఫోటోలను మాత్రమే పంపాలా, లేదా ఏదైనా ఒక నిర్దిష్ట తేదీ తర్వాత దిగిన ఫోటోలను మాత్రమే షేర్ చేయాలా అనేది మీరే స్వయంగా నిర్ణయించుకోవచ్చు. ఈ సెట్టింగ్స్ అన్నీ పూర్తయిన తర్వాత 'నెక్స్ట్' పై క్లిక్ చేసి, చివరగా 'సెండ్ ఇన్విటేషన్' (Send Invitation) పై ట్యాప్ చేయాలి. అవతలి వ్యక్తి మీ ఇన్విటేషన్‌ను యాక్సెప్ట్ చేయగానే మీరు సెట్ చేసిన ఫోటోలు ఆటోమేటిక్‌గా వారికి చేరిపోతాయి.

ప్రైవసీ విషయంలో జాగ్రత్తలు తప్పనిసరి

పార్ట్‌నర్ షేరింగ్ ఫీచర్ ఎంత సౌకర్యవంతంగా ఉన్నప్పటికీ, దీనిని ఉపయోగించేటప్పుడు ప్రైవసీ (వ్యక్తిగత భద్రత) విషయంలో చాలా జాగ్రత్తగా ఉండాలి. ఈ ఫీచర్ ఆన్ చేసినప్పుడు మీ ప్రమేయం లేకుండానే ఫోటోలు ఆటోమేటిక్‌గా షేర్ అవుతాయి కాబట్టి, కేవలం వంద శాతం నమ్మకమైన వ్యక్తులను మాత్రమే పార్ట్‌నర్‌గా ఎంచుకోవాలి. ఇన్విటేషన్ పంపే ముందే ఏ ఫోటోలు షేర్ అవుతున్నాయనే విషయాన్ని ఒకటికి రెండుసార్లు సెట్టింగ్స్‌లో తనిఖీ చేసుకోవడం మంచిది. అలాగే మీ వ్యక్తిగత ఫోటోలు ఇతరులకు వెళ్లకుండా ఉండటానికి, సమయానుకూలంగా ఈ షేరింగ్ సెట్టింగ్స్‌ను రివ్యూ చేసుకుంటూ ఉండాలి. కాస్త జాగ్రత్తగా ఉపయోగిస్తే ఈ ఫీచర్ సమయాన్ని ఆదా చేయడమే కాకుండా, ఫోటో షేరింగ్‌ను అత్యంత సురక్షితంగా , సులువుగా మారుస్తుంది.