Google Workspace: మారుతున్న జీమెయిల్ రూపం..గూగుల్ వర్క్‌స్పేస్ యాప్‌లలో భారీ మార్పులు

Google App: గూగుల్ తన యూజర్లకు సరికొత్త విజువల్ అనుభూతిని అందించేందుకు సిద్ధమవుతోంది. మనం ప్రతిరోజూ ఉపయోగించే జీమెయిల్, డ్రైవ్, డాక్స్ వంటి వర్క్‌స్పేస్ యాప్‌ల రూపరేఖలు త్వరలో మారనున్నాయి. టెక్ ప్రపంచంలో వినిపిస్తున్న తాజా సమాచారం ప్రకారం, గూగుల్ తన ఐకాన్‌లను మరింత ఆకర్షణీయంగా, సులభంగా గుర్తించేలా తీర్చిదిద్దే పనిలో పడింది. ముఖ్యంగా గతంలో ఉన్న సంక్లిష్టమైన డిజైన్ల కంటే, ఇప్పుడు సరళతకు ,స్పష్టతకు పెద్దపీట వేస్తోంది.

ఈ మార్పులో ప్రధానంగా మనకు కనిపించేది రంగుల కలయిక. ఇప్పటి వరకు గూగుల్ తన ఐకాన్‌లలో ఎరుపు, పసుపు, పచ్చ, నీలం అనే నాలుగు రంగుల మిశ్రమాన్ని ఎక్కువగా వాడేది. అయితే, కొత్త డిజైన్ విధానంలో ఈ నాలుగు రంగుల వాడకాన్ని తగ్గించి, ఒక్కో యాప్‌నకు ఒక్కో ప్రత్యేకమైన గుర్తింపునిచ్చే రంగును ప్రాధాన్యతగా తీసుకోనున్నారు. ఇది వినియోగదారులు యాప్‌ల మధ్య గందరగోళానికి గురికాకుండా ఉండటానికి ఉపయోగపడుతుంది. సెర్చ్ ,మ్యాప్స్ వంటి యాప్‌లలో ఇప్పటికే మనం చూస్తున్న గ్రేడియంట్ స్టైల్, ఇప్పుడు మిగిలిన అన్ని వర్క్‌స్పేస్ యాప్‌లకు విస్తరించనుంది.

జీమెయిల్ విషయానికి వస్తే, ఆ ప్రసిద్ధ ఎన్వలప్ ఆకారంలోని 'M' అలాగే ఉన్నప్పటికీ, దాని అంచులు మరింత గుండ్రంగా మారుతాయి. ఇందులో ఎరుపు రంగు ప్రధానంగా కనిపిస్తుంది. అలాగే గూగుల్ డ్రైవ్ తన త్రిభుజాకారపు గుర్తింపును కాపాడుకుంటూనే, తన లోగో నుండి ఎరుపు రంగును వదిలించుకోనుంది. కేవలం ఆకుపచ్చ, పసుపు , నీలం రంగులతో ఇది కొత్తగా మెరవనుంది. డాక్స్, షీట్స్ ,స్లైడ్స్ వంటి యాప్‌లు కూడా తమ విభిన్న రంగులను కొనసాగిస్తూనే, మరింత స్పష్టమైన లేఅవుట్‌ను పొందనున్నాయి.

గూగుల్ మీట్ , చాట్ యాప్‌ల విషయంలో కూడా ఆసక్తికరమైన మార్పులు చోటుచేసుకోనున్నాయి. మీట్ ఐకాన్ పసుపు రంగులోకి, చాట్ ఐకాన్ ఆకుపచ్చ రంగులోకి మారే అవకాశం ఉంది. అలాగే క్యాలెండర్ ,టాస్క్స్ వంటి యాప్‌లు తమ పాత నీలం రంగు శైలిలోకి తిరిగి వెళ్లే సూచనలు కనిపిస్తున్నాయి. ఈ రీడిజైన్‌లో మరో ముఖ్యమైన మార్పు ఏమిటంటే, ఐకాన్‌ల వెనుక ఉండే ఆ పేజీ లేదా బ్యాక్‌గ్రౌండ్ కంటైనర్‌ను తొలగించడం. దీనివల్ల ఐకాన్‌లు పెద్దవిగా, స్క్రీన్‌పై మరింత స్పష్టంగా కనిపిస్తాయి.

ఈ విజువల్ అప్‌డేట్ వెనుక గూగుల్ కృత్రిమ మేధస్సు (AI) వ్యూహం కూడా దాగి ఉంది. తన ఉత్పత్తులలో AI ఫీచర్లు విడదీయలేని భాగంగా మారుతున్న తరుణంలో, ఆధునికతను ప్రతిబింబించేలా ఈ డిజైన్ మార్పులను గూగుల్ చేపడుతోంది. అయితే, ఈ సమాచారం ప్రస్తుతానికి ప్రాథమిక నివేదికల ఆధారంగానే ఉంది. గూగుల్ అధికారికంగా ప్రకటించినప్పుడు ఈ మార్పుల పూర్తి రూపం మనకు స్పష్టంగా తెలుస్తుంది. ఏదేమైనా, ఈ కొత్త మార్పులు మన డిజిటల్ పని వాతావరణాన్ని మరింత రంగులమయం చేస్తాయని చెప్పడంలో ఎటువంటి అనుమానం లేదు.