ప్రిజ్ నే హ్యాక్ చేసి ఓవెన్ లా మార్చేసిన కేటుగాళ్లు.. మీ ఇంట్లో ఏఐ డివైజ్ లు ఉంటే, ఇలా కాపాడుకోండి..!

Smart Refrigerator Hack: ఫ్రాన్స్‌లోని పలు సూపర్ మార్కెట్లలోని రిఫ్రిజరేషన్ సిస్టమ్‌లపై సైబర్ దాడి కలకలం రేపింది. హ్యాకర్లు పాత సాఫ్ట్‌వేర్‌లోని భద్రతా లోపాలను ఉపయోగించుకుని ఫ్రిజ్‌ల ఉష్ణోగ్రతను 50 డిగ్రీల సెల్సియస్ వరకు పెంచినట్లు ప్రాథమిక దర్యాప్తులో వెల్లడైంది. దీంతో లోపల నిల్వ చేసిన భారీ మొత్తంలో ఆహార పదార్థాలు పాడయ్యే పరిస్థితి ఏర్పడింది. ఈ ఘటన స్మార్ట్ ఎలక్ట్రానిక్ పరికరాలకు సెక్యూరిటీ అప్‌డేట్స్ ఎంత ముఖ్యమో మరోసారి గుర్తుచేస్తోంది.

ఫ్రాన్స్‌లో ఫ్రిజ్‌లపై సైబర్ దాడి..

స్మార్ట్ టెక్నాలజీ పెరిగేకొద్దీ ఇంటర్నెట్‌కు కనెక్ట్ అయ్యే ఎలక్ట్రానిక్ పరికరాల సంఖ్య కూడా పెరుగుతోంది. స్మార్ట్‌ఫోన్‌లు, టీవీలు, కంప్యూటర్లతో పాటు ఇప్పుడు రిఫ్రిజరేటర్లు, ఫ్రీజర్లు కూడా సాఫ్ట్‌వేర్ ఆధారంగా పనిచేస్తున్నాయి. ఫ్రాన్స్‌లోని కొన్ని సూపర్ మార్కెట్లలో రిఫ్రిజరేషన్ సిస్టమ్‌లను హ్యాకర్లు టార్గెట్ చేసినట్లు సమాచారం. దాడి తర్వాత కొన్ని ఫ్రీజర్ల ఉష్ణోగ్రత ఏకంగా 50 డిగ్రీల సెల్సియస్ వరకు పెరిగినట్లు ప్రాథమిక వివరాలు వెల్లడయ్యాయి.

దీంతో రాత్రి సమయంలోనే పెద్ద మొత్తంలో నిల్వ చేసిన వస్తువులు వేడికి గురై పాడయ్యే పరిస్థితి ఏర్పడింది. సాధారణంగా చల్లగా ఉంచాల్సిన ఫ్రిజ్ ఇలా వేడెక్కడం చూస్తే అవి దాదాపు ఓవెన్‌లా పనిచేసిన పరిస్థితి ఏర్పడిందని చెప్పొచ్చు.

పాత సాఫ్ట్‌వేర్‌నే టార్గెట్ చేశారా?

ఈ ఘటనపై ఫ్రాన్స్ సైబర్ సెక్యూరిటీ ఏజెన్సీ ఏన్ఎస్ఎస్ఐ దర్యాప్తు ప్రారంభించింది. ప్రాథమిక దర్యాప్తులో Danfoss ఇన్‌స్టాల్ చేసిన రిఫ్రిజరేషన్ కంట్రోలర్లలోని పాత, అప్‌డేట్ చేయని సాఫ్ట్‌వేర్‌లో ఉన్న భద్రతా లోపాలను హ్యాకర్లు ఉపయోగించుకున్నట్లు వెల్లడైనట్లు సమాచారం.

ఆ లోపాల ద్వారా హ్యాకర్లు రిఫ్రిజరేషన్ సిస్టమ్‌ను రిమోట్‌గా కంట్రోల్ చేయగలిగినట్లు ప్రాథమిక నివేదికలు సూచిస్తున్నాయి. ఆ తర్వాత ఫ్రిజ్‌ల ఉష్ణోగ్రతను పెంచినట్లు తెలుస్తోంది. అయితే దాడికి సంబంధించిన పూర్తి వివరాలు అధికారిక దర్యాప్తు పూర్తయ్యే వరకు స్పష్టంగా తెలియాల్సి ఉంది.

స్మార్ట్ ఫ్రిజ్‌లు, టీవీలు ఎలా హ్యాక్ అవుతాయి?

ఇప్పటి ఎలక్ట్రానిక్ పరికరాల్లో ఆపరేటింగ్ సిస్టమ్ లేదా కంట్రోల్ సాఫ్ట్‌వేర్ కీలక పాత్ర పోషిస్తుంది. స్మార్ట్‌ఫోన్‌లలో Android, iOS ఉన్నట్లే ఇతర కనెక్టెడ్ పరికరాల్లో కూడా తయారీదారులు ప్రత్యేక సాఫ్ట్‌వేర్‌ను ఉపయోగిస్తారు. కంపెనీలు కొత్త భద్రతా ముప్పులను గుర్తించినప్పుడు సాఫ్ట్‌వేర్‌లోని లోపాలను సరిచేసేందుకు సెక్యూరిటీ అప్డేట్స్ విడుదల చేస్తుంటాయి.

కానీ యూజర్లు లేదా సంస్థలు ఈ అప్‌డేట్స్‌ను నిర్లక్ష్యం చేస్తే పాత సాఫ్ట్‌వేర్‌లో ఉన్న భద్రతా లోపాలు అలాగే ఉండిపోతాయి. హ్యాకర్లు వాటిని ఉపయోగించుకుని డివైజ్‌లోని కంట్రోల్ సిస్టమ్‌ను చేరుకునే అవకాశం ఉంటుంది.

పాత సాఫ్ట్‌వేర్‌ను నిర్లక్ష్యం చేస్తే ప్రమాదమే..

చాలామంది ఫోన్, కంప్యూటర్ లేదా ఇతర స్మార్ట్ డివైజ్‌లలో అప్‌డేట్ నోటిఫికేషన్ వచ్చినప్పుడు తర్వాత చూద్దామంటూ వదిలేస్తుంటారు. కానీ సెక్యూరిటీ అప్‌డేట్స్‌లో కీలకమైన భద్రతా పరిష్కారాలు ఉండొచ్చు. పాత ఓఎస్ లేదా ఫర్మ్‌వేర్‌లో ఉన్న లోపాలను ఉపయోగించుకుని దాడి చేసేవారు పరికరంపై నియంత్రణ సాధించడానికి ప్రయత్నించవచ్చు. కొన్ని సందర్భాల్లో డివైజ్ పనితీరును మార్చడం, డేటాను యాక్సెస్ చేయడం లేదా కనెక్ట్ అయిన ఇతర సిస్టమ్‌లకు చేరుకోవడం కూడా సాధ్యమవుతుంది.

బలహీనమైన పాస్‌వర్డ్ కూడా ప్రమాదమే..

డివైజ్ సెక్యూరిటీలో పాస్‌వర్డ్ కూడా కీలకమైన అంశం. సులభంగా ఊహించగలిగే పాస్‌వర్డ్‌లు ఉపయోగిస్తే అకౌంట్లు లేదా క్లౌడ్ సేవలకు అనధికారిక యాక్సెస్ వచ్చే ప్రమాదం ఉంటుంది.

అందుకే ప్రతి ముఖ్యమైన అకౌంట్‌కు బలమైన, ప్రత్యేకమైన పాస్‌వర్డ్ ఉపయోగించడం మంచిది. వీలైన చోట టూ ఫ్యాక్టర్ అథంటికేషన్ (2FA) కూడా యాక్టివేట్ చేసుకోవాలి.

తెలియని Wi-Fiకి కనెక్ట్ చేయొద్దు..

పబ్లిక్ లేదా గుర్తు తెలియని Wi-Fi నెట్‌వర్క్‌లను ఉపయోగించేటప్పుడు కూడా జాగ్రత్త అవసరం. అనుమానాస్పద నెట్‌వర్క్‌కు స్మార్ట్‌ఫోన్ లేదా ఇతర కనెక్టెడ్ డివైజ్‌ను అనుసంధానిస్తే సైబర్ భద్రతా ప్రమాదాలు పెరగొచ్చు.

ఇంట్లోని స్మార్ట్ డివైజ్‌ల కోసం సురక్షితమైన Wi-Fi నెట్‌వర్క్ ఉపయోగించడం, రూటర్ ఫర్మ్‌వేర్‌ను అప్‌డేట్ చేయడం, అవసరం లేని రిమోట్ యాక్సెస్‌ను ఆఫ్ చేయడం వంటి చర్యలు ఉపయోగపడతాయి.

మీ ఫోన్, స్మార్ట్ డివైజ్‌లను ఎలా సేఫ్‌గా ఉంచాలి?

- OS, Firmware అప్‌డేట్స్‌ను ఆలస్యం చేయకుండా ఇన్‌స్టాల్ చేయండి.

- ప్రతి అకౌంట్‌కు ప్రత్యేకమైన బలమైన పాస్‌వర్డ్ ఉపయోగించండి.

- సాధ్యమైన చోట 2FA యాక్టివేట్ చేయండి.

- తెలియని Wi-Fi నెట్‌వర్క్‌లకు కనెక్ట్ కాకండి.

- డివైజ్‌కు అవసరం లేని రిమోట్ యాక్సస్ ఆఫ్ చేయండి.

- రూటర్, స్మార్ట్ హోమ్ పరికరాలను కూడా అప్‌డేట్ చేస్తూ ఉండండి.

- తయారీదారు అందించే సెక్యూరిటీ సూచనలను పాటించండి.

ఫ్రాన్స్‌లో జరిగిన ఈ ఘటన స్మార్ట్ టెక్నాలజీకి మరో ముఖ్యమైన అంశాన్ని గుర్తుచేస్తోంది. ఇంటర్నెట్‌కు కనెక్ట్ అయ్యే ఏ డివైజ్ అయినా సైబర్ భద్రతకు సంబంధించిన ప్రమాదాలను ఎదుర్కొనే అవకాశం ఉంటుంది. అందుకే ఫోన్‌కి మాత్రమే కాకుండా ఇంట్లోని స్మార్ట్ టీవీ, రూటర్, కెమెరా, ఫ్రిజ్ వంటి కనెక్టెడ్ పరికరాలకు కూడా సెక్యూరిటీ అప్‌డేట్స్ ఇవ్వడం చాలా ముఖ్యం.