గేమర్ల కోసం ఇన్ఫినిక్స్ కొత్త ఫోన్.. 12GB ర్యామ్, 6500mAh బ్యాటరీతోపాటు మరెన్నో ఫీచర్లు..!

Infinix GT 50 Pro: ఇన్ఫినిక్స్ భారత మార్కెట్లో తన కొత్త ప్రీమియం గేమింగ్ స్మార్ట్‌ఫోన్ ఇన్ఫినిక్స్ జీటీ 50 ప్రోను లాంచ్ చేసింది. గేమింగ్‌ను దృష్టిలో పెట్టుకుని ఈ ఫోన్‌లో ప్రత్యేకమైన హార్డ్‌వేర్, సాఫ్ట్‌వేర్ ఫీచర్లను అందించారు. ముఖ్యంగా ఫిజికల్ గేమింగ్ ట్రిగ్గర్లు, అడ్వాన్స్‌డ్ థర్మల్ మేనేజ్‌మెంట్, గేమింగ్ కోసం ఆప్టిమైజ్ చేసిన సాఫ్ట్‌వేర్ వంటి ఫీచర్లు ఉన్నాయి.

అల్టిమేట్ ప్రాసెసర్..

ఇన్ఫినిక్స్ జీటీ 50 ప్రోలో మీడియా టెక్ డైమెన్సిటీ 8400 అల్టిమేట్ 4nm చిప్‌సెట్‌ను ఉపయోగించారు. ఈ ప్రాసెసర్ గరిష్ఠంగా 3.25GHz క్లాక్ స్పీడ్‌తో పనిచేస్తుంది. గ్రాఫిక్స్ కోసం మాలి-G720 MC6 GPUను అందించారు. మెమరీ పరంగా 12GB LPDDR5X ర్యామ్, 256GB UFS 4.1 స్టోరేజ్ ఉన్నాయి. భారీ గేమ్స్, యాప్స్‌ను వేగంగా ఉపయోగించేందుకు ఈ హార్డ్‌వేర్‌ను రూపొందించారు. కనెక్టివిటీ కోసం కంపెనీ స్వయంగా అభివృద్ధి చేసిన N1 నెట్‌వర్క్ చిప్‌సెట్‌ను కూడా ఫోన్‌లో ఇచ్చింది.

కన్సోల్ తరహా గేమింగ్ కంట్రోల్స్..

గేమింగ్ విషయంలో ఇన్ఫినిక్స్ జీటీ 50 ప్రోలో ప్రత్యేకంగా ఓపెన్ కట్ ప్రెజర్ సెన్స్ జీటీ ట్రిగ్గర్ సిస్టం ఉంది. ఇందులో రెండు ప్రెజర్-సెన్సిటివ్ మెకానికల్ షోల్డర్ బటన్స్ ఉన్నాయి.

ఈ ట్రిగ్గర్లు డ్యూయల్-స్టేజ్ ప్రెజర్ సెన్సింగ్‌కు సపోర్ట్ చేస్తాయి. దీంతో లైట్, హెవీ, స్లైడింగ్ ఇన్‌పుట్స్‌ను ఉపయోగించుకోవచ్చు. గేమర్ల అవసరాలకు అనుగుణంగా ఈ బటన్లను కస్టమైజ్ చేసుకునే అవకాశం కూడా ఉంది.

144Hz 1.5K AMOLED డిస్‌ప్లే..

ఇన్ఫినిక్స్ జీటీ 50 ప్రోలో 6.78 ఇంచుల 1.5K AMOLED డిస్‌ప్లే ఉంది. దీనికి 144Hz రిఫ్రెష్ రేట్ అందించారు. వేగంగా కదిలే గేమ్స్, స్క్రోలింగ్ సమయంలో స్మూత్ విజువల్స్ కోసం ఈ రిఫ్రెష్ రేట్ ఉపయోగపడుతుంది. ఈ డిస్‌ప్లే గరిష్ఠంగా 4,500 nits పీక్ బ్రైట్‌నెస్‌ను అందిస్తుందని కంపెనీ తెలిపింది. దీంతో అవుట్‌డోర్‌లోనూ స్క్రీన్‌ను స్పష్టంగా చూడటానికి అవకాశం ఉంటుంది.

లిక్విడ్ కూలింగ్‌తో థర్మల్ మేనేజ్‌మెంట్..

గేమింగ్ సమయంలో ఫోన్ వేడెక్కకుండా ఇన్ఫినిక్స్ ప్రత్యేకమైన హైడ్రా ఫ్లో లిక్విడ్ కూలింగ్ ఆర్కిటెక్చర్ ను ఉపయోగించింది. ఇందులో 6,437 చదరపు మిల్లీమీటర్ల కూలింగ్ ప్యాడ్ ఉంది. దీని ప్రధాన ఉద్దేశం ఫోన్‌లోని కీలక భాగాల ఉష్ణోగ్రతను నియంత్రించడం. ఎక్కువసేపు గేమింగ్ చేసే సమయంలో పనితీరును స్థిరంగా ఉంచేందుకు ఈ కూలింగ్ సిస్టమ్ ఉపయోగపడుతుంది.

50MP డ్యూయల్ కెమెరా..

ఫోటోగ్రఫీ కోసం ఫోన్ వెనుక డ్యూయల్ కెమెరా సెటప్ ఉంది. ఇందులో 50MP మెయిన్ కెమెరా f/1.59 అపర్చర్‌తో వస్తుంది. దీనికి 8MP అల్ట్రా-వైడ్ యాంగిల్ కెమెరా జత చేశారు. ఈ సెకండరీ కెమెరాకు f/2.2 అపర్చర్ ఉంది. సెల్ఫీలు, వీడియో కాల్స్ కోసం ముందు భాగంలో 13MP కెమెరా అందించారు.

6500mAh బ్యాటరీ..

ఇన్ఫినిక్స్ జీటీ 50 ప్రోలో 6500mAh బ్యాటరీ ఉంది. దీనికి 45W ఫాస్ట్ ఛార్జింగ్ సపోర్ట్ ఇచ్చారు. అంతేకాదు.. 30W వైర్‌లెస్ ఛార్జింగ్ సపోర్ట్ కూడా ఉంది. అదనంగా 10W రివర్స్ వైర్డ్ ఛార్జింగ్ సదుపాయం అందించారు. దీని ద్వారా అవసరమైన సమయంలో ఇతర డివైస్‌లకు కూడా ఫోన్ నుంచి ఛార్జింగ్ అందించవచ్చు.

ఇన్ఫినిక్స్ జీటీ 50 ప్రో ధర ఎంత?

భారత్‌లో ఇన్ఫినిక్స్ జీటీ 50 ప్రో ధర రూ. 69,999గా నిర్ణయించారు. ఇందులో 12GB ర్యామ్ + 256GB స్టోరేజ్ వేరియంట్ లభిస్తుంది. ఈ ఫోన్‌ను బ్లాక్, బ్లేజ్ కలర్ ఆప్షన్లలో తీసుకొచ్చారు. కంపెనీ ప్రకారం అక్టోబర్ 30 నుంచి సేల్ ప్రారంభం కానుంది.