iPhone 18 Pro Max Leak: ఐఫోన్ 18 ప్రో లీక్.. డార్క్ చెర్రీ లుక్ అదిరింది..

iPhone 18 Pro Max Leak: ప్రపంచవ్యాప్తంగా ఉన్న టెక్ ప్రియులు , యాపిల్ అభిమానులు ఎంతో ఆసక్తిగా ఎదురుచూస్తున్న 'సర్ ప్రైజ్ అండ్ షైన్' (Surprise and Shine) ఈవెంట్‌కు దిగ్గజ టెక్ సంస్థ యాపిల్ సర్వం సిద్ధం చేసింది. ఈ ప్రతిష్టాత్మక వేదికపై కంపెనీ తమ నెక్స్ట్ జనరేషన్ ఫ్లాగ్‌షిప్ స్మార్ట్‌ఫోన్లు అయిన ఐఫోన్ 18 ప్రో (iPhone 18 Pro) , ఐఫోన్ 18 ప్రో మాక్స్ (iPhone 18 Pro Max) మోడళ్లను అధికారికంగా పరిచయం చేయనుంది. వీటితో పాటు యాపిల్ చరిత్రలోనే మొదటిసారిగా వస్తున్న బుక్-స్టైల్ ఫోల్డబుల్ ఫోన్ 'ఐఫోన్ ఆల్ట్రా' (iPhone Ultra) కూడా ఈ ఈవెంట్‌లోనే ప్రధాన ఆకర్షణగా నిలవనుందని గ్లోబల్ టెక్ వర్గాలు బలంగా భావిస్తున్నాయి. అయితే, ఈ గ్రాండ్ లాంచ్ కార్యక్రమానికి కొన్ని గంటల ముందే, కొత్త ఐఫోన్ 18 ప్రో సిరీస్ మోడళ్లకు సంబంధించిన ఒక ఆసక్తికరమైన వీడియో నెట్‌లో ప్రత్యక్షమై సంచలనం సృష్టిస్తోంది.

రీటైల్ డెమో యూనిట్ల వీడియో లీక్

దక్షిణ కొరియాకు చెందిన ప్రసిద్ధ బ్లాగింగ్ వేదిక 'నేవర్' (Naver)లో ప్రసిద్ధ టిప్‌స్టర్ ద్వారా ఒక 14 సెకన్ల నిడివి ఉన్న వీడియో క్లిప్ షేర్ అయింది. సాధారణంగా అధికారిక అమ్మకాలు ప్రారంభమవడానికి ముందు యాపిల్ రీటైల్ స్టోర్లకు ప్రదర్శన కోసం పంపే 'డెమో యూనిట్ల' తరహాలోనే ఈ ఫోన్లు కనిపిస్తున్నాయి. ఒక ప్రత్యేకమైన రీటైల్ స్టాండ్‌పై ఉంచిన ఈ డివైజ్‌లు, ఐఫోన్ 18 ప్రో సిరీస్ రాబోతున్న కొత్త కలర్ షేడ్స్‌ను అత్యంత స్పష్టంగా చూపిస్తున్నాయి. అందులోని ఐఫోన్ 18 ప్రో మాక్స్ మోడల్ ముదురు ఎరుపు లేదా బర్గండీ షేడ్‌లో ఉండే అత్యంత ప్రీమియం 'డార్క్ చెర్రీ' (Dark Cherry) ఫినిషింగ్‌లో దర్శనమివ్వగా, ఐఫోన్ 18 ప్రో మోడల్ కంటికింపైన 'స్కై బ్లూ' (Sky Blue) రంగులో మెరిసిపోతోంది.

పాత మోడళ్లతో పోలిస్తే సరికొత్త లుక్

ఈ లీకైన వీడియో క్లిప్‌లో మరొక ఆసక్తికరమైన అంశం ఏమిటంటే... ప్రస్తుతం మార్కెట్‌లో ఉన్న ఐఫోన్ 17 ప్రో మాక్స్ డార్క్ బ్లూ మోడల్‌ను, రాబోయే ఐఫోన్ 18 ప్రో మాక్స్‌తో పక్కపక్కనే పెట్టి చూపించారు. దీనివల్ల పాత మోడల్ రంగుతో పోలిస్తే కొత్తగా వస్తున్న 'డార్క్ చెర్రీ' ఫినిషింగ్ ఎంత కొత్తగా, విభిన్నంగా , ట్రెండీగా ఉందో సులభంగా అర్థమవుతోంది. అదేవిధంగా, ఐఫోన్ 18 ప్రోలో చూపించిన లైట్ బ్లూ వేరియంట్ కూడా గతంలో వచ్చిన బ్లూ మోడళ్ల కంటే చాలా తేలికైన, ఆకర్షణీయమైన పాస్టెల్ షేడ్‌లో కనిపిస్తోంది. ఇది క్లాసీ లుక్ కోరుకునే వినియోగదారులను విశేషంగా ఆకట్టుకునేలా ఉంది.

సిమ్ ట్రే లీక్స్ , కలర్ ఆప్షన్లపై స్పష్టత

గత కొన్ని వారాలుగా ప్రముఖ టెక్ ప్లాట్‌ఫారమ్‌లలో వినిపిస్తున్న నివేదికలకు ఈ వీడియో లీక్ మరింత బలాన్ని చేకూరుస్తోంది. ఇటీవల ఐఫోన్ 18 ప్రో మోడళ్లకు చెందిన సిమ్ ట్రేల ఫొటోలు సోషల్ మీడియాలో లీక్ అయినప్పుడు కూడా సిల్వర్, డార్క్ చెర్రీ , స్కై బ్లూ రంగుల్లో ఇవి రానున్నాయని ప్రచారం జరిగింది. అయితే, ప్రధానమైన మూడో రంగు విషయంలో కొన్ని విభేదాలు వినిపిస్తున్నాయి. సిల్వర్ రంగుకు బదులుగా క్లాసిక్ బ్లాక్ కలర్‌ను కంపెనీ తీసుకురానుందని మరికొన్ని నివేదికలు చెబుతుండటంతో వినియోగదారుల్లో కాస్త ఆసక్తి పెరిగింది.

ఈ 14 సెకన్ల వీడియో ఎక్కడి నుంచి లీక్ అయిందనే వివరాలు స్పష్టంగా తెలియనప్పటికీ, సెప్టెంబర్ 9న జరగబోయే అధికారిక ఈవెంట్‌కు ముందు రీటైలర్లకు శాంపిల్ హార్డ్‌వేర్ చేరుకోవడం సహజమే కాబట్టి ఇవే అసలైన రంగులు అయ్యే అవకాశం ఎక్కువగా ఉందని టెక్ నిపుణులు విశ్వసిస్తున్నారు. మరో రెండు రోజుల్లో జరగబోయే ఈవెంట్‌లో ఈ ఫోన్ల పూర్తి ఫీచర్లు, కెమెరా అప్‌గ్రేడ్‌లు , ధరల వివరాలు అధికారికంగా బయటకు రానున్నాయి.