Jio vs Airtel Broadband Plans: రూ.699 బ్రాడ్‌బ్యాండ్ ప్లాన్.. Airtel, Jioలో ఎవరిది బెస్ట్?

Jio vs Airtel Broadband Plans: రిలయన్స్ జియో, భారతీ ఎయిర్‌టెల్ రూ.699 ధరతో అందిస్తున్న బ్రాడ్‌బ్యాండ్ ప్లాన్లలో ఇంటర్నెట్ వేగం, వినోద ప్రయోజనాల విషయంలో స్పష్టమైన తేడాలు ఉన్నాయి. అందుకే వినియోగదారులు తమ అవసరాన్ని బట్టి సరైన ప్లాన్ ఎంచుకోవాల్సి ఉంటుంది.

జియో రూ.699 బ్రాడ్‌బ్యాండ్ ప్లాన్‌లో 100 Mbps వేగంతో ఇంటర్నెట్ లభిస్తుంది. అపరిమిత డేటా అందిస్తున్నట్లు జియో పేర్కొంటున్నప్పటికీ, నెలవారీ కమర్షియల్ పరిమితి 3.3 TBగా ఉంది. ఈ ప్లాన్‌లో ఉచిత వాయిస్ కాలింగ్ సదుపాయం కూడా ఉంటుంది. అయితే ల్యాండ్‌లైన్ పరికరం లేదా అదనపు ఓటీటీ ప్రయోజనాలు ఇందులో అందుబాటులో లేవు.

ఎయిర్‌టెల్ రూ.699 ప్లాన్ మాత్రం ఇంటర్నెట్‌తో పాటు వినోద సేవలకు ప్రాధాన్యం ఇస్తుంది. ఇందులో 40 Mbps వేగంతో అపరిమిత డేటా లభిస్తుంది. దీనితో పాటు 22కు పైగా ఓటీటీ సబ్‌స్క్రిప్షన్లు అందిస్తారు. డిస్నీ+ హాట్‌స్టార్, జీ5 (ZEE5), ఎక్స్‌స్ట్రీమ్ ప్లే, అడోబ్ ఎక్స్‌ప్రెస్ ప్రీమియం, గూగుల్ వన్ వంటి సేవలు ఇందులో ఉన్నాయి. అలాగే 350కి పైగా లైవ్ టీవీ ఛానెళ్లు కూడా అందుబాటులో ఉంటాయి.

ఎయిర్‌టెల్ ప్లాన్‌లో ఉచిత వాయిస్ కాలింగ్ సదుపాయం ఉన్నప్పటికీ, ల్యాండ్‌లైన్ ఫోన్ కలిగిన వినియోగదారులకే అది వర్తిస్తుంది. అందువల్ల ఎక్కువ ఇంటర్నెట్ వేగం ప్రధాన అవసరమైతే జియో ప్లాన్ అనుకూలంగా ఉంటుంది. ఓటీటీలు, లైవ్ టీవీ ఛానెళ్లు ముఖ్యమైతే ఎయిర్‌టెల్ ప్లాన్ ఉపయోగకరంగా ఉంటుంది. రెండు ప్లాన్ల ధర ఒకటే కాబట్టి తుది ఎంపిక వినియోగదారుల అవసరాలపై ఆధారపడి ఉంటుంది.