Lava Bold N4 Lite: బడ్జెట్ ఫోన్లలో సరికొత్త సంచలనం.. లావా బోల్డ్ N4 లైట్ లాంచ్ డేట్ ఇదే!

Lava Bold N4 Lite: స్మార్ట్‌ఫోన్ మార్కెట్లో భారతీయ బ్రాండ్ లావా మరో సరికొత్త మోడల్‌ను పరిచయం చేయడానికి సిద్ధమైంది. అద్భుతమైన డిజైన్, బలమైన రక్షణ ప్రమాణాలతో రానున్న లావా బోల్డ్ N4 లైట్ స్మార్ట్‌ఫోన్ విడుదలకు ముహూర్తం ఖరారైంది. సరసమైన ధరలో ప్రీమియం ఫీచర్లు కోరుకునే మొబైల్ ప్రియులకు ఇది ఒక ప్రత్యేక ఎంపికగా నిలవనుంది.

భారత మార్కెట్లో లావా బోల్డ్ N4 లైట్ స్మార్ట్‌ఫోన్ ఆగస్టు 27న మధ్యాహ్నం 12 గంటలకు అధికారికంగా విడుదల కానుంది. ఈ మేరకు ప్రముఖ ఈ-కామర్స్ ప్లాట్‌ఫామ్ అమెజాన్ లో ప్రత్యేక మైక్రోసైట్ ప్రత్యక్షమైంది. నోయిడా కేంద్రంగా పనిచేసే లావా సంస్థ, ఈ కొత్త హ్యాండ్‌సెట్‌ను ఆకర్షణీయమైన గోల్డ్ కలర్ వేరియంట్‌లో అందుబాటులోకి తెస్తోంది. కొనుగోలుదారుల కోసం ప్రత్యేకంగా ఇంటి వద్దకే ఉచిత సేవలందించే ఫ్రీ డోర్‌స్టెప్ సర్వీస్ సదుపాయాన్ని కూడా కంపెనీ ప్రకటించింది. నాణ్యత, పనితీరుతో పాటు వినియోగదారులకు వేగవంతమైన కస్టమర్ కేర్ సేవలు అందించడమే లక్ష్యంగా లావా ఈ అడుగు వేసింది.

మిలిటరీ గ్రేడ్ రక్షణతో సరికొత్త లుక్..

డిజైన్ పరంగా ఈ హ్యాండ్‌సెట్ ఫ్లాట్ రియర్ ప్యానెల్ డిజైన్‌తో రానుంది. వెనుక భాగంలో ఎగువ ఎడమ మూలన చతురస్రాకార కెమెరా మాడ్యూల్‌ను అమర్చారు. ఆకర్షణీయమైన గోల్డెన్ ఫినిషింగ్ ఫ్రేమ్‌తో కూడిన ఈ డివైస్, పడిపోయినా లేదా షాక్‌లకు గురైనా తట్టుకునేందుకు MIL-STD-810H మిలిటరీ గ్రేడ్ సర్టిఫికేషన్‌తో రూపొందింది. చార్జింగ్ కోసం కింద భాగంలో USB Type-C పోర్ట్, దానితో పాటు 3.5mm ఆడియో జాక్, మైక్రోఫోన్, స్పీకర్ గ్రిల్ అందించారు.

బోల్డ్ N2 లైట్‌కు కొనసాగింపుగా మార్కెట్లోకి..

ఈ ఏడాది ఏప్రిల్ 1న ప్రారంభ ధర రూ. 7,399 తో విడుదలైన లావా బోల్డ్ N2 లైట్ కు కొనసాగింపుగా ఈ కొత్త మోడల్ రాబోతోంది. మునుపటి మోడల్ 6.75-అంగుళాల HD+ 90Hz డిస్‌ప్లే, యూనిసాక్ 9863A ప్రాసెసర్, 5,000mAh బ్యాటరీతో పాటు 13-మెగాపిక్సెల్ కెమెరాతో వినియోగదారులను ఆకట్టుకుంది. ఇప్పుడు రానున్న కొత్త మోడల్ మరింత ఆధునిక హంగులతో రానుంది.