Telecom Rules: సిమ్ కార్డ్స్ దుర్వినియోగం చేస్తే భారీ మూల్యం.. రూ.50 లక్షల జరిమానాతో పాటు జైలు శిక్ష

Telecom Rules: మొబైల్ సిమ్ కార్డుల వాడకంపై కేంద్ర ప్రభుత్వానికి చెందిన టెలికాం శాఖ (DoT) అత్యంత తీవ్రమైన హెచ్చరికలు జారీ చేసింది. మీ పేరు మీద జారీ అయిన సిమ్ కార్డును ఎవరైనా అసాధారణ లేదా చట్టవ్యతిరేక కార్యకలాపాల కోసం ఉపయోగిస్తే ఆ తీవ్ర పరిణామాలు నేరుగా మీకే చుట్టుకుంటాయని స్పష్టం చేసింది. టెలీకమ్యూనికేషన్స్ యాక్ట్-2023 ప్రకారం.. నిబంధనలు ఉల్లంఘిస్తే ఏకంగా 3 సంవత్సరాల వరకు జైలు శిక్షతో పాటు రూ.50 లక్షల వరకు భారీ జరిమానా విధించే అవకాశం ఉంది. కాబట్టి ఎట్టి పరిస్థితుల్లోనూ మీ ఆధార్ లేదా ఇతర ధృవీకరణ పత్రాలతో తీసుకున్న సిమ్ కార్డులను ఇతరులకు వాడటానికి ఇవ్వకూడదని అధికారులు గట్టిగా హెచ్చరిస్తున్నారు.

సంచార్ సాథీ పోర్టల్ ద్వారా నెంబర్ల తనిఖీ

చాలా మందికి తమ పేరు మీద ఎన్ని సిమ్ కార్డులు యాక్టివ్‌గా ఉన్నాయనే విషయం కూడా సరిగ్గా తెలియదు. ముఖ్యంగా తమకు తెలియకుండా ఇతరులు ఎవరైనా తమ పత్రాలను దుర్వినియోగం చేసి నెంబర్లు తీసుకున్నారా లేదా అనే సందేహం ఉన్నవారు వెంటనే అప్రమత్తం కావాలి. దీనికోసం ప్రభుత్వం ప్రత్యేకంగా అందుబాటులోకి తెచ్చిన సంచార్ సాథీ పోర్టల్ లేదా మొబైల్ యాప్‌ను ఉపయోగించి క్రమం తప్పకుండా చెక్ చేసుకోవాలని సూచించారు. మీ ప్రమేయం లేకుండా ఏదైనా నెంబర్ నడుస్తున్నట్లు తేలితే వెంటనే దానిని బ్లాక్ చేయించుకోవడానికి ఈ ప్లాట్‌ఫారమ్ ఎంతో ఉపయోగపడుతుంది.

ఛత్తీస్‌గఢ్ ఘటన నేపథ్యంలో వెలుగులోకి వచ్చిన మోసాలు

ఇటీవల సైబర్ క్రైమ్ దర్యాప్తులో భాగంగా వెలుగు చూసిన కొన్ని ఘటనలు ఈ హెచ్చరిక వెనుక అసలు కారణాన్ని బయటపెట్టాయి. ఛత్తీస్‌గఢ్‌లో ఒక పాయింట్ ఆఫ్ సేల్ (PoS) ఏజెంట్ ప్రజల అనుమతి లేదా వారికి తెలియకుండానే వారి వ్యక్తిగత పత్రాలను ఉపయోగించి ఏకంగా 25 కొత్త మొబైల్ కనెక్షన్లను అక్రమంగా యాక్టివేట్ చేశాడు. ఆ నెంబర్లను తనిఖీ చేయగా అవి తీవ్రమైన నేరాలకు వాడుతున్నట్లు తేలడంతో వాటిని వెంటనే రద్దు చేశారు. ఇలాంటి మోసగాళ్ల బారిన పడకుండా ఉండాలంటే ప్రతి ఒక్కరూ తమ డాక్యుమెంట్ల భద్రతపై పూర్తి నిఘా ఉంచడం చాలా ముఖ్యం.

కేవలం సిమ్ కార్డులే కాకుండా, మొబైల్ ఫోన్ల ఐఎంఈఐ నంబర్లను మార్చడం లేదా వాటితో అసభ్యకరంగా లేదా చట్టవిరుద్ధంగా చేష్టలు చేయడం కూడా నేరమేనని టెలికాం శాఖ స్పష్టం చేసింది. మోడెమ్‌లు, సిమ్ బాక్సులు, ఇతర టెలికాం పరికరాల గుర్తింపు నంబర్లను మార్చే యాప్‌లు లేదా వెబ్‌సైట్లను ఉపయోగించడం నెట్‌వర్క్ భద్రతకు పెను ముప్పుగా మారుతుంది. సైబర్ నేరగాళ్లు ఇలాంటి నకిలీ సిమ్‌ల ద్వారా మోసాలకు పాల్పడుతుంటారు కాబట్టి, ప్రతి పౌరుడు అత్యంత జాగ్రత్తగా ఉంటూ టెలికాం నిబంధనలను పాటించాలని అధికారులు విజ్ఞప్తి చేస్తున్నారు.