Motorola Signature 27: 200MP కెమెరా.. పవర్‌ఫుల్ చిప్‌తో దూసుకొస్తున్న కొత్త ఫ్లాగ్‌షిప్.!

Motorola Signature 27: ప్రముఖ స్మార్ట్‌ఫోన్ తయారీ సంస్థ మోటోరోలా తన లైనప్‌లో మరొక సంచలనానికి తెరదీస్తోంది. కొన్ని వారాల క్రితం 'సిగ్నేచర్ 27' అనే కొత్త హ్యాండ్‌సెట్‌పై మొదటి టీజర్‌ను రిలీజ్ చేసిన కంపెనీ, ఇప్పుడు అధికారిక ప్రచారాన్ని మరింత ముమ్మరం చేసింది. సోషల్ మీడియా వేదిక 'X'లో పోస్ట్ చేసిన తాజా టీజర్ వీడియో ద్వారా ఈ ఫోన్‌కు సంబంధించిన కీలక ఫీచర్లు, కలర్ వేరియంట్లు , అనౌన్స్‌మెంట్ డేట్‌ను రివీల్ చేసింది. ఈ ఏడాది జనవరిలో లాంచ్ అయిన 'మోటోరోలా సిగ్నేచర్' మోడల్‌కు ఇది నేరుగా సక్సెసర్‌గా వస్తోందా లేక సిగ్నేచర్ సిరీస్‌లో ఒక అదనపు ఫ్లాగ్‌షిప్ మోడల్‌గా నిలుస్తుందా అనే దానిపై స్పష్టత రావాల్సి ఉంది.

సెప్టెంబర్ 22న స్నాప్‌డ్రాగన్ సమిట్‌లో సందడి

మోటోరోలా అనౌన్స్ చేసిన వివరాల ప్రకారం సిగ్నేచర్ 27 హ్యాండ్‌సెట్ సెప్టెంబర్ 22న అధికారికంగా వెలుగులోకి రానుంది. ప్రముఖ ప్రాసెసర్ తయారీ సంస్థ క్వాల్కమ్ నిర్వహిస్తున్న 'స్నాప్‌డ్రాగన్ సమిట్' ఈవెంట్‌తో ఈ డేట్ సరిగ్గా మ్యాచ్ అవుతోంది. దీన్ని బట్టి సెప్టెంబర్ 22న ఇది పూర్తిస్థాయి సేల్ లాంచ్ కాకపోవచ్చని, క్వాల్కమ్ వేదికపై ఈ ఫోన్‌ను లేటెస్ట్ స్నాప్‌డ్రాగన్ ప్రాసెసర్‌తో కలిసి ప్రదర్శించే అవకాశం ఉందని టెక్ వర్గాలు భావిస్తున్నాయి. ఈ ఫోన్‌లో సరికొత్త ఫ్లాగ్‌షిప్ స్నాప్‌డ్రాగన్ చిప్‌సెట్‌ను ఉపయోగించనున్నట్లు మోటోరోలా స్పష్టం చేసింది.

200MP రాక్షస కెమెరా , డాల్బీ విజన్ రికార్డింగ్

కెమెరా విభాగానికి వస్తే ఈసారి మోటోరోలా చాలా పెద్ద అప్‌గ్రేడ్‌నే ప్లాన్ చేసింది. ఈ సిగ్నేచర్ 27 స్మార్ట్‌ఫోన్ వెనుక వైపు ఏకంగా 200 మెగాపిక్సెల్ ప్రైమరీ కెమెరాతో రానుందని టీజర్ ద్వారా స్పష్టమైంది. దీనికి తోడు ప్రొఫెషనల్ లెవెల్ వీడియో క్వాలిటీ కోసం డాల్బీ విజన్ (Dolby Vision) వీడియో క్యాప్చర్ సపోర్ట్‌ను కూడా ఇందులో అందించబోతున్నారు. హై-రెసొల్యూషన్ ఫోటోలు , క్రిస్ప్ వీడియో రికార్డింగ్ కోరుకునే కంటెంట్ క్రియేటర్లకు ఈ కెమెరా సెటప్ ఒక ప్రధాన ఆకర్షణగా నిలవనుంది.

కొత్త పాంటోన్ షేడ్స్ , ప్రిమియం మెటీరియల్స్

డిజైన్ విషయానికి వస్తే సిగ్నేచర్ సిరీస్ ఫోన్లలో విభిన్నమైన ప్రిమియం మెటీరియల్స్ వాడటానికి మోటోరోలా ఎక్కువ ప్రాధాన్యత ఇస్తుంది. ఈ కొత్త మోడల్‌ను ప్రత్యేకంగా రెండు పాంటోన్ వేరియంట్లలో ఆవిష్కరించనున్నారు. అవే 'పాంటోన్ కోల్ స్మోక్' (Pantone Coal Smoke) , 'పాంటోన్ కాపులెట్ ఆలివ్' (Pantone Capulet Olive) కలర్స్. వీటితో పాటు స్వరొవ్‌స్కీ (Swarovski) ఎడిషన్‌ను కూడా మోటోరోలా పరిచయం చేసే అవకాశాలు ఉన్నాయని ప్రచారం సాగుతోంది.

మునుపటి మోటోరోలా సిగ్నేచర్ స్పెసిఫికేషన్లు ఒకచూపు

ఈ ఏడాది జనవరిలో లాంచ్ అయిన ఒరిజినల్ 'మోటోరోలా సిగ్నేచర్' ఫోన్ భారత మార్కెట్లో ₹59,999 ప్రారంభ ధరతో అందుబాటులోకి వచ్చింది. ఈ ఫోన్‌లో 165Hz రిఫ్రెష్ రేట్‌తో కూడిన 6.8 అంగుళాల 1.5K LTPO AMOLED డిస్‌ప్లే, క్వాల్కమ్ స్నాప్‌డ్రాగన్ 8 Gen 5 చిప్‌సెట్, 16GB వరకు ర్యామ్ , 1TB స్టోరేజ్ ఆప్షన్లు ఉన్నాయి. కెమెరా పరంగా 50MP త్రిపుల్ రేర్ కెమెరా సెటప్, ముందు వైపు 50MP సెల్ఫీ కెమెరా , 8K డాల్బీ విజన్ వీడియో రికార్డింగ్ సపోర్ట్ అందుబాటులో ఉన్నాయి. స్లిమ్ డిజైన్ ఉన్నప్పటికీ ఇందులో 5,200mAh సిలికాన్-కార్బన్ బ్యాటరీ, 90W వైర్డ్ , 10W వైర్‌లెస్ ఛార్జింగ్ సపోర్ట్ ఇచ్చారు. మునుపటి మోడల్‌లో 50MP కెమెరా ఉండగా, రాబోతున్న సిగ్నేచర్ 27 మోడల్‌లో ఏకంగా 200MP కెమెరా , అప్‌గ్రేడెడ్ చిప్‌సెట్‌ను ఇస్తుండటంతో దీనిపై టెక్ ప్రియుల్లో భారీ అంచనాలు నెలకొన్నాయి.