Social Media Ban: 16 ఏళ్లలోపు పిల్లలకు సోషల్ మీడియాతో పాటు గేమ్స్‌పై కూడా నిషేధం.. ఎక్కడంటే..?

Social Media Ban: పిల్లలపై సోషల్ మీడియా, ఆన్‌లైన్ గేమింగ్ ప్రభావంపై ప్రపంచవ్యాప్తంగా చర్చ జరుగుతున్న వేళ నార్వే కీలక నిర్ణయం తీసుకునేందుకు సిద్ధమవుతోంది. 16 ఏళ్లలోపు పిల్లలు సోషల్ మీడియా ప్లాట్‌ఫామ్స్‌తో పాటు కొన్ని గేమింగ్, మెసేజింగ్ సేవలను ఉపయోగించకుండా నిషేధం విధించే ప్రతిపాదనను ప్రభుత్వం తీసుకొస్తోంది. ఈ నిబంధనల్లో రోబ్లాక్స్, స్నాప్‌చాట్, టిక్‌టాక్ వంటి ప్రముఖ ప్లాట్‌ఫామ్స్ ప్రభావితమయ్యే అవకాశం ఉంది.

నార్వేలో పిల్లలకు సోషల్ మీడియా, గేమ్స్‌పై నిషేధం?

నార్వే ప్రభుత్వం కొత్త నిబంధనలను తీసుకొచ్చేందుకు సిద్ధమవుతోంది. ఈ ప్రతిపాదిత నిబంధనల ప్రకారం 16 ఏళ్లలోపు పిల్లల సోషల్ మీడియా వినియోగంపై ఆంక్షలు విధించే అవకాశం ఉంది. రాయిటర్స్ నివేదిక ప్రకారం, మెసేజింగ్, గేమింగ్ సేవలను అందించే కొన్ని యాప్స్ కూడా ఈ నిబంధనల పరిధిలోకి వచ్చే అవకాశం ఉంది.

ప్రతిపాదిత బిల్లులో పిల్లలకు హానికరంగా భావించే సోషల్ మీడియా ప్లాట్‌ఫామ్స్‌ను చేర్చనున్నారు. ప్రభుత్వం సోమవారం ఈ విషయాన్ని వెల్లడించింది. ఇందులో రోబ్లాక్స్ (Roblox), స్నాప్‌చాట్ (Snapchat), టిక్‌టాక్ (TikTok) వంటి ప్లాట్‌ఫామ్స్‌పై ప్రభావం పడే అవకాశం ఉంది.

నార్వే ప్రభుత్వం ఈ ఏడాది ఏప్రిల్‌లోనే దీనిపై ప్రకటన చేసింది. 16 ఏళ్ల వయసు పూర్తయ్యే వరకు పిల్లలు సోషల్ మీడియా ఉపయోగించకుండా నిబంధనలు తీసుకురావాలని భావిస్తున్నట్లు తెలిపింది. ఈ ఏడాది చివరి నాటికి దీనికి సంబంధించిన బిల్లును పార్లమెంట్‌లో ప్రవేశపెట్టాలని అప్పట్లో వెల్లడించింది.

యూజర్ల వయసు నిర్ధారించాల్సిన బాధ్యత కంపెనీలదే..

కొత్త నిబంధనలు అమల్లోకి వస్తే సోషల్ మీడియా, ఇతర సంబంధిత ప్లాట్‌ఫామ్స్‌కు యూజర్ల వయసును ధృవీకరించే బాధ్యత అప్పగించే అవకాశం ఉంది. వయసు నిర్ధారణ నిబంధనలను పాటించని కంపెనీలపై జరిమానాలు విధించే అవకాశం ఉంటుంది.

అయితే నిషేధం ఏయే సోషల్ మీడియా ప్లాట్‌ఫామ్స్‌కు వర్తిస్తుందనే విషయంపై ప్రభుత్వం పూర్తి వివరాలను ఇంకా వెల్లడించాల్సి ఉంది.

పిల్లలపై సోషల్ మీడియా ప్రభావంపై ఆందోళన..

పిల్లలు సోషల్ మీడియా, ఆన్‌లైన్ గేమింగ్ ప్లాట్‌ఫామ్స్‌ను ఎక్కువగా ఉపయోగించడం వల్ల ఎదురయ్యే ప్రభావాలపై పలు దేశాల్లో చర్చ జరుగుతోంది. ముఖ్యంగా చిన్న వయసులో సోషల్ మీడియా వినియోగం, ఆన్‌లైన్ కంటెంట్‌కు పిల్లల యాక్సెస్ వంటి అంశాలపై ప్రభుత్వాలు కొత్త నిబంధనలను పరిశీలిస్తున్నాయి.

ఆస్ట్రేలియా తొలుత నిషేధం..

16 ఏళ్లలోపు పిల్లల సోషల్ మీడియా వినియోగంపై నిబంధనలు తీసుకొస్తున్న తొలి దేశం నార్వే కాదు. ఆస్ట్రేలియా ఇప్పటికే ఈ విషయంలో కీలక చర్య తీసుకుంది.

ఆస్ట్రేలియాలో 16 ఏళ్లలోపు పిల్లలకు సోషల్ మీడియాపై ఆంక్షలు అమల్లోకి వచ్చాయి. దీంతో ఫేస్‌బుక్ (Facebook), యూట్యూబ్ (YouTube), ఎక్స్ (X), స్నాప్‌చాట్ (Snapchat) వంటి ప్లాట్‌ఫామ్స్ వయసు నిర్ధారణ విధానాలను అమలు చేయాల్సి వచ్చింది.

ఆస్ట్రేలియా తర్వాత ఆస్ట్రియా కూడా 2026 మార్చిలో ఈ దిశగా నిబంధనలు తీసుకొచ్చింది. పిల్లల సోషల్ మీడియా వినియోగాన్ని పరిమితం చేసేందుకు అక్కడ కూడా బిల్లు ప్రవేశపెట్టారు. బ్రెజిల్ కూడా కొత్త చట్టాలను తీసుకొచ్చింది. కెనడా సైతం ఈ అంశానికి సంబంధించి నిబంధనలు అమలు చేసింది.

రాబోయే రోజుల్లో మరిన్ని దేశాలు కూడా పిల్లల సోషల్ మీడియా, ఆన్‌లైన్ గేమింగ్ వినియోగంపై వయసు పరిమితులు విధించే అవకాశం ఉందనే చర్చ కొనసాగుతోంది.