OnePlus Nord CE6 Lite vs Vivo T5x: బడ్జెట్ ధరలో పవర్‌ఫుల్ ఫోన్.! ఈ రెండింటిలో ఏది బెస్ట్.?

OnePlus Nord CE 6 Lite vs Vivo T5x: భారత స్మార్ట్‌ఫోన్ మార్కెట్లో మిడ్-రేంజ్ విభాగంలో పోటీ ఎప్పుడూ రసవత్తరంగానే ఉంటుంది. ముఖ్యంగా రూ.25,000 లోపు ధరలో బెస్ట్ ఫీచర్లు కోరుకునే యూజర్ల కోసం వన్‌ప్లస్ తన సరికొత్త 'నార్డ్ CE 6 లైట్' మోడల్‌ను లాంచ్ చేసింది. అయితే ఇదే సెగ్మెంట్‌లో ఇప్పటికే దుమ్మురేపుతున్న వివో T5x మోడల్‌కు ఇది గట్టి పోటీనిస్తోంది. ఈ రెండు ఫోన్లలో ఏది మీ బడ్జెట్‌కు, మీ అవసరాలకు కరెక్ట్ గా సెట్ అవుతుందో తెలియాలంటే వాటి ఫీచర్ల మధ్య ఉన్న తేడాలను లోతుగా పరిశీలించాల్సిందే.

డిస్‌ప్లే , విజువల్ ఎక్స్‌పీరియన్స్

స్క్రీన్ క్వాలిటీ విషయానికి వస్తే, ఈ రెండు బ్రాండ్లు వేర్వేరు వ్యూహాలను అనుసరించాయి. వన్‌ప్లస్ నార్డ్ CE 6 లైట్ 6.72-అంగుళాల ఫుల్ HD+ LCD డిస్‌ప్లేతో వస్తుంది. ఇందులో హైలైట్ ఏంటంటే 144Hz రిఫ్రెష్ రేట్ ఉండటం వల్ల గేమింగ్ , స్క్రోలింగ్ చాలా స్మూత్‌గా ఉంటుంది. దీని బ్రైట్‌నెస్ 1000 నిట్స్ వరకు ఉంటుంది. మరోవైపు వివో T5x కొంచెం పెద్దదైన 6.76-అంగుళాల స్క్రీన్‌ను కలిగి ఉంది. ఇందులో రిఫ్రెష్ రేట్ 120Hz మాత్రమే ఉన్నప్పటికీ, 1300 నిట్స్ పీక్ బ్రైట్‌నెస్ వల్ల ఎండలో కూడా స్క్రీన్ స్పష్టంగా కనిపిస్తుంది. అంటే స్మూత్ పెర్ఫార్మెన్స్ కావాలనుకునే వారు వన్‌ప్లస్‌ను, ఎక్కువ బ్రైట్‌నెస్ కోరుకునే వారు వివోను ఎంచుకోవచ్చు.

ప్రాసెసర్ వేగం, కెమెరా పవర్

పర్ఫార్మెన్స్ పరంగా ఈ రెండు ఫోన్లు దాదాపు ఒకే స్థాయిలో తలపడుతున్నాయి. వన్‌ప్లస్‌లో మీడియాటెక్ డైమెన్సిటీ 7400 అపెక్స్ ప్రాసెసర్ ఉండగా, వివోలో డైమెన్సిటీ 7400 టర్బో చిప్‌సెట్ ఉంది. రోజువారీ మల్టీటాస్కింగ్ , యాప్స్ వాడకంలో ఈ రెండింటి మధ్య పెద్దగా తేడా ఉండదు. ఇక కెమెరా విభాగంలో వెనుకవైపు రెండింటిలోనూ 50MP మెయిన్ కెమెరా , 2MP డెప్త్ సెన్సార్ ఉన్నాయి. అయితే సెల్ఫీ ప్రియుల కోసం వివో భారీ అప్‌డేట్ ఇచ్చింది. వన్‌ప్లస్ కేవలం 8MP ఫ్రంట్ కెమెరాను ఆఫర్ చేస్తుంటే, వివో ఏకంగా 32MP సెల్ఫీ కెమెరాతో ఫోటోల క్వాలిటీని నెక్స్ట్ లెవల్‌కు తీసుకెళ్లింది.

బ్యాటరీ బ్యాకప్, ఛార్జింగ్ స్పీడ్

స్మార్ట్‌ఫోన్ యూజర్లు ప్రధానంగా చూసేది బ్యాటరీ లైఫ్. ఈ విషయంలో ఈ రెండు ఫోన్లు సరికొత్త రికార్డులు సృష్టిస్తున్నాయి. వన్‌ప్లస్ ఫోన్‌లో 7000mAh భారీ బ్యాటరీ ఉండగా, వివో ఒక అడుగు ముందుకేసి 7200mAh బ్యాటరీని అందించింది. ఛార్జింగ్ స్పీడ్ విషయానికి వస్తే వన్‌ప్లస్ 45W సపోర్ట్‌తో వస్తుంటే, వివో 44W సపోర్ట్‌ను ఇస్తోంది. రెండు ఫోన్లు కూడా ఒక్కసారి ఛార్జ్ చేస్తే రెండు రోజుల పాటు హ్యాపీగా బ్యాకప్ ఇస్తాయి. కొంచెం పెద్ద బ్యాటరీ కావాలనుకునే వారికి వివో బెస్ట్ ఆప్షన్ అని చెప్పవచ్చు.

ధరల వివరాలు..

ధరల పరంగా చూస్తే వన్‌ప్లస్ కొంత తక్కువకే లభిస్తోంది. వన్‌ప్లస్ బేస్ వేరియంట్ (6/128GB) రూ.20,999 కి అందుబాటులో ఉండగా, వివో ఇదే వేరియంట్‌ను రూ.22,999 కి విక్రయిస్తోంది. టాప్ ఎండ్ 8/256GB మోడల్ వన్‌ప్లస్‌లో రూ.25,999 గా ఉంటే, వివోలో రూ.26,999 గా ఉంది. అంటే మీరు బ్రాండ్ వాల్యూ , తక్కువ ధరలో మంచి డిస్‌ప్లే రిఫ్రెష్ రేట్ కోరుకుంటే వన్‌ప్లస్ నార్డ్ CE 6 లైట్ వైపు వెళ్లవచ్చు. ఒకవేళ మీకు బెస్ట్ సెల్ఫీ కెమెరా , మరికొంత ఎక్కువ బ్యాటరీ బ్యాకప్ ముఖ్యమైతే వివో T5x సరైన ఎంపిక అవుతుంది. మీ బడ్జెట్ , ప్రయారిటీని బట్టి ఈ రెండింటిలో ఒకదాన్ని సెలెక్ట్ చేసుకోవచ్చు.