జియోకి షాకిచ్చిన బీఎస్ఎన్ఎల్.. టాప్ ప్లేస్‌లో ఎయిర్‌టెల్.. ఓపెన్‌సిగ్నల్ సంచలన నిజాలు

Airtel vs Jio vs BSNL: దేశంలో మొబైల్ ఇంటర్నెట్ విషయంలో జియో-ఎయిర్‌టెల్ మధ్యనే పోటీ ఉంటుందన్న అంచనాలను బ్రాడ్‌బ్యాండ్ విభాగం తలకిందులు చేసింది. ప్రఖ్యాత నెట్‌వర్క్ విశ్లేషణ సంస్థ ఓపెన్‌సిగ్నల్ (Opensignal) విడుదల చేసిన నవంబర్ 2026 నివేదిక ప్రకారం.. ఇళ్లు, కార్యాలయాలకు అందించే ఫిక్స్‌డ్ బ్రాడ్‌బ్యాండ్ ఇంటర్నెట్‌లో ఎయిర్‌టెల్ తిరుగులేని విజేతగా నిలిచింది.

ఐదు ప్రధాన ప్రమాణాల్లోనూ ఎయిర్‌టెల్ అగ్రస్థానం దక్కించుకోగా.. అసలు ట్విస్ట్ ఏంటంటే.. రెండు విభాగాల్లో ప్రభుత్వ రంగ సంస్థ బీఎస్ఎన్ఎల్ దిగ్గజం జియోను మించిపోయింది. జియో బీఎస్ఎన్ఎల్ కంటే వెనుకబడటం టెలికాం వర్గాల్లో చర్చనీయాంశంగా మారింది.

విశ్వసనీయత, స్పీడ్‌లో ఎయిర్‌టెల్ దూకుడు..

నివేదిక గణాంకాలను పరిశీలిస్తే.. విశ్వసనీయత (Reliability) విషయంలో ఎయిర్‌టెల్ జియో కంటే దాదాపు 15 శాతం మెరుగ్గా నిలిచింది. డౌన్‌లోడ్, అప్‌లోడ్ స్పీడ్‌లో ఏకంగా 26 శాతం వేగంగా దూసుకెళ్లింది.

విశ్వసనీయత స్కోరులో ఎయిర్‌టెల్ 66.3 శాతంతో మొదటి స్థానంలో ఉండగా.. జియో 64.7 శాతంతో రెండో స్థానంలో నిలిచింది. బీఎస్ఎన్ఎల్ 61.0 శాతంతో మూడో స్థానంలో ఉంది. అంటే.. కనెక్షన్ తెగిపోకుండా, స్థిరంగా నెట్ అందడంలో ఎయిర్‌టెల్ యూజర్లకు మెరుగైన అనుభవం లభిస్తోందని అర్థం.

ఫిక్స్‌డ్ వైర్‌లెస్ యాక్సెస్ (FWA) విభాగంలో కూడా ఐదింటికి ఐదు పారామీటర్లలో ఎయిర్‌టెల్ క్లీన్ స్వీప్ చేయడం గమనార్హం.

జియోను దాటేసిన బీఎస్ఎన్ఎల్.. స్పీడ్ రేసులో సంచలనం..

సాధారణంగా పోటీ ఎయిర్‌టెల్-జియో మధ్యే ఉంటుందని అందరూ భావిస్తారు. కానీ ఈసారి బీఎస్ఎన్ఎల్ తన సత్తా చాటింది.

డౌన్‌లోడ్ స్పీడ్‌లో: ఎయిర్‌టెల్ 38.4 పాయింట్లతో టాప్‌లో ఉంటే.. బీఎస్ఎన్ఎల్ 37.9 పాయింట్లతో రెండో స్థానంలో నిలిచింది. జియో 30.5 పాయింట్లతో మూడో స్థానానికి పడిపోయింది.

అప్‌లోడ్ స్పీడ్‌లో: 26.7 పాయింట్లతో ఎయిర్‌టెల్ ప్రథమ స్థానంలో, 25.9 పాయింట్లతో బీఎస్ఎన్ఎల్ ద్వితీయ స్థానంలో నిలవగా.. 21.0 పాయింట్లతో జియో చివరి స్థానంలో ఉండిపోయింది.

ముఖ్యంగా వర్క్ ఫ్రమ్ హోమ్ చేసేవారికి, కంటెంట్ క్రియేటర్లకు అప్‌లోడ్ స్పీడ్ కీలకం. ఈ విషయంలో బీఎస్ఎన్ఎల్ జియో కంటే మెరుగైన సేవలు అందిస్తుందని ఈ నివేదిక స్పష్టం చేస్తోంది.

వీడియో ఎక్స్‌పీరియన్స్‌లో నువ్వా-నేనా?

వీడియో ఎక్స్‌పీరియన్స్ విషయంలో మూడు సంస్థల మధ్య హోరాహోరీ పోటీ నెలకొంది. ఎయిర్‌టెల్ 70.6 పాయింట్లతో విజేతగా నిలవగా.. జియో 70.0 పాయింట్లు, బీఎస్ఎన్ఎల్ 69.0 పాయింట్లు సాధించాయి.

అంటే.. మూడు నెట్‌వర్క్‌లలోనూ బఫరింగ్ లేకుండా హై-క్వాలిటీ వీడియోలు చూడవచ్చు. అయితే స్వల్ప తేడాతో ఎయిర్‌టెల్ ముందంజలో ఉంది.

అలాగే నిరంతర నాణ్యత (Consistent Quality) విషయంలోనూ ఎయిర్‌టెల్ విజేతగా నిలిచింది. అంటే పగలు-రాత్రి తేడా లేకుండా ఎయిర్‌టెల్ యూజర్లకు స్థిరమైన స్పీడ్ అందుతోంది. దీన్ని బట్టి జియో, బీఎస్ఎన్ఎల్‌లో అంతరాయం ఉంటుందని కాదు.. పోల్చిచూస్తే ఎయిర్‌టెల్ కాస్త మెరుగ్గా ఉందని అర్థం చేసుకోవాలి.

మొబైల్ డేటా యుద్ధంలో జియో దూసుకెళ్తున్నా.. ఇంటి బ్రాడ్‌బ్యాండ్ విషయంలో మాత్రం ఎయిర్‌టెల్ ఇంకా రారాజే అని ఈ నివేదిక తేల్చింది. అదే సమయంలో తక్కువ ధరకు సేవలు అందించే బీఎస్ఎన్ఎల్ స్పీడ్ విషయంలో జియోను ఓడించడం సామాన్యులకు శుభవార్త.

కొత్త బ్రాడ్‌బ్యాండ్ కనెక్షన్ తీసుకోవాలనుకునే వారు కేవలం బ్రాండ్‌ను చూసి కాకుండా.. తమ ప్రాంతంలో స్పీడ్, విశ్వసనీయత, ధరను బేరీజు వేసుకోవడం మంచిదని నిపుణులు సూచిస్తున్నారు.