8,000mAh బ్యాటరీతో ఒప్పో ఫైండ్ X10.. కెమెరా మామూలుగా లేదు.!

ప్రముఖ టెక్ దిగ్గజం ఒప్పో తమ నెక్స్ట్ జనరేషన్ ఫ్లాగ్‌షిప్ స్మార్ట్‌ఫోన్ లైనప్ 'ఒప్పో ఫైండ్ X10' సిరీస్‌ను మార్కెట్‌లోకి తీసుకురావడానికి వేగంగా అడుగులు వేస్తోంది. గతంలో వచ్చిన ఫైండ్ X9 సిరీస్‌లో కంపెనీ కేవలం రెండు మోడళ్లను మాత్రమే మార్కెట్‌లోకి తీసుకురాగా, ఈసారి వినియోగదారుల కోసం ఫైండ్ X10, ఫైండ్ X10 ప్రో , అత్యంత ప్రీమియం వేరియంట్ అయిన ఫైండ్ X10 ప్రో మాక్స్ అనే మూడు మోడళ్లను అందించనున్నట్లు టెక్ వర్గాలు వెల్లడిస్తున్నాయి. ఈ కొత్త ఫోన్లు ముందుగా చైనాలో లాంచ్ కానున్నప్పటికీ, వీటికి సంబంధించిన పలు ఆసక్తికరమైన వివరాలు, లీకైన ఫీచర్లు ఇప్పుడు సోషల్ మీడియాలో విపరీతంగా వైరల్ అవుతున్నాయి.

భారత మార్కెట్‌లో లాంచ్ దాదాపు ఖాయం

చైనాలో అధికారికంగా విడుదల కాకముందే, ఈ సిరీస్‌కు చెందిన రెండు మోడళ్లు భారత ప్రమాణాల సంస్థ బిఐఎస్ (BIS) సర్టిఫికేషన్ వెబ్‌సైట్‌లో దర్శనమివ్వడం విశేషం. ప్రముఖ టిప్‌స్టర్ అన్విన్ రాజ్ వాలియాతర అందించిన సమాచారం ప్రకారం, CPH2911, CPH2913 మోడల్ నంబర్లతో రెండు ఒప్పో పరికరాలు బిఐఎస్ డేటాబేస్‌లో నమోదయ్యాయి. ఇందులో ప్రామాణిక మోడల్ ఒప్పో ఫైండ్ X10 కాగా, రెండవది ఒప్పో ఫైండ్ X10 ప్రో మాక్స్ అని తెలుస్తోంది. బిఐఎస్ లిస్టింగ్ ద్వారా ఈ స్మార్ట్‌ఫోన్లు చైనా లాంచ్ ముగిసిన వెంటనే అత్యంత వేగంగా భారత మార్కెట్‌లో కూడా అందుబాటులోకి రానున్నాయని స్పష్టమవుతోంది. అయినప్పటికీ, కంపెనీ ఇప్పటివరకు ఖచ్చితమైన లాంచ్ తేదీని లేదా ధరల వివరాలను అధికారికంగా ప్రకటించాల్సి ఉంది.

ఒప్పో ఫైండ్ X10 డిస్‌ప్లే, ప్రాసెసర్ , కెమెరా విప్లవం

ఈ సిరీస్‌లోని స్టాండర్డ్ మోడల్ ఒప్పో ఫైండ్ X10 ఫీచర్ల విషయానికొస్తే, ఇది వినియోగదారులకు సరికొత్త అనుభూతిని అందించనుంది. ఇందులో గేమ్ ప్రియులు , వీడియో ప్రియుల కోసం ప్రత్యేకంగా బిటి.2020 (BT.2020) ఆల్ట్రావైడ్ కలర్ సపోర్ట్ కలిగిన అత్యాధునిక గేమింగ్ డిస్‌ప్లేను అందించనున్నారు. ఇక కెమెరా విభాగంలో కంపెనీ భారీ మార్పులు చేస్తోంది. వెనుక వైపు రెండు 200-మెగాపిక్సెల్ ప్రైమరీ , అల్ట్రా-వైడ్ కెమెరాలతో పాటు ఒక శక్తివంతమైన టెలిఫోటో కెమెరాను అమర్చనున్నట్లు వార్తలు వస్తున్నాయి. ఫోన్ వేగవంతమైన పెర్ఫార్మెన్స్ కోసం ఇందులో మీడియాటెక్ త్వరలో విడుదల చేయనున్న డైమెన్సిటీ 9600 ప్రాసెసర్‌ను ఉపయోగించనున్నారు. అంతేకాకుండా, సుదీర్ఘమైన బ్యాటరీ లైఫ్ కోసం ఇందులో భారీ 8,000mAh బ్యాటరీని అందించడం ఈ ఫోన్‌లోని అతిపెద్ద విశేషం.

టాప్-ఎండ్ మోడల్ ఒప్పో ఫైండ్ X10 ప్రో మాక్స్ ప్రత్యేకతలు

మరోవైపు అత్యంత హంగులతో రూపుదిద్దుకుంటున్న ఒప్పో ఫైండ్ X10 ప్రో మాక్స్ డిజైన్ , లీకైన సమాచారం టెక్ ప్రపంచంలో సంచలనం సృష్టిస్తోంది. లీకైన పిక్చర్ల ప్రకారం ఇది బ్లూ , వైట్ రంగుల్లో ఎంతో ఆకర్షణీయమైన ఫ్లాట్ రియర్ ప్యానెల్‌తో రానుంది. ఫోన్ వెనుక భాగంలో పైన ఎడమ వైపున చతురస్రాకార (స్క్వేర్) కెమెరా ఐలాండ్‌ను అమర్చారు. ఈ ప్రీమియం మోడల్‌లో కూడా ట్రిపుల్ రియర్ కెమెరా సెటప్ ఉండనుంది. అత్యుత్తమ గేమింగ్ , మల్టీటాస్కింగ్ కోసం ఈ ప్రాసెసర్‌ను 2nm టెక్నాలజీతో రూపొందించిన మీడియాటెక్ డైమెన్సిటీ 9600 ప్రో చిప్‌సెట్‌తో జత చేయనున్నారు. భారీ బ్యాటరీ, ఆకట్టుకునే డిజైన్ , 200 మెగాపిక్సెల్ కెమెరా సెటప్‌తో రాబోతున్న ఒప్పో ఫైండ్ X10 సిరీస్, మార్కెట్‌లోకి అడుగుపెడితే గ్లోబల్ ఫ్లాగ్‌షిప్ స్మార్ట్‌ఫోన్ రంగానికి గట్టి పోటీ ఇచ్చే అవకాశం ఉంది.