అల్గారిథ‌మ్ ఆధారంగా ఉద్యోగుల‌ను తొల‌గిస్తున్నారా.? 30 వేల ఉద్యోగుల తొలగింపులో కొత్త కోణం.?

Oracle Layoffs: టెక్నాలజీ దిగ్గజం ఒరాకిల్ (Oracle) తాజాగా ప్రకటించిన భారీ ఉద్యోగాల తొలగింపు ప్రపంచవ్యాప్తంగా పెద్ద చర్చకు దారితీసింది. వేలాది మంది ఉద్యోగులు ఒక్కసారిగా ఉద్యోగాలు కోల్పోవడంతో ఈ నిర్ణయం వెనుక కారణాలపై అనేక సందేహాలు వ్యక్తమవుతున్నాయి. ముఖ్యంగా కంపెనీలో 30 సంవత్సరాలకు పైగా పనిచేసిన ఒక మాజీ ఉద్యోగి చేసిన వ్యాఖ్యలు ఇప్పుడు కొత్త చర్చకు దారి తీస్తున్నాయి.

ఒకేసారి 30 వేల ఉద్యోగాల కోత

బుధవారం ఒరాకిల్ సంస్థ 30,000 ఉద్యోగాల తొలగింపును ప్రకటించింది. టెక్ రంగంలో జరిగిన అతిపెద్ద లేఆఫ్‌లలో ఇది ఒకటిగా భావిస్తున్నారు. ఈ నిర్ణయం వల్ల కంపెనీలో పనిచేస్తున్న మొత్తం ఉద్యోగుల్లో సుమారు 19 శాతం మంది ప్రభావితమయ్యారు. సేల్స్, హ్యూమన్ రిసోర్సెస్, ఇంజినీరింగ్, డెవలపర్ విభాగాల్లో పనిచేస్తున్న ఉద్యోగులు ఎక్కువగా ప్రభావితమయ్యారని నివేదికలు చెబుతున్నాయి. ఏప్రిల్ 1న ఉదయం 6 గంటలకు (ప్రపంచవ్యాప్తంగా అన్ని టైమ్ జోన్లలో) కంపెనీ నాయకత్వం ఉద్యోగులకు మెయిల్ పంపింది. అందులో “సంస్థలో విస్తృతమైన మార్పులు జరుగుతున్నాయి” అని పేర్కొంటూ ఉద్యోగాల కోతను ప్రకటించింది.

34 సంవత్సరాల తర్వాత ఉద్యోగం కోల్పోయిన ఉద్యోగి

ఒరాకిల్‌లో మూడు దశాబ్దాలకు పైగా పనిచేసిన నినా లూయిస్ (Nina Lewis) అనే మాజీ ఉద్యోగి తన అనుభవాన్ని లింక్డిన్‌లో పంచుకున్నారు. ఆమె సెక్యూరిటీ అలర్ట్ మేనేజర్‌గా పనిచేశారు. ఉద్యోగం కోల్పోయిన తర్వాత ఆమె ఇలా రాసుకొచ్చారు. “ఒరాకిల్‌లో 34 సంవత్సరాలు పనిచేసిన తర్వాత ఇప్పుడు నేను కూడా ఉద్యోగం కోల్పోయిన 30 వేల మందిలో ఒకరిగా చేరాను. ఇది నిజంగా పెద్ద షాక్. నా తోటి సహోద్యోగుల్లో చాలా ప్రతిభావంతులు కూడా ఉద్యోగాలు కోల్పోయారు.” ఆమె చేసిన ఈ పోస్టు సోషల్ మీడియాలో వేగంగా వైరల్ అయింది.

లేఆఫ్‌ల వెనుక అల్గారిథమ్ ఉందా?

నినా లూయిస్ చేసిన మరో వ్యాఖ్య పెద్ద చర్చకు దారి తీసింది. ఆమె మాటల్లో, ఉద్యోగాల తొలగింపులో ఒక అల్గారిథమ్ ఉపయోగించి నిర్ణయం తీసుకున్నట్లు కనిపిస్తోంది. ఆమె అభిప్రాయం ప్రకారం, ముఖ్యంగా సీనియర్ స్థాయి వ్యక్తిగత కాంట్రిబ్యూటర్లు, మధ్యస్థాయి మేనేజర్లు, ఇంకా పూర్తిగా పొందని స్టాక్ ఆప్షన్స్ ఉన్న ఉద్యోగులపై ఎక్కువగా ప్రభావం పడిందని సూచించారు. అంటే కంపెనీకి ఇంకా ఇవ్వాల్సిన స్టాక్ ఆప్షన్స్ ఉన్న సీనియర్ ఉద్యోగులను లక్ష్యంగా చేసుకుని ఉద్యోగాల కోత జరిగిందేమో అన్న అనుమానాన్ని ఆమె వ్యక్తం చేశారు. అయితే ఈ ఆరోపణలను స్వతంత్రంగా ధృవీకరించడం ఇప్పటివరకు సాధ్యం కాలేదు.

సోషల్ మీడియాలో ఉద్యోగుల స్పందనలు

నినా లూయిస్ పోస్టు తర్వాత లింక్డిన్‌లో వందలాది మంది ఉద్యోగులు తమ అనుభవాలను పంచుకున్నారు. కొంతమంది యువ ఉద్యోగులు, మరికొందరు అనుభ‌వంఉన్న వారు కూడా ఈ లేఆఫ్‌ల వల్ల ఉద్యోగాలు కోల్పోయామని చెప్పారు. చాలామంది ప్రస్తుతం కొత్త ఉద్యోగ అవకాశాల కోసం ప్రయత్నిస్తున్నట్లు పోస్టులు చేస్తున్నారు. దీంతో టెక్ రంగంలో ఈ సంఘటన పెద్ద చర్చకు దారి తీసింది.

AI డేటా సెంటర్ల కోసం ఖర్చులు మళ్లింపు

ఈ ఉద్యోగాల కోత వెనుక ప్రధాన కారణం ఖర్చులను తగ్గించడం అని మీడియా నివేదికలు చెబుతున్నాయి. ఒరాకిల్ సంస్థ ప్రస్తుతం భారీగా AI డేటా సెంటర్ల అభివృద్ధిపై పెట్టుబడులు పెట్టాలని నిర్ణయించింది. ఈ ప్రాజెక్టులకు నిధులు సమకూర్చేందుకు సంస్థ వ్యయాలను తగ్గించే చర్యల్లో భాగంగా ఉద్యోగాల కోత చేపట్టినట్లు సమాచారం. కంపెనీ ప్రభావిత ఉద్యోగులకు సెవరెన్స్ ప్యాకేజీ కూడా అందిస్తోంది. అమెరికాలో ఉన్న ఉద్యోగులకు కనీసం నాలుగు వారాల బేసిక్ జీతం, అదనంగా ప్రతి సంవత్సరం సేవకు ఒక వారం జీతం ఇవ్వనున్నారు. మొత్తం కలిపి ఈ సెవరెన్స్ గరిష్టంగా 26 వారాల వరకు ఉండవచ్చు.