Wi-Fi Router: వై-ఫై రౌటర్ హ్యాక్ కాకుండా ఉండాలంటే ఈ సెట్టింగ్‌లను ఇప్పుడే మార్చుకోండి

Wi-Fi Router: ప్రస్తుత ఆధునిక కాలంలో ఇంట్లోని వై-ఫై రౌటర్ కేవలం ఇంటర్నెట్ అందించే ఒక చిన్న పరికరం మాత్రమే కాదు. స్మార్ట్‌ఫోన్‌‌లు, ల్యాప్‌టాప్‌లు, స్మార్ట్ టీవీలు, సెక్యూరిటీ కెమెరాలు, స్మార్ట్ బల్బులు వంటి అనేక రకాల ఐవోటీ గ్యాజెట్లు అన్నీ ఇదే నెట్‌వర్క్ ఆధారంగా ఆన్‌లైన్‌లో పనిచేస్తున్నాయి. ఒకవేళ రౌటర్ భద్రత బలహీనంగా ఉంటే కేవలం ఇంటర్నెట్ కనెక్షన్ మాత్రమే కాకుండా దానికి అనుసంధానించిన ఇతర విలువైన పరికరాలు కూడా తీవ్రమైన ప్రమాదంలో పడే అవకాశం ఉంది. అందువల్ల కొన్ని అత్యవసర సెట్టింగ్‌లను మార్చడం ద్వారా హోమ్ నెట్‌వర్క్ భద్రతను పదిలంగా ఉంచుకోవచ్చు.

అడ్మిన్ ప్యానెల్ లాగిన్, పాస్‌వర్డ్ మార్పు

రౌటర్ సెట్టింగ్‌లను మార్చడానికి ముందుగా అడ్మిన్ ప్యానెల్‌లోకి లాగిన్ కావాల్సి ఉంటుంది. దీనికోసం బ్రౌజర్‌లో సాధారణంగా పేర్కొన్న ఐపీ అడ్రస్‌ను ఎంటర్ చేయాలి. రౌటర్ కొనుగోలు చేసినప్పుడు కంపెనీ ఇచ్చే డిఫాల్ట్ యూజర్‌నేమ్ అలాగే పాస్‌వర్డ్‌ను వెంటనే మార్చుకోవడం చాలా ముఖ్యం. అదేవిధంగా వై-ఫై పేరుతో పాటు దాని పాస్‌వర్డ్‌ను కూడా కొత్తది సెట్ చేసుకోవాలి. ఎస్ఎస్ఐడీలో రౌటర్ మోడల్ పేరు స్పష్టంగా కనిపించకుండా ఉంచడం మంచిది. వై-ఫై సెక్యూరిటీ ఆప్షన్‌లో వీలైనంత వరకు డబ్ల్యూపీఏ త్రీ పర్సనల్ విధానాన్ని ఎంచుకోవాలి.

అతిథుల కోసం గెస్ట్ నెట్‌వర్క్ ఏర్పాటు

ఇంటికి వచ్చే చుట్టాలు లేదా అతిథులకు మెయిన్ వై-ఫై పాస్‌వర్డ్ ఇవ్వకుండా వేరుగా గెస్ట్ నెట్‌వర్క్ ఆప్షన్‌ను వాడడం సురక్షితం. దీనిద్వారా అతిథుల ఫోన్లు లేదా ల్యాప్‌టాప్‌లు మీ ప్రధాన నెట్‌వర్క్‌కు దూరంగా వేరే కనెక్షన్‌లో ఉంటాయి. అంతేకాకుండా స్మార్ట్ బల్బులు, కెమెరాల వంటి పరికరాల కోసం కూడా గెస్ట్ నెట్‌వర్క్‌ను ఉపయోగించవచ్చు. దీనివల్ల ఏదైనా ఒక పరికరంలో భద్రతా సమస్య తలెత్తితే అది మీ మెయిన్ నెట్‌వర్క్‌ వరకు విస్తరించకుండా నిరోధించవచ్చు.

డబ్ల్యూపీఎస్, రిమోట్ మేనేజ్‌మెంట్ నిలిపివేత

డబ్ల్యూపీఎస్ అనగా వై-ఫై ప్రొటెక్టెడ్ సెటప్ అనేది సులభంగా డివైజ్‌లను కనెక్ట్ చేయడానికి ఉపయోగపడినప్పటికీ పిన్ ఆధారిత వ్యవస్థ భద్రత పరంగా బలహీనంగా ఉంటుంది. దీన్ని ఉపయోగించకపోతే రౌటర్ సెట్టింగ్స్‌లో ఆప్షన్‌ను ఆఫ్‌ చేయడం మంచిది. అలాగే ఇంట్లో లేనప్పుడు ఇంటర్నెట్ ద్వారా అడ్మిన్ ప్యానెల్ ఓపెన్ చేసే రిమోట్ మేనేజ్‌‌మెంట్ ఫీచర్‌ను కూడా డిసేబుల్ చేయాలి. టెల్నెట్ వంటి సేవలు అవసరం లేకపోతే వాటిని నిలిపివేయడం ద్వారా హ్యాకర్ల ముప్పును పూర్తిగా తగ్గించవచ్చు.

ఫర్మ్‌వేర్ అప్‌డేట్లు ఎప్పుడూ తనిఖీ చేయాలి

చివరిగా రౌటర్ ఫర్మ్‌వేర్ అప్‌డేట్ సెక్షన్‌కు వెళ్లి ఎప్పుడైనా కొత్త అప్‌డేట్లు అందుబాటులో ఉన్నాయో లేదో చూసుకోవాలి. ఆటోమేటిక్ ఫర్మ్‌వేర్ అప్‌డేట్ ఆప్షన్ ఆన్ చేసి ఉంచడం ద్వారా భద్రతా లోపాలు సులభంగా సరిదిద్దబడతాయి. ఒకవేళ మీ రౌటర్ చాలా పాతదైపోయి కంపెనీ ఎలాంటి సెక్యూరిటీ అప్‌డేట్లు ఇవ్వకపోతే దాన్ని మార్చడమే అత్యంత సురక్షితమైన మార్గమని నిపుణులు సూచిస్తున్నారు.