Solar Power Bank: సోలార్ పవర్ బ్యాంక్ వచ్చేసిందోచ్.. ఫీచర్లు, ధర ఎంతంటే?

Solar Power Bank: ప్రయాణాల్లో ఉన్నప్పుడు మొబైల్ ఛార్జింగ్ అయిపోతే పడే ఇబ్బందులు అన్నీ ఇన్నీ కావు. సాధారణ పవర్ బ్యాంకులు ఉన్నా, వాటిని ఛార్జ్ చేయడానికి మళ్ళీ విద్యుత్ అవసరం అవుతుంది. ఈ సమస్యకు పరిష్కారంగా 'సోలీ' అనే సరికొత్త సోలార్ పవర్ బ్యాంక్ మార్కెట్లోకి వస్తోంది. ఇది ఎటువంటి ప్లగ్ పాయింట్ అవసరం లేకుండా కేవలం ఎండ సహాయంతోనే మీ ఫోన్‌ను ఛార్జ్ చేయగలదు.

ఈ సోలీ పవర్ బ్యాంక్ 20,000 ఎంఏహెచ్ సామర్థ్యం కలిగిన భారీ బ్యాటరీతో రూపొందించబడింది. ఇది ఎంత శక్తివంతమైనదంటే, ఐఫోన్ 17 ప్రో మాక్స్ వంటి అత్యాధునిక ఫోన్లను ఏకంగా 4 సార్లు పూర్తిస్థాయిలో ఛార్జ్ చేయగలదు. ఇందులో రెండు టైప్-సి పోర్ట్‌లు ఉన్నాయి, ఇవి 140 వాట్ల వేగవంతమైన అవుట్‌పుట్‌ను అందిస్తాయి. దీనివల్ల కేవలం కొన్ని నిమిషాల్లోనే రెండు ఫోన్లను ఒకేసారి ఛార్జ్ చేయడమే కాకుండా, ల్యాప్‌టాప్‌లకు కూడా పవర్ అందించవచ్చు.

వినూత్నమైన సోలార్ ప్యానెల్..

ఈ పరికరం పైభాగంలో ఒక చిన్న సోలార్ ప్యానెల్ అమర్చబడి ఉంటుంది. మీరు ఆరుబయట లేదా ప్రయాణాల్లో ఉన్నప్పుడు, ఇది గంటకు 800 ఎంఏహెచ్ చొప్పున సూర్యరశ్మి ద్వారా ఛార్జ్ అవుతుంది. విద్యుత్ సౌకర్యం లేని మారుమూల ప్రాంతాల్లో పర్యటించే పర్వతారోహకులకు, పర్యాటకులకు ఇది ఎంతో ఉపయోగకరంగా ఉంటుంది. ప్యానెల్‌పై గీతలు పడకుండా ఒక ప్రత్యేక రక్షణ పొరను కూడా ఏర్పాటు చేశారు.

పేలుడు భయం లేని సాలిడ్-స్టేట్ సాంకేతికత..

సాధారణ బ్యాటరీలలో మండే స్వభావం ఉన్న ద్రవ పదార్థాలు ఉంటాయి. కానీ, ఈ పవర్ బ్యాంకులో 'సాలిడ్-స్టేట్' బ్యాటరీని వాడారు. దీనివల్ల ఎక్కువ సేపు వాడినా వేడెక్కడం లేదా మంటలు రావడం వంటి ప్రమాదాలు ఉండవు. ఒకవేళ పొరపాటున ఈ బ్యాటరీకి రంధ్రం పడినా లేదా దెబ్బతిన్నా ఇది పేలిపోయే అవకాశం లేదని తయారీ సంస్థ ధీమా వ్యక్తం చేస్తోంది. దీని బయటి కవచం నీటి నుంచి షాక్ నుంచి రక్షణ కల్పిస్తుంది.

దీనిని కేవలం పవర్ బ్యాంకులానే కాకుండా, ట్రావెల్ అడాప్టర్‌గా కూడా ఉపయోగించవచ్చు. గోడ సాకెట్‌కు కనెక్ట్ చేసినప్పుడు ఇది కేవలం 26 నిమిషాల్లోనే పూర్తి ఛార్జింగ్ అవుతుంది. అంతేకాకుండా, ఇది 'పాస్-థ్రూ' ఛార్జింగ్‌ను సపోర్ట్ చేస్తుంది. అంటే, పవర్ బ్యాంక్ ఛార్జ్ అవుతున్నప్పుడే దానికి కనెక్ట్ చేసిన ఇతర పరికరాలకు నేరుగా పవర్ అందిస్తుంది.

లభ్యత, ధర..

ప్రస్తుతం ఈ పరికరం అమెరికా మార్కెట్లో అందుబాటులోకి రానుంది. దీని అసలు ధర సుమారు 115 డాలర్లుగా నిర్ణయించగా, ప్రారంభ ఆఫర్ కింద 79 డాలర్లకే (సుమారు 7,480 రూపాయలు) లభిస్తోంది. ప్రస్తుతం ఇది భారతదేశంలో నేరుగా అందుబాటులో లేనప్పటికీ, త్వరలోనే అంతర్జాతీయ మార్కెట్లోకి విడుదలయ్యే అవకాశం ఉంది.