Sony PlayStation : PS5 గేమర్లకు సోనీ బిగ్ సర్‌ప్రైజ్.. కొత్త హెడ్‌సెట్లు వచ్చేశాయ్

సోనీ సంస్థ తన ప్లేస్టేషన్ 5 (PS5) గేమింగ్ ప్రియుల కోసం ఆడియో విభాగాన్ని మరింత బలోపేతం చేస్తూ రెండు కొత్త వైర్‌లెస్ హెడ్‌సెట్లను ప్రకటించింది. ‘ప్లేస్టేషన్ పల్స్ (PlayStation Pulse)’ , ‘పల్స్ ఎడ్జ్ (Pulse Edge)’ పేర్లతో వస్తున్న ఈ సాధనాలు గేమర్లకు అద్భుతమైన ఆడియో అనుభవాన్ని అందించేందుకు సిద్ధమయ్యాయి. మెరుగైన ఆడియో స్పష్టత కోసం వీటిలో ప్లానార్ మాగ్నెటిక్ డ్రైవర్లను (Planar Magnetic Drivers) అమర్చారు. అయితే, హై-ఎండ్ మోడల్ అయిన పల్స్ ఎడ్జ్‌లో యాక్టివ్ నోయిస్ క్యాన్సిలేషన్ (ANC) , తీసివేసేందుకు వీలుగా ఉండే డిటాచబుల్ బూమ్ మైక్రోఫోన్ వంటి అదనపు ఫీచర్లను చేర్చారు. ఈ రెండు ఉత్పత్తులు కూడా మిడ్‌నైట్ బ్లాక్ , వైట్ కలర్ ఆప్షన్లలో లభిస్తాయి.

లభ్యత , విడుదల వివరాలు

ఈ కొత్త హెడ్‌సెట్ల ధరల వివరాలను సోనీ ఇంకా అధికారికంగా వెల్లడించలేదు. ప్లేస్టేషన్ పల్స్ వైర్‌లెస్ హెడ్‌సెట్ ఈ ఏడాది నవంబర్-డిసెంబర్ (హాలిడే సీజన్) నాటికి కొన్ని ఎంపిక చేసిన అంతర్జాతీయ మార్కెట్లలో అందుబాటులోకి రానుంది. ఇక ప్రీమియం మోడల్ అయిన పల్స్ ఎడ్జ్ హెడ్‌సెట్ 2027 ప్రారంభంలో మార్కెట్లోకి అడుగుపెడుతుందని సోనీ స్పష్టం చేసింది. అయితే భారత మార్కెట్లో వీటి లభ్యత , ప్రీ-ఆర్డర్ ప్రారంభ తేదీలపై స్పష్టత రావాల్సి ఉంది.

అద్భుతమైన ఆడియో సాంకేతికత , ఫీచర్లు

గేమ్‌లో శత్రువుల అడుగుల చప్పుడు, గన్ రీలోడింగ్ వంటి చిన్న చిన్న శబ్దాలను కూడా దిశలతో సహా అత్యంత స్పష్టంగా గుర్తించేందుకు ఈ హెడ్‌సెట్లలోని ప్రత్యేక ప్లానార్ మాగ్నెటిక్ డ్రైవర్లు సహాయపడతాయి. సాధారణ పల్స్ మోడల్‌లో ప్రతి డ్రైవర్‌కు 4 మ్యాగ్నెట్లు ఉండగా, పల్స్ ఎడ్జ్ మోడల్‌లో ఏకంగా 8 మ్యాగ్నెట్లు ఇచ్చారు. దీనివల్ల ఎడ్జ్ వేరియంట్ రెట్టింపు మ్యాగ్నెట్ వాల్యూమ్‌తో మరింత లోతైన, నాణ్యమైన బాస్ (Bass) ను అందిస్తుంది. టైప్-సి కనెక్టర్ ఉండే 'ప్లేస్టేషన్ లింక్' అడాప్టర్ ద్వారా PS5, ప్లేస్టేషన్ పోర్టల్, పిసి , మ్యాక్ పరికరాలకు అతి తక్కువ లాటెన్సీతో ఆడియోను వేగంగా ప్రసారం చేయవచ్చు. అంతేకాకుండా, బ్లూటూత్ పరికరాలకు కూడా వీటిని ఒకే సమయంలో కనెక్ట్ చేసుకోవచ్చు.

మైక్రోఫోన్ , డిజైన్ ప్రత్యేకతలు

వాయిస్ చాట్ చేసే సమయంలో అనవసరమైన బ్యాక్‌గ్రౌండ్ శబ్దాలను నివారించడానికి ఏఐ (AI) సాంకేతికతతో పనిచేసే నోయిస్ రిజెక్షన్ మైక్రోఫోన్లను ఇందులో ఇచ్చారు. సాధారణ పల్స్ హెడ్‌సెట్‌లో ఇన్‌బిల్ట్ మైక్ ఉండగా, పల్స్ ఎడ్జ్‌లో బయటకు తీయగలిగే బూమ్ మైక్‌తో పాటు లోపల మరొక హిడెన్ మైక్రోఫోన్ కూడా ఉంది. వినియోగదారుల సౌకర్యం కోసం వీటి డిజైన్‌ను మార్చారు; ఇయర్‌కప్‌లు తిరిగేలా (Rotating Earcups) ఉండటం వల్ల వీటిని సులభంగా తీసుకెళ్లవచ్చు. పల్స్ ఎడ్జ్ మోడల్‌లో అదనంగా ఏఎన్‌సి సపోర్ట్, క్యారీయింగ్ కేస్, ఆడియో/మైక్ జాక్ , గేమ్ ఆడియో-చాట్ బ్యాలెన్స్ కంట్రోల్స్ లభిస్తాయి.