WhatsApp: వాట్సాప్‌లో అదిరిపోయే ఫీచర్.. ఫొటో, వీడియో లేకుండానే స్టేటస్‌లో లొకేషన్
వాట్సాప్‌ స్టేటస్‌లో ఫొటో, వీడియో లేకుండానే లొకేషన్ షేర్ చేసుకునే కొత్త ఫీచర్‌ను తీసుకొచ్చేందుకు సంస్థ సిద్ధమవుతోంది. ఆండ్రాయిడ్‌ బీటా వెర్షన్‌లో ఈ ఆప్షన్‌ కనిపించింది.
WhatsApp: వాట్సాప్‌ వాడేవారికి ఉపయోగపడే కొత్త ఫీచర్ అందుబాటులోకి వచ్చే సూచనలు కనిపిస్తున్నాయి. ఇకపై స్టేటస్‌లో లొకేషన్ షేర్ చేయడానికి ఫొటో లేదా వీడియోను ఎంచుకోవాల్సిన అవసరం లేకుండా ప్రత్యేక ఆప్షన్‌ను తీసుకొచ్చేందుకు సంస్థ సిద్ధమవుతోంది. ఈ ఫీచర్ అందుబాటులోకి వస్తే నేరుగా మ్యాప్‌ రూపంలో మనం ఉన్న ప్రదేశాన్ని స్టేటస్‌లో పెట్టుకోవచ్చు. ఆండ్రాయిడ్‌ బీటా వెర్షన్‌లో ఈ కొత్త ఆప్షన్‌ను గుర్తించినట్లు వాట్సాప్‌ ఫీచర్లను పరిశీలించే WABetaInfo వెల్లడించింది.
ఫొటో, వీడియో అవసరం లేకుండానే లొకేషన్ షేర్
ప్రస్తుతం వాట్సాప్‌ స్టేటస్‌లో లొకేషన్ పెట్టాలంటే ముందుగా గ్యాలరీ నుంచి ఫొటో లేదా వీడియోను ఎంచుకోవాలి. ఆ తర్వాత ఎడిటింగ్‌ ఆప్షన్లలోకి వెళ్లి లొకేషన్ స్టిక్కర్‌ను జోడించాలి. అప్పుడే ఆ ప్రదేశం వివరాలను స్టేటస్‌లో చూపించే అవకాశం ఉంటుంది. ఈ ప్రక్రియను సులభతరం చేయడమే లక్ష్యంగా వాట్సాప్‌ కొత్త ఫీచర్‌ను తీసుకొస్తోంది. స్టేటస్‌ క్రియేట్‌ చేసే సమయంలోనే ప్రత్యేకంగా Location ఆప్షన్‌ కనిపించనుంది. దానిపై క్లిక్‌ చేస్తే నేరుగా లొకేషన్ షేర్ చేసుకోవచ్చు.
మ్యాప్‌ కార్డులో పేరు, అడ్రస్‌ వివరాలు
కొత్త ఫీచర్‌లో లొకేషన్ సాధారణ స్టిక్కర్‌లా కాకుండా మ్యాప్‌ కార్డు రూపంలో కనిపించనుంది. అందులో మ్యాప్‌తో పాటు ఆకుపచ్చ రంగు పిన్‌ ఉంటుంది. మనం ఎంచుకున్న ప్రదేశం పేరు, పూర్తి చిరునామా కూడా కనిపిస్తాయి. స్టేటస్‌ చూసే వారికి స్క్రీన్‌ పైభాగంలో లొకేషన్ వివరాలను చూసే ఆప్షన్‌ కనిపించవచ్చు. దానిపై ట్యాప్‌ చేస్తే మ్యాప్‌ను పెద్దగా తెరిచి ప్రదేశాన్ని మరింత స్పష్టంగా చూసే వీలుంటుంది. దీంతో స్టిక్కర్‌పై క్లిక్‌ చేసి వివరాలు వెతకాల్సిన అవసరం తగ్గుతుంది.
కచ్చితమైన లొకేషన్ వద్దనుకుంటే మరో అవకాశం
లొకేషన్ షేర్ చేసేటప్పుడు ప్రైవసీకి కూడా ప్రాధాన్యం ఇవ్వనున్నారు. వాట్సాప్‌కు ఫోన్‌ లొకేషన్ అనుమతి ఇచ్చిన తర్వాత యాప్‌ ప్రస్తుత ప్రదేశాన్ని చూపిస్తుంది. దాన్ని పరిశీలించి నిర్ధారించిన తర్వాతే స్టేటస్‌లో షేర్ చేయవచ్చు. అయితే తమ కచ్చితమైన లొకేషన్‌ను ఇతరులకు చూపించడం ఇష్టం లేనివారు ఫోన్‌ సెట్టింగ్స్‌లో Approximate Location అనుమతిని ఎంచుకోవచ్చు. అంటే ఖచ్చితమైన ప్రదేశానికి బదులుగా సుమారు ప్రాంతం మాత్రమే అందుబాటులో ఉంటుంది. అంతేకాదు, ప్రస్తుతం ఉన్న ప్రదేశం కాకుండా వేరే ప్రాంతాన్ని కూడా స్వయంగా ఎంచుకుని స్టేటస్‌లో పెట్టుకోవచ్చు.
ఆండ్రాయిడ్‌ యూజర్లకు ముందుగా వచ్చే అవకాశం
WABetaInfo నివేదిక ప్రకారం.. వాట్సాప్‌ ఆండ్రాయిడ్‌ బీటా వెర్షన్‌ 2.26.45.8లో ఈ ఫీచర్ కనిపించింది. అయితే ప్రస్తుతం ఇది అభివృద్ధి దశలోనే ఉంది. బీటా పరీక్షకులకు కూడా ఇంకా అందుబాటులోకి రాలేదు. కాబట్టి సాధారణ యూజర్లు ఇప్పుడే ఈ ఆప్షన్‌ను ఉపయోగించలేరు. వాట్సాప్‌ అధికారికంగా విడుదల తేదీని ప్రకటించలేదు. పరీక్షలు పూర్తయ్యాకే అందరికీ అందుబాటులోకి వచ్చే అవకాశం ఉంది. ఈ ఫీచర్ ఐఫోన్‌ యూజర్లకు ఎప్పుడు వస్తుందనే విషయంపైనా ప్రస్తుతానికి స్పష్టత లేదు.
CR Reddy
2014లో జర్నలిస్ట్‌గా నా కెరీర్ ప్రారంభించాను. పలు వెబ్‌సైట్‌లలో కంటెంట్ రైటర్‌గా పని చేశాను. డిజిటల్‌ రంగాల్లో 11 ఏళ్లకు పైగా అనుభవం ఉంది. బిజినెస్, ఆటోమొబైల్, స్పోర్ట్స్, మూవీస్, టెక్నాలజీ, పాలిటిక్స్, వైరల్, బిజినెస్‌కు సంబంధించిన కంటెంట్‌ను రాయగలను. ముఖ్యంగా ఆటోమొబైల్, బిజినెస్, బ్రేకింగ్ న్యూస్ రాయడంలో నైపుణ్యం ఉంది.