వాట్సాప్ ఆండ్రాయిడ్ యాప్‌లో సరికొత్త మార్పు.. త్వరలో రానున్న అదిరిపోయే ఫీచర్..!

WhatsApp Android update: మెటా యాజమాన్యంలోని ప్రముఖ మెసేజింగ్ యాప్ వాట్సాప్ ఆండ్రాయిడ్ యూజర్ల కోసం సరికొత్త యూజర్ ఇంటర్‌ఫేస్ (UI) మార్పును పరీక్షిస్తోంది. ఈ కొత్త రూపకల్పనలో యాప్ దిగువన ఉండే బాటమ్ నేవిగేషన్ బార్ (Bottom Navigation Bar) పూర్తిగా కొత్త లుక్‌తో కనిపించనుంది. స్క్రీన్ కింద అంచుకు అతుక్కుని ఉండే సాధారణ బార్‌కు బదులుగా, స్క్రీన్ నుంచి కాస్త పైకి తేలుతున్నట్లు కనిపించే ఫ్లోటింగ్ బార్‌ను (Floating Bar) తీసుకురానున్నారు. దీని మూలలు గుండ్రంగా (Rounded Corners) ఉండి ఐఫోన్ యాప్ తరహా అనుభూతిని అందించనున్నాయి.

డబ్ల్యూఏబీటాఇన్ఫో (WABetaInfo) నివేదిక ప్రకారం, ఈ సరికొత్త ఫ్లోటింగ్ బార్ ఆండ్రాయిడ్ బీటా వెర్షన్ 2.26.38.10లో కనిపించింది. అయితే ప్రస్తుతం ఈ ఫీచర్ ఇంకా అభివృద్ధి దశలోనే ఉన్నందున బీటా టెస్టర్లకు కూడా నేరుగా కనిపించడం లేదు. ఈ నయా లేఅవుట్‌లో చాట్స్, అప్‌డేట్స్, కమ్యూనిటీస్ మరియు కాల్స్ ట్యాబ్‌లు ఎప్పటిలాగే క్రిందనే కొనసాగుతాయి. వాట్సాప్ ఈ మార్పును లైట్ మరియు డార్క్ రెండు థీమ్‌లలోనూ పరీక్షిస్తోంది.

గతంలో ఐఓఎస్ (iOS) ప్లాట్‌ఫామ్‌పై ఆపిల్ లిక్విడ్ గ్లాస్ డిజైన్‌కు అనుగుణంగా ఇలాంటి ఫ్లోటింగ్ ట్యాబ్ బార్‌ను పరిచయం చేశారు. అందులో రౌండెడ్ మూలలతో పాటు పారదర్శక (See-Through) ప్రభావం కూడా ఉంటుంది. అయితే గూగుల్ డిజైన్ మార్గదర్శకాల కారణంగా ఆండ్రాయిడ్‌లో ఆ పారదర్శక ఎఫెక్ట్ ఉంటుందా లేదా అనేది ఇంకా స్పష్టత రాలేదు.

వాట్సాప్ సుమారు మూడేళ్ల క్రితం 2023లో బీటా వెర్షన్ 2.23.10.6 ద్వారా మెయిన్ ట్యాబ్‌లను కిందికి మార్చింది. ఆ తర్వాత బాటమ్ బార్‌లో వస్తున్న అతిపెద్ద మార్పు ఇదే కానుంది. సాధారణ వినియోగదారులకు ఈ ఫీచర్ ఎప్పుడు అందుబాటులోకి వస్తుందనే దానిపై కంపెనీ ఇంకా అధికారిక ప్రకటన చేయలేదు.