Wedding Card Scam : వాట్సాప్‌లో వెడ్డింగ్ కార్డ్.. ఓపెన్ చేస్తే బ్యాంక్ ఖాతా ఖాళీ

Wedding Card Scam : భారత్‌‌లో వాట్సాప్ వినియోగదారులను లక్ష్యంగా చేసుకుని సైబర్ నేరగాళ్లు మరో కొత్త తరహా మోసానికి శ్రీకారం చుట్టారు. పెళ్లి పత్రిక పేరుతో అత్యంత నమ్మశక్యంగా డిజిటల్ ఆహ్వాన పత్రికలను పంపుతూ, వాటి ద్వారా హానికరమైన ఎపికె (APK) ఫైళ్లను ఆండ్రాయిడ్ ఫోన్లలోకి ఇన్స్టాల్ చేయిస్తున్నారు. పెళ్లి పిలుపు అనగానే సాధారణంగా ఎవరూ అనుమానించరనే బలహీనతను ఆసరాగా చేసుకుని హ్యాకర్లు ఈ సైబర్ దాడికి తెగబడుతున్నారు. దీనివల్ల బాధితుల వ్యక్తిగత సమాచారం చోరీకి గురవ్వడమే కాకుండా బ్యాంక్ ఖాతాల నుంచి డబ్బులు తుడుచుపెట్టుకుపోయే ప్రమాదం ఉంది.

ఈ వాట్సాప్ వెడ్డింగ్ కార్డ్ స్కామ్ ఎలా జరుగుతుంది?

ఈ సైబర్ మోసం సాధారణంగా ఒక వాట్సాప్ సందేశంతో మొదలవుతుంది. అందులో ఒక ఆహ్వాన లేఖతో పాటు సాధారణ చిత్రం (Image) లేదా పిడిఎఫ్ (PDF) ఫైలుకు బదులుగా ఒక ఎపికె (.apk) ఫైల్ జతచేసి ఉంటుంది. డిజిటల్ వెడ్డింగ్ కార్డును చూడటానికి ఈ ఫైల్‌ను డౌన్లోడ్ చేయాలని మెసేజ్‌లో కోరతారు. కొన్నిసార్లు పరిచయం లేని నంబర్ల నుంచే కాకుండా, మనకు తెలిసిన వ్యక్తుల నంబర్లు హ్యాక్ అయినప్పుడు వారి ఖాతాల నుంచి కూడా ఇలాంటి సందేశాలు రావచ్చు. సందేశం నిజమైనదేనని నమ్మి యూజర్లు ఆ ఫైల్‌ను ఇన్స్టాల్ చేసేలా చేయడమే స్కామర్ల ప్రధాన ఉద్దేశం.

ఎపికె (APK) ఫైళ్లు ఎందుకు అత్యంత ప్రమాదకరం?

ఎపికె అనేది ఆండ్రాయిడ్ పరికరాలలో యాప్‌లను ఇన్స్టాల్ చేయడానికి ఉపయోగించే ఫైల్ ఫార్మాట్. గూగుల్ ప్లే స్టోర్ వంటి అధికారిక యాప్ స్టోర్ల నుంచి కాకుండా వాట్సాప్ ద్వారా వచ్చే ఎపికె ఫైళ్లు అనధికారిక మూలాల (Unknown Sources) నుంచి వస్తాయి. ఇటువంటి హానికరమైన ఎపికె ఫైల్‌ను ఫోన్‌లో ఇన్స్టాల్ చేసినప్పుడు, అది వినియోగదారుడికి తెలియకుండానే ఫోన్‌లోని వివిధ పర్మిషన్లను (Permissions) హ్యాకర్లకు కట్టబెడుతుంది. దీని ద్వారా ఫోన్‌లోని డేటాను దొంగిలించి, ఆర్థిక మోసాలకు దారితీసే రహదారిని సుగమం చేసుకుంటారు.

బ్యాంక్ ఖాతాలు ఎలా ఖాళీ అవుతాయి?

మాలిషియస్ సాఫ్ట్‌వేర్ లేదా స్పైవేర్ ఫోన్‌లో ఇన్స్టాల్ అయిన వెంటనే, హ్యాకర్లు బాధితుడి ఫోన్‌లోని సున్నితమైన సమాచారాన్ని, ముఖ్యంగా బ్యాంకింగ్ వివరాలు , ఆర్థిక లావాదేవీలకు వచ్చే ఓటీపీ (OTP) సందేశాలను రహస్యంగా యాక్సెస్ చేస్తారు. ఫోన్ సందేశాలను రీడ్ చేసే పర్మిషన్ సాధించడం ద్వారా, వినియోగదారుడికి తెలియకుండానే బ్యాంక్ ఖాతాల నుంచి డబ్బును ఇతర ఖాతాలకు తరలించేస్తారు. అందుకే ఎంత నమ్మదగిన సందేశం వచ్చినప్పటికీ, తెలియని ఎపికె ఫైళ్లను ఇన్స్టాల్ చేయడం అత్యంత ప్రమాదకరం.

వాట్సాప్‌‌లో సురక్షితంగా ఉండటానికి తీసుకోవాల్సిన జాగ్రత్తలు

అపరిచిత నంబర్ల నుంచి పెళ్లి పత్రికల పేరుతో వచ్చే ఎలాంటి ఎపికె ఫైళ్లను డౌన్లోడ్ లేదా ఇన్స్టాల్ చేయకూడదు. ఒకవేళ మీకు తెలిసిన వ్యక్తి నంబర్ నుంచే అకస్మాత్తుగా ఎపికె ఫైల్ వస్తే, ఫైల్ ఓపెన్ చేయడానికి ముందే ఆ వ్యక్తికి ఫోన్ చేసి నిర్ధారించుకోవడం మంచిది. ఆండ్రాయిడ్ ఫోన్ సెట్టింగ్స్‌లో 'ఇన్స్టాల్ ఫ్రమ్ అన్‌నోన్ సోర్సెస్' (Install from Unknown Sources) ఆప్షన్‌ను ఎట్టి పరిస్థితుల్లోనూ ఆన్ చేయకూడదు.

ఒకవేళ మీరు ఇప్పటికే పొరపాటున ఏదైనా అనుమానాస్పద ఎపికె ఫైల్‌ను ఇన్స్టాల్ చేసి ఉంటే, వెంటనే మీ ఫోన్‌లో ఎలాంటి బ్యాంకింగ్ యాప్‌లను ఓపెన్ చేయకూడదు. తక్షణమే మీ సంబంధిత బ్యాంక్‌ను సంప్రదించి ఖాతాలను తాత్కాలికంగా నిలిపివేయడం లేదా పాస్‌వర్డ్‌‌లను మార్చుకోవడం శ్రేయస్కరం. డిజిటల్ యుగంలో ఆహ్వాన పత్రికల ముసుగులో వచ్చే ఇలాంటి సైబర్ మోసాల పట్ల తీవ్ర అప్రమత్తత అవసరం.