Phone Overheating: ఫోన్ ఎక్కువగా వేడెక్కితే ముందుగా దెబ్బతినే భాగం ఏంటో తెలుసా?

Phone Overheating: వేసవిలో ఎల‌క్ట్రానిక్ ప్రొడ‌క్ట్స్ బాగా వేడెక్కుతున్నాయి. ముఖ్యంగా స్మార్ట్‌ఫోన్లు ఎక్కువగా వేడెక్కడం (ఓవర్‌హీటింగ్) ఇప్పుడు సాధారణ సమస్యగా మారింది. కొన్నిసార్లు ఫోన్‌లు పేలిన సంద‌ర్భాలు కూడా ఉన్నాయి. అయితే ఫోన్ వేడెక్కితే ఏ భాగం ముందుగా దెబ్బతింటుందో తెలుసా?

ఫోన్ వేడెక్కితే ముందుగా దెబ్బతినేది బ్యాటరీనే

మొబైల్ నిపుణుల ప్రకారం ఫోన్ ఓవర్‌హీట్ అయినప్పుడు ఎక్కువ ప్రభావం పడేది బ్యాటరీపైనే. అధిక ఉష్ణోగ్రతలలో ఎక్కువసేపు ఉండటం వల్ల బ్యాటరీ సామర్థ్యం క్రమంగా తగ్గిపోతుంది. ఫలితంగా బ్యాటరీ త్వరగా ఖాళీ అవడం, ఛార్జ్ ఎక్కువసేపు నిల్వ లేకపోవడం వంటి సమస్యలు వస్తాయి. కొన్ని సందర్భాల్లో బ్యాటరీ ఉబ్బిపోవడం, ఫోన్ అకస్మాత్తుగా స్విచ్ ఆఫ్ కావడం కూడా జరుగుతుంది. సమస్యను నిర్లక్ష్యం చేస్తే తర్వాత మదర్‌బోర్డ్, ప్రాసెసర్ వంటి కీలక భాగాలపై కూడా ప్రభావం పడే అవకాశం ఉంటుంది. అందుకే ఫోన్ ఓవర్‌హీటింగ్‌ను లైట్‌ తీసుకోకూడదు.

ఫోన్ ఎక్కువగా వేడెక్కడానికి ప్రధాన కారణాలు ఏంటి?

ఫోన్ వేడెక్కడానికి అనేక కారణాలు ఉంటాయి. ముఖ్యంగా ఎక్కువసేపు గేమ్స్ ఆడటం, హై రిజల్యూషన్ వీడియోలు రికార్డ్ చేయడం, నిరంతరం వీడియోలు చూడటం, ఒకేసారి అనేక యాప్‌లు బ్యాక్‌గ్రౌండ్‌లో పనిచేయడం వంటి కారణాలు ఫోన్ ఉష్ణోగ్రతను పెంచుతాయి. అలాగే నెట్‌వర్క్ సిగ్నల్ బలహీనంగా ఉన్న ప్రాంతాల్లో ఇంటర్నెట్ ఉపయోగించినప్పుడు కూడా ఫోన్ ఎక్కువ శక్తిని వినియోగిస్తుంది. ఫాస్ట్ ఛార్జింగ్ సమయంలో ఫోన్ వాడటం, నాణ్యతలేని ఛార్జర్లు ఉపయోగించడం, ఫోన్ స్టోరేజ్ పూర్తిగా నిండిపోవడం కూడా ఓవర్‌హీటింగ్‌కు కారణమవుతాయి.

ఎండలో ఫోన్ ఉంచడం ప్రమాదకరం

వేసవి కాలంలో నేరుగా సూర్యకిరణాలు పడే చోట ఫోన్ ఉంచడం చాలా ప్రమాదకరం. ముఖ్యంగా కారులో ఫోన్ వదిలేయడం వల్ల లోపలి ఉష్ణోగ్రతలు భారీగా పెరిగి ఫోన్‌కు నష్టం కలిగించవచ్చు. కొంతమంది ఫోన్ త్వరగా చల్లబడాలని ఫ్రిజ్‌లో లేదా ఐస్ దగ్గర ఉంచుతుంటారు. అయితే ఇది కూడా మంచిది కాదు. ఒక్కసారిగా ఉష్ణోగ్రత మారడం వల్ల ఫోన్ లోపల తేమ ఏర్పడే అవకాశం ఉంటుంది. దీంతో అంతర్గత భాగాలు దెబ్బతినే ప్రమాదం పెరుగుతుంది.

ఫోన్ ఎక్కువగా వేడెక్కితే వెంటనే చేయాల్సిన పనులు

ఫోన్ అధికంగా వేడెక్కినట్లు అనిపిస్తే ముందుగా ఛార్జర్‌ను వెంటనే తీసేయాలి. తర్వాత ఫోన్‌కు ఉన్న మందమైన బ్యాక్ కవర్‌ను తొలగించడం మంచిది. ఇలా చేయడం వల్ల వేడి సులభంగా బయటకు వెళ్లిపోతుంది. కొంతసేపు ఫోన్‌ను ఎయిర్‌ప్లేన్ మోడ్‌లో పెట్టడం లేదా పూర్తిగా స్విచ్ ఆఫ్ చేయడం కూడా ఉపయోగకరంగా ఉంటుంది. బలహీనమైన నెట్‌వర్క్ ఉన్నప్పుడు ఫోన్ నిరంతరం సిగ్నల్ కోసం ప్రయత్నిస్తూ ఉంటుంది. దీనివల్ల బ్యాటరీ, ప్రాసెసర్‌పై అదనపు ఒత్తిడి పెరుగుతుంది. కాబట్టి కొంతసేపు మొబైల్ డేటా లేదా నెట్‌వర్క్‌ను ఆఫ్ చేయడం మంచిది.

ఆండ్రాయిడ్ యూజర్లు మార్చాల్సిన సెట్టింగ్స్

ఆండ్రాయిడ్ ఫోన్ వినియోగదారులు అవసరం లేని Wi-Fi స్కానింగ్, బ్లూటూత్ స్కానింగ్ ఫీచర్లను ఆఫ్ చేయవచ్చు. అలాగే ఉపయోగంలో లేని యాప్‌లకు ఇచ్చిన లోకేషన్, మైక్రోఫోన్ అనుమతులను తొలగించడం కూడా బ్యాటరీ వినియోగాన్ని తగ్గిస్తుంది. 120Hz డిస్‌ప్లే ఉన్న ఫోన్లలో రిఫ్రెష్ రేట్‌ను 60Hzకు మార్చితే బ్యాటరీపై భారం తగ్గి ఫోన్ తక్కువగా వేడెక్కుతుంది. ఫోన్‌లో ఫాస్ట్ ఛార్జింగ్ సదుపాయం ఉంటే, తరచూ ఓవర్‌హీటింగ్ సమస్య ఎదురవుతున్నప్పుడు వేసవిలో దాన్ని తాత్కాలికంగా నిలిపివేయడం కూడా ప్రయోజనకరంగా ఉంటుంది.