యూఎస్బీ కేబుల్, పెన్డ్రైవ్పై రెండు చతురస్రాకార రంధ్రాలు ఎందుకు ఉంటాయో తెలుసా? అసలు కారణం ఇదే!
USB Square Holes: యూఎస్బీ కేబుల్ లేదా పెన్డ్రైవ్పై కనిపించే రెండు చిన్న చతురస్రాకార రంధ్రాలను ఎప్పుడైనా గమనించారా? అవి కేవలం డిజైన్ కోసం ఇచ్చినవి కావు. యూఎస్బీ పోర్టులో కనెక్షన్ గట్టిగా ఉండేలా చేసే కీలకమైన లాకింగ్ మెకానిజంలో అవి భాగం.
యూఎస్బీ కేబుల్, పెన్డ్రైవ్పై రెండు చతురస్రాకార రంధ్రాలు ఎందుకు ఉంటాయో తెలుసా? అసలు కారణం ఇదే!
USB Square Holes: మనలో చాలామంది యూఎస్బీ కేబుల్ లేదా పెన్డ్రైవ్ను ప్రతిరోజూ ఉపయోగిస్తుంటారు. అయితే వాటి చివర భాగంలో కనిపించే రెండు చిన్న చతురస్రాకార రంధ్రాలను ఎప్పుడైనా గమనించారా? చాలామంది వాటిని కేవలం డిజైన్లో భాగంగా భావిస్తారు. కానీ వాటి వెనుక కీలకమైన సాంకేతిక కారణం ఉంది. యూఎస్బీ పోర్టులో కనెక్షన్ గట్టిగా ఉండటానికి, కేబుల్ సులభంగా బయటకు రాకుండా చూసేందుకు ఈ రంధ్రాలు ఉపయోగపడతాయి.
యూఎస్బీ Type-Aలో ఆ రెండు రంధ్రాలు ఎందుకు?
యూఎస్బీ Type-A కనెక్టర్ను నిశితంగా పరిశీలిస్తే దాని చివరి భాగంలో రెండు చిన్న చతురస్రాకార రంధ్రాలు కనిపిస్తాయి. అదే విధంగా యూఎస్బీ పోర్టు లోపల రెండు చిన్న స్ప్రింగ్ క్లిప్లు ఉంటాయి. కేబుల్ను పోర్టులోకి పంపించినప్పుడు ఈ క్లిప్లు ఆ రంధ్రాల్లోకి వెళ్లి లాక్ అవుతాయి.
ఈ విధానం వల్ల యూఎస్బీ కేబుల్ లేదా పెన్డ్రైవ్ పోర్టులో గట్టిగా అమరిపోతుంది. కదలికల వల్ల కనెక్షన్ వెంటనే వదులుకాకుండా ఉంటుంది. ఫైళ్లను ట్రాన్స్ఫర్ చేస్తున్నప్పుడు లేదా పరికరాన్ని ఛార్జింగ్ చేస్తున్నప్పుడు కనెక్షన్ మధ్యలో తెగిపోయే అవకాశాన్ని తగ్గిస్తుంది. కేబుల్ను అమర్చినప్పుడు వినిపించే చిన్న 'క్లిక్' శబ్దానికి కూడా ఈ లాకింగ్ విధానమే కారణం.
యూఎస్బీ Type-Cలో రంధ్రాలు లేకపోయినా కనెక్షన్ ఎలా గట్టిగా ఉంటుంది?
యూఎస్బీ Type-C కనెక్టర్లో బయటకు కనిపించే ఇలాంటి చతురస్రాకార రంధ్రాలు ఉండవు. అయినప్పటికీ అది పోర్టులో గట్టిగా ఉంటుంది. ఎందుకంటే Type-Cలో వేరే లాకింగ్ విధానం ఉంటుంది. పోర్టులోని స్ప్రింగ్తో కూడిన చిన్న భాగాలు కనెక్టర్ లోపలి గాడుల్లోకి అమరుతాయి. దీంతో కనెక్షన్ స్థిరంగా ఉంటుంది.
మరో ప్రత్యేకత ఏమిటంటే యూఎస్బీ Type-C కేబుల్ను ఏ వైపు నుంచి అయినా పోర్టులో అమర్చవచ్చు. అంటే తలకిందులుగా పెట్టినా పనిచేస్తుంది. అందుకే పాత యూఎస్బీ Type-Aతో పోలిస్తే దీన్ని ఉపయోగించడం మరింత సులభం.
పాత కేబుళ్లలో కనెక్షన్ను ఎలా బిగించేవారు?
యూఎస్బీకు ముందు, ఇతర కనెక్టర్లలోనూ కనెక్షన్ గట్టిగా ఉండేందుకు భిన్నమైన పద్ధతులు ఉపయోగించేవారు. ఉదాహరణకు డీవీఐ కేబుళ్లలో పోర్టుకు ఇరువైపులా ఉండే స్క్రూలను బిగించడం ద్వారా కనెక్షన్ను స్థిరంగా ఉంచేవారు.
మైక్రో యూఎస్బీ కనెక్టర్లో మాత్రం స్ప్రింగ్ క్లిప్లు కేబుల్ చివరి భాగంలోనే ఉండేవి. కాలక్రమేణా అవి అరిగిపోయినా, పరికరంలోని పోర్టు దెబ్బతినకుండా కేబుల్ను మార్చుకునే అవకాశం ఉండేది.
ఇప్పుడు యూఎస్బీ Type-C ఎందుకు ఎక్కువగా వాడుతున్నారు?
యూరోపియన్ యూనియన్ 2022లో యూఎస్బీ Type-Cను కామన్ ఛార్జింగ్ ప్రమాణంగా తీసుకొచ్చే నిబంధనలను ఆమోదించింది. 2023లో విడుదలైన ఐఫోన్ 15 సిరీస్లోనూ యూఎస్బీ Type-C కనెక్టర్ను ప్రవేశపెట్టారు. దీంతో స్మార్ట్ఫోన్లు, ల్యాప్టాప్లు, ఇతర ఎలక్ట్రానిక్ పరికరాల్లో Type-C వినియోగం మరింత పెరిగింది. అయినప్పటికీ ఆఫీసులు, కంప్యూటర్లు, వివిధ యాక్సెసరీల్లో యూఎస్బీ Type-A కనెక్టర్లు ఇప్పటికీ విస్తృతంగా కనిపిస్తూనే ఉన్నాయి.




