సీసీటీవీలకన్నా డేంజర్ మీ ఇంట్లోని వైఫై రౌటర్‌.. 24 గంటలు మీపై నిఘా..?

WiFi router spying: ఇంటర్నెట్ కోసం మనం వాడే వైఫై రౌటర్ ఇప్పుడు మన పాలిట శత్రువుగా మారుతోందా? అవుననే అంటున్నారు శాస్త్రవేత్తలు. జేబులో స్మార్ట్‌ఫోన్ లేకపోయినా, ఎలాంటి డివైజ్ చేతిలో లేకపోయినా కేవలం మీ శరీర కదలికల ఆధారంగా వైఫై రౌటర్ మిమ్మల్ని గుర్తుపట్టేస్తుందని, మీ ప్రతి కదలికను కనిపెడుతుందని జర్మనీ పరిశోధకులు బాంబు లాంటి నిజం పేల్చారు.

కొత్త ముప్పు ‘బీఎఫ్ఐడీ’ (BFId): వైఫై తరంగాలతో నిఘా నీడ..

ప్రస్తుత డిజిటల్ యుగంలో ఇళ్లలోనే కాదు.. ఆఫీసులు, హోటళ్లు, కేఫ్‌లు, విమానాశ్రయాల్లో వైఫై రౌటర్లు సర్వసాధారణం అయిపోయాయి. అయితే, జర్మనీకి చెందిన ‘కార్ల్స్‌రూహే ఇన్‌స్టిట్యూట్ ఆఫ్ టెక్నాలజీ’ (KIT) పరిశోధకులు చేసిన తాజా అధ్యయనంలో ఒక నకిలీ వైఫై దాడి వెలుగుచూసింది. దీనికి వారు ‘BFId’ అని పేరు పెట్టారు. ఈ సరికొత్త నిఘా సాంకేతికత ద్వారా మన చుట్టూ ఉండే సాధారణ వైఫై రౌటర్లను అత్యంత ప్రమాదకరమైన నిఘా చేసే వస్తువులుగా మార్చవచ్చని శాస్త్రవేత్తలు హెచ్చరిస్తున్నారు.

ఫోన్ స్విచ్ఛాఫ్ చేసినా సరే.. 99.5% ఖచ్చితత్వంతో గుర్తింపు..!

సాధారణంగా సీసీటీవీ కెమెరాలు ఉంటేనే మనపై నిఘా ఉందని భయపడతాం. కానీ ఈ సరికొత్త టెక్నాలజీ ప్రకారం, మీరు వైఫై నెట్‌వర్క్ పరిధిలోకి రాగానే మీ శరీరం ద్వారా వెలువడే రేడియో తరంగాల్లో వచ్చే మార్పులను రౌటర్ రికార్డ్ చేస్తుంది. ప్రతి మనిషి శరీరాకృతి, వారు నడిచే విధానం వేర్వేరుగా ఉంటాయి. ఈ ప్రత్యేక శారీరక కదలికల ఆధారంగా, మెషిన్ లెర్నింగ్ మోడల్స్ సహాయంతో వైఫై రౌటర్లు ఏకంగా 99.5 శాతం ఖచ్చితత్వంతో మిమ్మల్ని గుర్తించగలవు. దీనికోసం మీ చేతిలో ఫోన్ ఉండాల్సిన అవసరం లేదు, ఒకవేళ మీ మొబైల్ ఫోన్ పూర్తిగా స్విచ్ఛాఫ్ చేసి ఉన్నా సరే ఈ నిఘా నుంచి తప్పించుకోలేరు.

మీకు తెలియకుండానే రహస్య కనెక్షన్..!

పరిశోధనలో పాల్గొన్న శాస్త్రవేత్త జూలియన్ టోడ్ట్ తెలిపిన వివరాల ప్రకారం.. ఈ సాంకేతికత అందుబాటులోకి వస్తే ప్రపంచంలోని ప్రతి రౌటర్ ఒక నిఘా కెమెరాలాగే మారిపోతుంది. ఉదాహరణకు, మీరు ప్రతిరోజూ ఉచిత వైఫై ఉండే ఏదైనా కాఫీ షాప్ లేదా దుకాణం మీదుగా నడుచుకుంటూ వెళ్తుంటే, మీ అనుమతి లేకుండానే మీ ఫోన్ ఆ వైఫై నెట్‌వర్క్‌తో ఒక రహస్య కనెక్షన్ ఏర్పరుచుకుంటుంది. దీనివల్ల మీరు ఆ దారిలో వెళ్లిన ప్రతిసారీ సదరు దుకాణదారుడికి లేదా హ్యాకర్లకు మీ ఉనికి తెలిసిపోతుంది. తదుపరిసారి మీరు అక్కడికి రాగానే ఆ వ్యవస్థ మిమ్మల్ని వెంటనే గుర్తుపట్టేస్తుంది.

ఈ సాంకేతికత ఎలా పనిచేస్తుంది?

ఈ ‘BFId’ దాడి వైఫై 5 (WiFi 5) వెర్షన్ నుంచి అందుబాటులోకి వచ్చిన ‘బీమ్‌ఫార్మింగ్ ఫీడ్‌బ్యాక్ సమాచారం’ (BFI) ఆధారంగా పనిచేస్తుంది. రౌటర్లు తమతో అనుసంధానమైన డివైజ్‌ల నుంచి సిగ్నల్స్ అందుకోవడానికి ఈ ఫీచర్‌ను వాడుతుంటాయి. అయితే, గాలిలో ప్రసారమయ్యే ఈ సిగ్నల్స్‌కు ఎలాంటి భద్రత లేదా లాక్ (ఎన్‌క్రిప్షన్) ఉండదు. దీనిని ఆసరాగా చేసుకుని హ్యాకర్లు సులువుగా డేటాను రికార్డ్ చేస్తారు. మెషిన్ లెర్నింగ్ ద్వారా ఈ సిగ్నల్స్‌ను విశ్లేషించి, నెట్‌వర్క్ పరిధిలో తిరుగుతున్న వ్యక్తుల రేడియో చిత్రాలను (రేడియో ఇమేజ్) సృష్టిస్తారు.

197 మందిపై ప్రయోగం: ప్రభుత్వాలు తప్పుడు దారి పట్టే ప్రమాదం!

ఈ పరిశోధన కోసం శాస్త్రవేత్తలు 197 మందిపై ప్రయోగాలు చేసి, ఈ సాంకేతికత ఎంత ఖచ్చితంగా పనిచేస్తుందో నిరూపించారు. అయితే, డివైజ్ ద్వారా సేకరించిన డేటాను, సదరు వ్యక్తి అసలు పేరుతో ముడిపెట్టడానికి హ్యాకర్లకు మరికొంత అదనపు సమాచారం అవసరమవుతుంది. ఇందుకోసం వారు గతంలో సేకరించిన స్మార్ట్‌ఫోన్ డేటాను వాడుకునే అవకాశం ఉంది. భవిష్యత్తులో ఈ సాంకేతికతను ప్రభుత్వాలు లేదా కొన్ని శక్తులు ప్రజలపై నిఘా పెట్టడానికి, వారి వ్యక్తిగత స్వేచ్ఛను హరించడానికి ఉపయోగించే ప్రమాదం ఉందని పరిశోధకులు ఆందోళన వ్యక్తం చేస్తున్నారు. అందుకే వైఫై ప్రమాణాలలో (IEEE 802.11bf) తక్షణమే కొత్త భద్రతా నిబంధనలు చేర్చాలని వారు డిమాండ్ చేస్తున్నారు.

ఇంటర్నెట్ సౌకర్యం కోసం మనం తెచ్చుకున్న వైఫై రౌటరే మన అంతరంగిక జీవితంలోకి ఇలా దొంగచాటుగా తొంగిచూడటం నిజంగా ఆందోళనకరమైన విషయమే. సాంకేతికత పెరుగుతున్న కొద్దీ భద్రతా లోపాలు కూడా అదే స్థాయిలో పెరుగుతున్నాయి. రాబోయే రోజుల్లో టెక్నాలజీ సంస్థలు వైఫై నెట్‌వర్క్‌ల భద్రతపై కఠినమైన చర్యలు తీసుకోకపోతే, సామాన్యుడి గోప్యత కేవలం ఒక కలగానే మిగిలిపోయే ప్రమాదం ఉంది.