World Wide Web Day 2026: WWW కనుగొన్నది ఇందుకా.. అసలు ఇంటర్నెట్, వరల్డ్ వైబ్ వెబ్ రెండూ ఒకటేనా.. ఆసక్తికర నిజం మీకోసం..!

World Wide Web Day 2026: రోజూ మనం స్మార్ట్‌ఫోన్‌లో బ్రౌజ్ చేసేటప్పుడు ఇంటర్నెట్, వెబ్ అనే రెండు పదాలను దాదాపుగా ఒకే అర్థంతో వాడేస్తుంటాం. కానీ నిజానికి ఈ రెండూ పూర్తిగా వేరువేరు అనే విషయం చాలామందికి అస్సలు తెలియదు. అసలు ఈ వరల్డ్ వైడ్ వెబ్ ఎలా పుట్టింది? ఇంటర్నెట్‌కు దీనికి ఉన్న అసలు తేడా ఏంటి? డబ్ల్యూడబ్ల్యూడబ్ల్యూ (WWW) డే సందర్భంగా ఆ ఆసక్తికరమైన ముచ్చట్లు మీకోసం.

అసలు ఈ వెబ్ కథ ఎక్కడ మొదలైందంటే..

సరిగ్గా 35 ఏళ్ల క్రితం ప్రపంచం రూపురేఖలు మార్చేసే ఒక అద్భుతం జరిగింది. 1989లో టిమ్ బెర్నర్స్-లీ అనే ఇంగ్లీష్ కంప్యూటర్ సైంటిస్ట్ స్విట్జర్లాండ్‌లోని సెర్న్ (CERN) పరిశోధనా సంస్థలో పనిచేస్తున్న సమయంలో ఈ వరల్డ్ వైడ్ వెబ్‌కు (WWW) ప్రాణం పోశాడు. ప్రపంచవ్యాప్తంగా ఉన్న శాస్త్రవేత్తలు తమ పరిశోధనా పత్రాలను సులభంగా పంచుకోవాలనే ఉద్దేశంతో ఆయన ఈ ఆలోచనకు శ్రీకారం చుట్టాడు. 1991లో ప్రజలందరికీ అందుబాటులోకి వచ్చిన ఈ టెక్నాలజీ ఆ తర్వాత ఎలాంటి సంచలనాలు సృష్టించిందో మనందరికీ తెలిసిందే. ప్రతి ఏడాది ఆగస్టు 1వ తేదీని వరల్డ్ వైడ్ వెబ్ డేగా జరుపుకుంటూ ఆ మహానుభావుడికి మనం కృతజ్ఞతలు చెప్పుకుంటాం.

ఇంటర్నెట్ వర్సెస్ వెబ్.. ఈ రెంటికీ తేడా ఏంటి..?

చాలామంది ఇంటర్నెట్ అన్నా, వెబ్ అన్నా ఒకటే అనుకుంటారు. సాంకేతికంగా చూస్తే ఈ రెండింటి మధ్య చాలా పెద్ద తేడా ఉంది. సింపుల్‌గా చెప్పాలంటే ఇంటర్నెట్ అనేది కేబుల్స్, సర్వర్లు, రౌటర్లతో కూడిన ఒక భారీ కమ్యూనికేషన్ నెట్‌వర్క్ వ్యవస్థ. వెబ్ అనేది అందులో నడిచే ఒక సర్వీస్ మాత్రమే. ఒక ఊరిలో ఉండే రోడ్లన్నీ ఇంటర్నెట్ అయితే.. ఆ రోడ్ల పక్కన ఉండే దుకాణాలు, ఇళ్లు వెబ్ లాంటివి. మీరు రోడ్డు మీద ప్రయాణిస్తేనే ఆ దుకాణాలకు వెళ్లగలరు. అంటే ఇంటర్నెట్ అనే పునాది మీద వెబ్ అనే భవనం నిలబడిందన్నమాట. మనం పంపే ఈమెయిల్స్, ఆడే ఆన్‌లైన్ గేమ్స్ అన్నీ ఇంటర్నెట్ కిందకే వస్తాయి. వెబ్‌సైట్లు, అందులోని సమాచారం అంతా వెబ్ పరిధిలోకి వస్తుంది. ఇంటర్నెట్‌ను హార్డ్‌వేర్ అని పిలిస్తే.. వెబ్‌ను సాఫ్ట్‌వేర్ అనొచ్చు.

మన జీవితాలను మార్చేసిన సాంకేతికత..

ఒక్క క్షణం ఆలోచించండి.. గూగుల్ లేదు, ఫేస్‌బుక్ లేదు, ఆన్‌లైన్ షాపింగ్ లేదు.. జీవితం ఎంత బోర్ కొడుతుందో కదా..! ఈ రోజు మనం అనుభవిస్తున్న ఈ డిజిటల్ విప్లవానికి అసలు కారణం వరల్డ్ వైడ్ వెబ్. సమాచారాన్ని ఒకచోట చేర్చి హైపర్‌లింక్స్ ద్వారా ప్రపంచంలో ఎక్కడి నుంచైనా యాక్సెస్ చేసుకునే వెసులుబాటు ఈ టెక్నాలజీ వల్లే సాధ్యమైంది. విద్యార్థులు చదువుకోవాలన్నా, వ్యాపారాలు వృద్ధి చెందాలన్నా, ఇంట్లో కూర్చుని ప్రపంచ విశేషాలు తెలుసుకోవాలన్నా వెబ్ తప్పనిసరి అయిపోయింది. సమాచార పంపిణీని సులభతరం చేసి ప్రపంచాన్ని ఒక చిన్న పల్లెటూరుగా మార్చేసింది.

మిమ్మల్ని ఆశ్చర్యపరిచే ఆసక్తికర నిజాలు..

వరల్డ్ వైడ్ వెబ్‌కు సంబంధించి కొన్ని ఇంట్రెస్టింగ్ ఫాక్ట్స్ ఉన్నాయి. టిమ్ బెర్నర్స్-లీ తయారు చేసిన తొలి వెబ్‌సైట్ ఇప్పటికీ ఆన్‌లైన్‌లో యాక్టివ్‌గానే ఉంది. అందులో వెబ్ అంటే ఏంటి, దాన్ని ఎలా వాడాలి అనే ప్రాథమిక సమాచారం ఉంటుంది. ఈ టెక్నాలజీని కనిపెట్టినందుకు ఆయన ఎలాంటి పేటెంట్ హక్కులు తీసుకోలేదు. అంటే దీన్ని పూర్తిగా ఉచితంగా ప్రపంచానికి బహుమతిగా ఇచ్చేశాడు. దీనివల్ల ఎవరైనా స్వేచ్ఛగా వెబ్‌ను వాడుకునే అవకాశం దక్కింది. మొదట్లో ఈ ప్రాజెక్టుకు 'మెష్' అనే పేరు పెట్టాలని బెర్నర్స్-లీ అనుకున్నారు. అనేక పేర్లు పరిశీలించిన తర్వాత చివరకు 'వరల్డ్ వైడ్ వెబ్' అనే పేరు ఖరారు చేశారు. 1993లో 'మొజాయిక్' అనే తొలి గ్రాఫికల్ బ్రౌజర్ రాకతో వెబ్ రూపురేఖలే మారిపోయాయి. అప్పటివరకు కేవలం టెక్ట్స్ రూపంలో ఉండే వెబ్‌పేజీలు.. బొమ్మలతో ఆకర్షణీయంగా తయారుకావడం మొదలైంది.

హెచ్‌టీఎంఎల్, హెచ్‌టీటీపీల పాత్ర..

మనం ఏదైనా వెబ్‌సైట్ అడ్రస్ టైప్ చేసేటప్పుడు ముందుగా హెచ్‌టీటీపీ (HTTP) అని చూస్తుంటాం. దీని పూర్తి పేరు హైపర్‌టెక్స్ట్ ట్రాన్స్‌ఫర్ ప్రోటోకాల్. వెబ్ సర్వర్‌కు, మీ బ్రౌజర్‌కు మధ్య సమాచారాన్ని మార్పిడి చేసేది ఇదే. అలా వచ్చిన సమాచారాన్ని అందంగా పేజీ రూపంలో చూపించడానికి హెచ్‌టీఎంఎల్ (HTML) అనే భాషను వాడతారు. ఈ రెండింటి కలయిక వల్లే మనం చూసే వెబ్‌సైట్లు పనిచేస్తాయి. ఒకప్పుడు కొన్ని వందల సంఖ్యలో మాత్రమే ఉన్న వెబ్‌సైట్లు.. ఈరోజు వందల కోట్లకు చేరుకున్నాయి. రోజురోజుకూ కొత్త టెక్నాలజీలు పుట్టుకొస్తున్నా.. వాటన్నింటికీ మూలస్తంభం మాత్రం వరల్డ్ వైడ్ వెబ్ అనడంలో ఎలాంటి అతిశయోక్తి లేదు. మానవాళి చరిత్రలో నిప్పు, చక్రం కనిపెట్టడం ఎంత గొప్ప విషయమో.. వెబ్ సృష్టి కూడా అంతే విప్లవాత్మకమైనది.

ఈ ఆవిష్కరణ జరిగి మూడు దశాబ్దాలు దాటినా దీని ప్రాధాన్యత ఇసుమంతైనా తగ్గలేదు. రాబోయే ఆర్టిఫిషియల్ ఇంటెలిజెన్స్ యుగంలో కూడా ఈ వరల్డ్ వైడ్ వెబ్ మరింత కొత్త పుంతలు తొక్కుతూ మన జీవన విధానాన్ని సులభతరం చేయనుంది. డిజిటల్ ప్రపంచంలో ఇదొక మరుపురాని మైలురాయిగా చరిత్రలో శాశ్వతంగా నిలిచిపోతుంది.