Xiaomi Pad 9 సిరీస్ లాంచ్.. 3.2K డిస్‌ప్లే, 11,000mAh బ్యాటరీ

ప్రముఖ టెక్ దిగ్గజం షామీ తన ఫ్లాగ్‌షిప్ టాబ్లెట్ లైనప్‌లో సరికొత్త మోడళ్లను చైనా మార్కెట్‌లో అధికారికంగా విడుదల చేసింది. 'షామీ ప్యాడ్ 9' , 'షామీ ప్యాడ్ 9 ప్రో' పేర్లతో తీసుకొచ్చిన ఈ రెండు టాబ్లెట్లు అద్భుతమైన డిస్‌ప్లే ప్రదర్శన, పవర్‌ఫుల్ ప్రాసెసర్లు , సుదీర్ఘ బ్యాటరీ లైఫ్‌తో వినియోగదారులను విశేషంగా ఆకట్టుకుంటున్నాయి. చైనాలో విడుదలైన ఈ టాబ్లెట్ల ధరలు వేరియంట్లను బట్టి భిన్నంగా ఉన్నాయి. బేస్ మోడల్ షామీ ప్యాడ్ 9లోని 8GB RAM + 128GB వేరియంట్ ధర CNY 2,999 (షుమారు రూ. 42,800)గా ఉంది. అలాగే 8GB + 256GB మోడల్ ధర CNY 3,299 (షుమారు రూ. 47,000) కాగా, టాప్-ఎండ్ 12GB + 256GB మోడల్ ధర CNY 3,799 (షుమారు రూ. 54,000) వద్ద అందుబాటులోకి వచ్చింది. కంటి రక్షణ కోసం ప్రత్యేకంగా డిజైన్ చేసిన 8GB + 256GB 'సాఫ్ట్-లైట్ ఎడిషన్' ధర CNY 3,499 (షుమారు రూ. 49,900)గా నిర్ణయించారు. ఈ మోడల్ సిల్వర్, క్లౌడ్ సీడార్ గ్రీన్, బ్లాక్ , ఐస్ పీచ్ పింక్ రంగుల్లో లభిస్తుంది.

మరోవైపు షామీ ప్యాడ్ 9 ప్రో మోడల్ బేస్ వేరియంట్ (8GB + 128GB) ధర CNY 3,799 (షుమారు రూ. 54,000) నుంచి ప్రారంభమవుతుంది. దీనిలోని 8GB + 256GB ధర CNY 4,099 (షుమారు రూ. 58,500), 12GB + 256GB ధర CNY 4,599 (షుమారు రూ. 65,600) , అత్యధిక మెమరీ ఉన్న 16GB + 256GB వేరియంట్ ధర CNY 4,999 (షుమారు రూ. 71,300)గా నిర్ణయించారు. ప్రో సాఫ్ట్-లైట్ ఎడిషన్ (12GB + 256GB) ధర CNY 4,799 (షుమారు రూ. 68,400)గా ఉంది. ఇది సిల్వర్, క్లౌడ్ సీడార్ గ్రీన్ , బ్లాక్ షేడ్స్‌లో లభిస్తుంది.

డిస్‌ప్లే ప్రదర్శన , పవర్‌ఫుల్ ప్రాసెసర్ సామర్థ్యం

షామీ ప్యాడ్ 9 సిరీస్‌లో విజువల్ ఎక్స్‌పీరియన్స్‌కు అత్యంత ప్రాధాన్యత ఇచ్చారు. ప్రో మోడల్‌లో 12.5-అంగుళాల భారీ డిస్‌ప్లేను అందించగా, సాధారణ షామీ ప్యాడ్ 9 మోడల్‌లో 11.2-అంగుళాల డిస్‌ప్లేను అమర్చారు. ఈ రెండు టాబ్లెట్లు కూడా 3.2K అత్యధిక రెజల్యూషన్, 144Hz అడాప్టివ్ రీఫ్రెష్ రేట్ , 1,000 నిట్స్ పీక్ బ్రైట్‌నెస్‌తో అత్యంత స్పష్టమైన విజువల్స్‌ను అందిస్తాయి.

పనితీరు విషయానికి వస్తే, బేస్ మోడల్ షామీ ప్యాడ్ 9 స్నాప్‌డ్రాగన్ 8s జెన్ 4 చిప్‌సెట్‌తో పనిచేస్తుండగా, ప్రో మోడల్ అత్యంత వేగవంతమైన స్నాప్‌డ్రాగన్ 8 జెన్ 5 ప్రాసెసర్‌ను కలిగి ఉంది. ప్రో మోడల్‌లోని 12GB, 16GB వేరియంట్లలో అధునాతన LPDDR5T RAMను, 8GB వేరియంట్‌లో LPDDR5X RAMను ఉపయోగించారు. అలాగే 128GB మోడల్ UFS 3.1 స్టోరేజ్ కలిగి ఉండగా, మిగిలిన వేరియంట్లు వేగవంతమైన UFS 4.1 స్టోరేజ్‌తో వస్తాయి.

సుదీర్ఘ బ్యాటరీ లైఫ్ , స్మార్ట్ ఫీచర్లు

పనితీరులోనే కాకుండా బ్యాటరీ సామర్థ్యంలోనూ ఈ టాబ్లెట్లు ఆకట్టుకుంటున్నాయి. షామీ ప్యాడ్ 9 ప్రో మోడల్‌లో 67W వైర్డ్ ఫాస్ట్ ఛార్జింగ్ సపోర్ట్‌తో కూడిన భారీ 11,000mAh బ్యాటరీని అమర్చారు. అదే సమయంలో షామీ ప్యాడ్ 9 మోడల్‌లో 45W ఫాస్ట్ ఛార్జింగ్ సపోర్ట్‌తో 9,720mAh బ్యాటరీని ఇచ్చారు. ఈ రెండు డివైజ్‌లు కూడా 22.5W రివర్స్ ఛార్జింగ్‌కు సపోర్ట్ చేస్తాయి. వీటి ద్వారా వరుసగా 14.5 గంటల పాటు షార్ట్ వీడియోలను ప్లే చేయవచ్చని లేదా 20 గంటల పాటు ఆన్‌లైన్ మీటింగ్స్ నిర్వహించవచ్చని కంపెనీ ధృవీకరించింది.

ఈ రెండు టాబ్లెట్లు షామీ సరికొత్త HyperOS 4 ఆపరేటింగ్ సిస్టమ్‌పై పనిచేస్తాయి. ఆఫీస్ , ప్రొడక్టివిటీ పనుల కోసం డెస్క్‌టాప్ స్థాయి అప్లికేషన్లైన WPS ఆఫీస్, జియాన్యింగ్ ప్రో, పిక్సెల్‌కేక్, ZWCAD , CAJ రీడర్ వంటి సాఫ్ట్‌వేర్‌లకు ఇవి సపోర్ట్ చేస్తాయి. వీటితో పాటు వాయిస్ కమాండ్ల కోసం సూపర్‌షియావో AI 2.0 (Super XiaoAI 2.0) వర్చువల్ అసిస్టెంట్‌ను అందించారు. రాయడానికి , డ్రాయింగ్ చేయడానికి ప్రత్యేకంగా లభించే 'షామీ ఫోకస్ స్టైలస్ ప్రో' మద్దతు కూడా ఈ సిరీస్‌కు ఉంది.