Xiaomi Power Bank : షామీ బిగ్ బ్లాస్ట్.. 165W పవర్ బ్యాంక్ లాంచ్.!

Xiaomi Power Bank : ప్రముఖ టెక్ దిగ్గజం షామీ భారత స్మార్ట్‌ఫోన్ మార్కెట్‌ను లక్ష్యంగా చేసుకుని ఒకేసారి మూడు విభిన్నమైన , అత్యంత అడ్వాన్స్‌డ్ పవర్ బ్యాంక్‌లను అధికారికంగా విడుదల చేసింది. క్రెడిట్ కార్డ్ తరహాలో అత్యంత సన్నగా ఉండే 'షామీ ఆల్ట్రాథిన్ మ్యాగ్నెటిక్ పవర్ బ్యాంక్ 5000'తో పాటు, భారీ కెపాసిటీ , ఫాస్ట్ ఛార్జింగ్ సపోర్ట్ ఇచ్చే 'మ్యాగ్నెటిక్ పవర్ బ్యాంక్ 10000', 'షామీ పవర్ బ్యాంక్ 20000' మోడళ్లను భారతీయ వినియోగదారులకు పరిచయం చేసింది.

ధరలు , ఆకర్షణీయమైన లాంచ్ ఆఫర్లు

ఈ కొత్త పవర్ బ్యాంక్‌ల ధరలు , విక్రయాల విషయానికొస్తే కంపెనీ చాలా ఆకర్షణీయమైన ఆఫర్లను ప్రకటించింది. షామీ ఆల్ట్రాథిన్ మ్యాగ్నెటిక్ పవర్ బ్యాంక్ 5000 మోడల్ అసలు ధర రూ. 5,999 కాగా, ప్రారంభ ఆఫర్‌ కింద రూ. 5,499 కే లభించనుంది. ఇది గ్రాఫైట్ బ్లాక్, గ్లేసియర్ సిల్వర్ , రేడియంట్ ఆరెంజ్ రంగుల్లో రానుంది. ఇక 20,000mAh బ్యాటరీ ఉన్న మోడల్ ధర రూ. 4,999 కాగా, మ్యాగ్నెటిక్ 10,000mAh వర్షన్ లాంచ్ ఆఫర్‌‌లో రూ. 3,699 కే అందుబాటులోకి వస్తుంది.

విక్రయ తేదీలు , లభ్యత

ఈ పవర్ బ్యాంక్‌లను కొనుగోలు చేయాలనుకునే వారి కోసం వివిధ ఇ-కామర్స్ , ఆఫ్‌లైన్ ప్లాట్‌ఫారమ్‌లను అందుబాటులోకి తీసుకొచ్చారు. ఆల్ట్రాథిన్ 5000 అలాగే పవర్ బ్యాంక్ 20000 మోడళ్లు సెప్టెంబర్ 11 నుంచి విక్రయానికి రానుండగా, మ్యాగ్నెటిక్ పవర్ బ్యాంక్ 10000 మాత్రం సెప్టెంబర్ 15 నుంచి సేల్‌కు రానుంది. అమెజాన్, ఫ్లిప్‌కార్ట్, షామీ అధికారిక ఆన్‌లైన్/ఆఫ్‌లైన్ స్టోర్లతో పాటు క్విక్ కామర్స్ యాప్‌లైన స్విగ్గీ ఇన్‌స్టామార్ట్, బ్లింకిట్, జెప్టోల ద్వారా కూడా వీటిని నిమిషాల్లో ఆర్డర్ చేసుకోవచ్చు.

కార్డులాంటి ఆల్ట్రాథిన్ డిజైన్

షామీ ఆల్ట్రాథిన్ మ్యాగ్నెటిక్ పవర్ బ్యాంక్ 5000 డిజైన్ పరంగా అందరినీ ఆకట్టుకుంటోంది. ఇది కేవలం 6 మిమీ మందం , 98 గ్రాముల తేలికపాటి బరువుతో మీ జేబులో లేదా చేతిలో సులభంగా ఇమిడిపోతుంది. 5,000mAh బ్యాటరీ సామర్థ్యంతో వచ్చే ఈ పరికరం ఫోన్ వెనుక భాగానికి బలమైన మ్యాగ్నెట్‌తో అతుక్కుని ఛార్జ్ చేస్తుంది. ఇది 15W మ్యాగ్నెటిక్ వైర్‌లెస్ ఛార్జింగ్‌కు, అలాగే కేబుల్ ద్వారా 22.5W ఫాస్ట్ ఛార్జింగ్‌కు సపోర్ట్ ఇస్తుంది.

పవర్ ఫుల్ మ్యాగ్నెటిక్ 10000 ఫీచర్లు

మధ్యస్థాయి విభాగంలో వచ్చిన షామీ మ్యాగ్నెటిక్ పవర్ బ్యాంక్ 10000 వేరియంట్ 10,000mAh సామర్థ్యాన్ని కలిగి ఉంటుంది. ఇది Qi 2.2 వైర్‌లెస్ ఛార్జింగ్ ఫీచర్‌తో ఏకంగా 25W వరకు వేగవంతమైన వైర్‌లెస్ ఛార్జింగ్‌ను అందిస్తుంది. ఫోన్‌కు గట్టిగా అతుక్కునేందుకు ఇందులో 13N మ్యాగ్నెటిక్ పవర్‌ను అందించారు. దీనికి ఉన్న ఇన్-బిల్ట్ టైప్-సి కేబుల్ ద్వారా వైర్డ్ ఛార్జింగ్‌లో 45W వరకు పవర్ అవుట్‌పుట్ పొందవచ్చు.

165W సూపర్ ఫాస్ట్ పవర్ బ్యాంక్ 20000

ఈ లైనప్‌లోనే అత్యంత భారీ సామర్థ్యం ఉన్న పరికరంగా షామీ పవర్ బ్యాంక్ 20000 నిలిచింది. 20,000mAh బ్యాటరీతో వచ్చే ఈ పవర్ బ్యాంక్ ఏకంగా 165W కంబైన్డ్ అవుట్‌పుట్ ఛార్జింగ్‌కు సపోర్ట్ చేస్తుంది. ఇందులో ఉన్న మొదటి టైప్-సి పోర్ట్ ద్వారా 120W, రెండవ పోర్ట్ ద్వారా 45W పవర్ అందుతుంది. దీనివల్ల ల్యాప్‌టాప్‌లు , స్మార్ట్‌ఫోన్‌లను ఒకేసారి హై-స్పీడ్‌లో ఛార్జ్ చేసుకోవడం సాధ్యమవుతుంది. దీనిపై ఛార్జింగ్ , బ్యాటరీ వివరాలను స్పష్టంగా చూపించడానికి ఒక కలర్ డిజిటల్ డిస్‌ప్లేను కూడా అమర్చారు.