Xiaomi Smart AC: స్మార్ట్‌ ఏసీ...15 నిమిషాల్లోనే ఇల్లంతా కూలింగ్‌

Xiaomi Smart AC: ఏప్రిల్‌ నెలలోనే ఎండలు ఠారెత్తిస్తున్నాయి. బయటకు రావాలంటే జనాలు భయపడిపోతున్నారు. ఇంట్లో ఉంటే ఉక్కపోత. ఈ నేపథ్యంలో ఏసీల వినియోగం భారీగా పెరిగిపోయింది. ఇప్పుడు ఏసీ విలాసం కాదు. ఒక అవసరం మాత్రమే. ఈ అవసరాన్ని గుర్తించిన ప్రముఖ టెక్ దిగ్గజం షియోమీ, తన గృహోపకరణాల విభాగంలో సరికొత్త విప్లవాన్ని తెచ్చింది. కేవలం 15 నిమిషాల్లోనే గదిని పూర్తిగా చల్లబరిచే శక్తివంతమైన ‘మిజియా స్ట్రాంగ్ ఎయిర్ 1.5 హెచ్‌పి’ స్ప్లిట్ ఏసీని మార్కెట్లోకి పరిచయం చేసింది. ఈ విశేషాలు ఏమిటో ఇప్పుడు తెలుసుకుందాం.

సూపర్ ఫాస్ట్ కూలింగ్.. అత్యాధునిక డిజైన్

ఈ 1.5 హార్స్‌పవర్ సామర్థ్యం గల ఏసీలో శక్తివంతమైన కంప్రెసర్, పెద్ద ఎయిర్ అవుట్‌లెట్‌తో పాటు అధునాతన ఫ్యాన్ డిజైన్‌ను ఉపయోగించారు. దీనివల్ల గాలి వేగంగా, సమానంగా గది అంతా వ్యాపిస్తుంది. ఎక్కువ ఉష్ణోగ్రతల సమయంలో కూడా వెంటనే చల్లదనం అందించడం దీని ప్రధాన లక్ష్యం. అంతేకాదు, ఈ ఏసీ కేవలం కూలింగ్‌కే పరిమితం కాదు. స్మార్ట్ ఫీచర్లు దీనిని మరింత ప్రత్యేకంగా మారుస్తాయి. మిజియా యాప్‌ ద్వారా వినియోగదారులు తమ స్మార్ట్‌ఫోన్ నుంచే ఏసీని నియంత్రించవచ్చు. ఎక్కడ ఉన్నా ఆన్/ఆఫ్ చేయడం, టెంపరేచర్ మార్చడం సులభం. అంతేకాదు, వాయిస్ కమాండ్ సపోర్ట్ కూడా అందుబాటులో ఉంది. దీంతో పాటు కరెంట్‌ ఆదా విషయంలోనూ ఈ ఏసీ ముందంజలో ఉంది. అత్యుత్తమ ఎనర్జీ రేటింగ్‌తో వస్తుండటంతో విద్యుత్ వినియోగం తగ్గుతుంది. దీని వల్ల కరెంటు బిల్లు కూడా నియంత్రణలో ఉంటుంది.

ఆరోగ్యంపై ప్రత్యేక శ్రద్ధ

ఈ ఏసీ కేవలం గాలిని చల్లబరచడమే కాదు, క్లీన్ కూడా చేస్తుంది. ఇందులో ఉన్న సెల్ఫ్-క్లీనింగ్ టెక్నాలజీ ఏసీ లోపల పేరుకుపోయే బ్యాక్టీరియా, దుమ్మును ఎప్పటికప్పుడు తొలగిస్తుంది. ఫలితంగా మీరు పీల్చే గాలి స్వచ్ఛంగా, వాసన లేకుండా ఉంటుంది. నిశ్శబ్దంగా పనిచేయడం దీని మరో ప్లస్ పాయింట్, దీనివల్ల మీ నిద్రకు ఎలాంటి ఆటంకం కలగదు. ప్రస్తుతం ఈ ఏసీ చైనా మార్కెట్లో అందుబాటులో ఉండగా, త్వరలోనే ఇతర దేశాల్లో కూడా విడుదలయ్యే అవకాశం ఉంది. తక్కువ ధరలో ప్రీమియం ఫీచర్లతో వచ్చే ఈ స్మార్ట్ ఏసీ, వినియోగదారులకు ఒక మంచి ఎంపికగా నిలవనుంది.