Xiaomi Smart Band 11 : రూ.4 వేలకే షావోమి స్మార్ట్ బ్యాండ్.!

Xiaomi Smart Band 11 : ప్రముఖ టెక్ దిగ్గజం షావోమి మార్కెట్‌లోకి కొత్తగా 'షావోమి స్మార్ట్ బ్యాండ్ 11 యాక్టివ్' , 'షావోమి స్మార్ట్ బ్యాండ్ 11' మోడళ్లను పరిచయం చేసింది. గ్లోబల్ మార్కెట్‌తో పాటు చైనాలో కూడా ఈ డివైజ్‌లు అందుబాటులోకి వచ్చాయి. సెప్టెంబర్ 7న చైనాలో జరగబోయే ప్రత్యేక ఈవెంట్‌లో షావోమి 18 ఫోల్డ్ స్మార్ట్‌ఫోన్‌తో పాటు ఇవి అధికారికంగా విక్రయానికి రానున్నాయి. బడ్జెట్ ధరలోనే అధునాతన హెల్త్ ఫీచర్లను అందిస్తుండటంతో ఈ స్మార్ట్ బ్యాండ్లపై వినియోగదారుల్లో ఆసక్తి నెలకొంది.

ధర, లభ్యత వివరాలు

షావోమి స్మార్ట్ బ్యాండ్ 11 యాక్టివ్ ధరను ఆస్ట్రేలియన్ డాలర్లలో AUD 59.50 గా నిర్ణయించారు. ఇది భారత కరెన్సీలో సుమారు రూ. 4,000 వరకు ఉంటుంది. ఈ వేరబుల్ బ్లాక్, గ్రే, , పామిలో పింక్ రంగుల్లో లభించనుంది. కంపెనీ అధికారిక ఆన్‌లైన్ స్టోర్ ద్వారా ఎంపిక చేసిన గ్లోబల్ మార్కెట్లలో ఇది త్వరలోనే విక్రయానికి రానుంది. మరొకవైపు, షావోమి స్మార్ట్ బ్యాండ్ 11 ప్రామాణిక (స్టాండర్డ్) వేరియంట్ ప్రారంభ ధర చైనాలో CNY 289 (దాదాపు రూ. 4,000)గా ఉంది. దీని NFC మోడల్ ధర CNY 339 (సుమారు రూ. 4,800) కాగా, ప్రీమియం లుక్ ఇచ్చే సిరామిక్ ఎడిషన్ , ఆల్ మెటల్ ఎడిషన్ల ధరను CNY 399 (సుమారు రూ. 5,600)గా నిర్ణయించారు. ఇవి ప్రస్తుతం చైనాలోని షావోమి ఆన్‌లైన్ స్టోర్‌లో బ్లాక్, పింక్, పర్పుల్, ఎల్లో రంగుల్లో ప్రీ-ఆర్డర్‌కు అందుబాటులో ఉన్నాయి.

షావోమి స్మార్ట్ బ్యాండ్ 11 యాక్టివ్.. డిజైన్, ఫీచర్లు

షావోమి స్మార్ట్ బ్యాండ్ 11 యాక్టివ్ మోడల్ 1.47-అంగుళాల TFT స్క్రీన్‌తో దీర్ఘచతురస్రాకార కేసింగ్‌లో వస్తుంది. 172 x 320 పిక్సెల్స్ రెసల్యూషన్, 247 ppi పిక్సెల్ డెన్సిటీ కలిగిన ఈ డిస్‌ప్లేకి రీఇన్‌ఫోర్స్డ్ గ్లాస్ ప్రొటెక్షన్ ఇచ్చారు. వినియోగదారులు మార్చుకోవడానికి ఇందులో 100కు పైగా వాచ్ ఫేసెస్ ఉన్నాయి. కేవలం 18 గ్రాముల బరువు, 10.2mm మందం కలిగిన ఈ బ్యాండ్ రోజంతా సులభంగా ధరించడానికి వీలుగా ఉంటుంది. 135mm నుండి 215mm వరకు అడ్జస్ట్ చేసుకునే వీలున్న సపోర్టివ్ TPU స్ట్రాప్‌ను దీనికి అందించారు.

ఆరోగ్య విషయానికొస్తే, ఇది హార్ట్ రేట్ మానిటరింగ్, స్లీప్ ట్రాకింగ్, SpO2 బ్లడ్-ఆక్సిజన్ ట్రాకింగ్, స్ట్రెస్ మానిటరింగ్ , మహిళల హెల్త్ మేనేజ్‌మెంట్ వంటి ఫీచర్లను అందిస్తుంది. దీనిలోని PPG సెన్సార్, యాక్సిలరోమీటర్లు ఖచ్చితమైన డేటాను నమోదు చేస్తాయి. కనెక్టివిటీ కోసం బ్లూటూత్ 5.3 కి సపోర్ట్ చేస్తుంది. ఆండ్రాయిడ్ 8 , ఆపైన వర్షన్లు, అలాగే iOS 14 అంతకంటే తాజా వర్షన్ ఉన్న స్మార్ట్‌ఫోన్‌లకు ఇది కనెక్ట్ అవుతుంది. 5ATM వాటర్ రెసిస్టెన్స్ కలిగిన ఈ బ్యాండ్, సాధారణ వాడకంలో ఏకంగా 21 రోజుల సుదీర్ఘ బ్యాటరీ లైఫ్‌ను ఇస్తుందని కంపెనీ చెబుతోంది.

షావోమి స్మార్ట్ బ్యాండ్ 11 – ప్రత్యేక ఆకర్షణలు

మరిన్ని ప్రీమియం ఫీచర్లు కోరుకునే వారి కోసం షావోమి స్మార్ట్ బ్యాండ్ 11ను డిజైన్ చేశారు. ఇది 1.72-అంగుళాల AMOLED డిస్‌ప్లేతో వస్తుంది. డిస్‌ప్లే చుట్టూ కేవలం 2mm సన్నని బెజెల్స్ ఉండటం వల్ల స్క్రీన్ చాలా ఆకర్షణీయంగా కనిపిస్తుంది. అలాగే ఎండలో కూడా స్పష్టంగా కనిపించేలా 2,000 నిట్స్ పీక్ బ్రైట్‌నెస్‌ను అందించారు. కేవలం 9.99mm మందంతో ఎంతో స్లిమ్‌గా ఉండే ఈ స్మార్ట్ బ్యాండ్, ఐఫోన్ (iOS), ఆండ్రాయిడ్ పరికరాలు రెండింటికీ సపోర్ట్ చేస్తుంది.

ఫిట్‌నెస్ ప్రియుల కోసం ఇందులో 150 కంటే ఎక్కువ స్పోర్ట్స్ మోడ్‌లను చేర్చారు. గుండె కొట్టుకునే వేగం, రక్తంలో ఆక్సిజన్ స్థాయిలు, ఒత్తిడి , నిద్ర నాణ్యతను నిరంతరం పర్యవేక్షించే హెల్త్ ట్రాకింగ్ సిస్టమ్స్ ఇందులో ఉన్నాయి. 5ATM వాటర్ రెసిస్టెన్స్ సెర్టిఫికేషన్ కలిగిన ఈ డివైజ్ కూడా ఒకే ఛార్జ్‌పై దాదాపు 21 రోజుల దాకా బ్యాటరీ బ్యాకప్‌ను అందిస్తుంది. సరసమైన ధరలో అధునాతన ఫీచర్లు కోరుకునే వారికి ఇవి మంచి ఆప్షన్‌గా నిలుస్తాయి.