Air India Flight: శంషాబాద్‌లో ఎయిర్ ఇండియా విమానానికి తప్పిన పెను ప్రమాదం: ఎమర్జెన్సీ ల్యాండింగ్!

Air India Flight: శంషాబాద్‌లోని రాజీవ్ గాంధీ అంతర్జాతీయ విమానాశ్రయంలో ఎయిర్ ఇండియా విమానానికి పెను ప్రమాదం తృటిలో తప్పింది. 109 మంది ప్రయాణికులతో ముంబయికి బయలుదేరిన 'ఏఐ 417' (AI 417) విమానంలో టేకాఫ్ అయిన కొద్దిసేపటికే తీవ్ర సాంకేతిక లోపం తలెత్తింది. పైలట్ అప్రమత్తతతో వ్యవహరించడంతో విమానం సురక్షితంగా ల్యాండ్ అయింది.

విమానం శంషాబాద్ ఎయిర్‌పోర్ట్ నుంచి గాల్లోకి లేచిన కేవలం ఐదు నిమిషాలకే అందులోని సాంకేతిక లోపాన్ని పైలట్ ప్రాథమికంగా గుర్తించారు. వెంటనే అప్రమత్తమై ఎయిర్ ట్రాఫిక్ కంట్రోల్ (ATC) అధికారులకు అత్యవసర సమాచారం అందించారు. ఏటీసీ అధికారుల తక్షణ సూచనలు మరియు మార్గదర్శకాలతో పైలట్ విమానాన్ని తిరిగి శంషాబాద్ ఎయిర్‌పోర్ట్‌కు మళ్లించి సురక్షితంగా ఎమర్జెన్సీ ల్యాండింగ్ చేశారు.

విమానం సురక్షితంగా ల్యాండ్ అవ్వడంతో ప్రయాణికులు మరియు ఎయిర్‌పోర్ట్ అధికారులు ఊపిరి పీల్చుకున్నారు. విమానంలోని 109 మంది ప్రయాణికులు సురక్షితంగా ఉన్నారని ఎయిర్‌పోర్ట్ వర్గాలు తెలిపాయి. ప్రస్తుతం సాంకేతిక సిబ్బంది విమానంలోని లోపాన్ని క్షుణ్ణంగా పరిశీలిస్తున్నారు. ప్రయాణికులకు ప్రత్యామ్నాయ ఏర్పాట్లు చేసేందుకు ఎయిర్ ఇండియా యాజమాన్యం చర్యలు చేపట్టింది.