Alai Balai: నాంపల్లి ఎగ్జిబిషన్ గ్రౌండ్స్‌లో ‘అలయ్ బలయ్’ సంబరాలు.. ఘనంగా ప్రారంభం!

Alai Balai: తెలంగాణ సంస్కృతి, సంప్రదాయాలు మరియు ఆత్మీయతకు నిలువెత్తు రూపమైన ‘అలయ్ బలయ్’ వేడుకలు హైదరాబాద్ నాంపల్లి ఎగ్జిబిషన్ మైదానంలో అత్యంత వైభవంగా ప్రారంభమయ్యాయి. మాజీ గవర్నర్ బండారు దత్తాత్రేయ మార్గదర్శకత్వంలో, ఆయన కుమార్తె విజయలక్ష్మి (అలయ్ బలయ్ ఫౌండేషన్) ఆధ్వర్యంలో ఈ కార్యక్రమాన్ని ఘనంగా నిర్వహిస్తున్నారు. ప్రారంభంలో నిర్వహించిన వైవిధ్యభరితమైన జానపద సాంస్కృతిక ప్రదర్శనలు, డప్పు వాయిద్యాలు, ఒగ్గు డోలు విన్యాసాలు హాజరైన ప్రతి ఒక్కరినీ విశేషంగా అలరిస్తున్నాయి.

తెలంగాణ మలిదశ ఉద్యమ కాలం నుంచి ప్రారంభమైన ఈ అలయ్ బలయ్ వేడుక దశాబ్దాలుగా రాజకీయాలకు, కులమతాలకు అతీతంగా అందరినీ ఒకే వేదికపైకి తీసుకువచ్చే ఆత్మీయ మేళవింపుగా గుర్తింపు పొందింది. సమాజంలో సోదరభావం, సామరస్యాన్ని పెంపొందించడమే లక్ష్యంగా నిర్వహిస్తున్న ఈ వేడుకకు రెండు తెలుగు రాష్ట్రాల నుంచి పలువురు రాజకీయ ప్రముఖులు, మంత్రులు, ప్రజాప్రతినిధులు, వివిధ రంగాల విశిష్ట వ్యక్తులు హాజరుకానున్నారు.

ఈ వేడుకల సందర్భంగా వివిధ రంగాల్లో విశేష సేవలు అందించిన ప్రతిభావంతులను, కళాకారులను బండారు దత్తాత్రేయ, విజయలక్ష్మిల చేతుల మీదుగా ఘనంగా సన్మానించనున్నారు. అనంతరం విచ్చేసిన అతిథులకు తెలంగాణ ప్రత్యేకమైన ఘుమఘుమలాడే సంప్రదాయ వంటకాలతో పసందైన ఆత్మీయ విందును అందించనున్నారు.