Karimnagar: ట్రాక్టర్ డ్రైవర్ దుర్గరాజు మృతి, కుటుంబానికి అండగా మున్సిపాలిటీ

Karimnagar: కరీంనగర్ జిల్లా చొప్పదండి మున్సిపాలిటీలో కార్మికుడిగా, ట్రాక్టర్ డ్రైవర్‌గా పనిచేస్తున్న ఇరుగురాల్ల దుర్గరాజు నిన్న రాత్రి అనారోగ్యంతో మృతి చెందడం స్థానికంగా విషాదాన్ని కలిగించింది. దుర్గరాజు మృతితో కుటుంబ సభ్యులు, సహచర కార్మికులు తీవ్ర దిగ్భ్రాంతికి గురయ్యారు. ఈ విషయం తెలుసుకున్న వెంటనే చొప్పదండి మున్సిపల్ పాలకవర్గం స్పందించింది. మున్సిపల్ చైర్ పర్సన్ వడ్లూరి సరిత - శ్రీనివాస్ ఆధ్వర్యంలో దుర్గరాజు కుటుంబానికి తక్షణ సహాయం అందించారు. అంత్యక్రియల ఖర్చుల నిమిత్తం రూ.10,000 ఆర్థిక సహాయాన్ని అందజేసి కుటుంబానికి అండగా నిలిచారు.

ఈ సందర్భంగా చైర్ పర్సన్ మాట్లాడుతూ, మున్సిపల్ కార్మికులు పట్టణ అభివృద్ధిలో కీలక పాత్ర పోషిస్తున్నారని, వారి కష్టాన్ని ఎప్పటికీ మర్చిపోలేమని తెలిపారు. దుర్గరాజు కుటుంబానికి మున్సిపాలిటీ తరపున అన్ని విధాలుగా సహాయం అందించేందుకు కృషి చేస్తామని హామీ ఇచ్చారు. మున్సిపల్ సిబ్బంది, స్థానిక ప్రజలు దుర్గరాజుకు నివాళులర్పించి, ఆయన కుటుంబానికి ప్రగాఢ సానుభూతి వ్యక్తం చేశారు.