Indiramma Houses : ఇందిరమ్మ ఇళ్లపై సీఎం రేవంత్ బిగ్ అనౌన్స్‌మెంట్

Indiramma Houses : తెలంగాణలో సొంతిల్లు లేని పేద ప్రజలకు ముఖ్యమంత్రి రేవంత్ రెడ్డి తీపికబురు అందించారు. రాష్ట్రంలో ఇందిరమ్మ ఇళ్ల కోసం ఎంతో ఆశగా ఎదురుచూస్తున్న లబ్ధిదారులకు భారీ ఊరటనిస్తూ ఒక కీలకమైన ప్రకటన చేశారు. ఆదిలాబాద్ జిల్లా పర్యటనలో భాగంగా కాగజ్‌నగర్‌లో పలు అభివృద్ధి పనులకు శంకుస్థాపన చేసిన సీఎం రేవంత్.. అనంతరం అక్కడ ఏర్పాటు చేసిన భారీ బహిరంగ సభలో మాట్లాడారు. ఈ వేదిక నుంచే రాష్ట్రంలో అర్హులైన పేదల కోసం కొత్తగా మరో 2.5 లక్షల ఇందిరమ్మ ఇళ్లను మంజూరు చేస్తున్నట్లు ప్రకటించి అందరినీ ఆనందంలో ముంచెత్తారు. ఈ ఇళ్ల నిర్మాణాల టైమ్‌లైన్‌తో పాటు కేంద్ర ప్రభుత్వానికి వడ్ల కొనుగోలుపై ఆయన ఇచ్చిన హెచ్చరికల పూర్తి వివరాలు ఇప్పుడు చూద్దాం.

సెప్టెంబర్ 17న లక్ష ఇళ్లకు గృహప్రవేశాలు

ఈ బహిరంగ సభలో సీఎం రేవంత్ రెడ్డి ఇందిరమ్మ ఇళ్ల గృహప్రవేశాలపై ఒక స్పష్టమైన క్లారిటీ ఇచ్చారు. రాబోయే సెప్టెంబర్ 17వ తేదీ నాటికి ఒకేసారి లక్ష ఇందిరమ్మ ఇళ్లకు గృహప్రవేశాలు చేయిస్తామని ఆయన ఘంటాపథంగా చెప్పారు. రాష్ట్రంలోని పేదలు, బడుగు, బలహీన వర్గాల అందరికీ పక్కా ఇళ్లు కట్టించి ఇవ్వడమే ధ్యేయంగా తమ ప్రభుత్వం బాధ్యత తీసుకుందని స్పష్టం చేశారు. అర్హులైన ప్రతి ఒక్కరికీ సొంతిల్లు అందే వరకు ప్రభుత్వం అండగా ఉంటుందని భరోసా ఇచ్చారు.

తండాలు, గూడేల్లో గుడిసెలు లేని తెలంగాణ

గిరిజన, అడవి ప్రాంతాల అభివృద్ధిపై సీఎం ప్రత్యేక దృష్టి సారించారు. అటవీ ప్రాంతాల్లోని వివిధ తండాలు, గూడేల్లో నివసించే ప్రతి ఒక్క ఆదివాసీని గుర్తించి, వారందరికీ ప్రాధాన్యత క్రమంలో ఇందిరమ్మ ఇళ్లను నిర్మించి ఇస్తామని రేవంత్ రెడ్డి హామీ ఇచ్చారు. తెలంగాణ రాష్ట్రంలో ఎక్కడా కూడా పేదలు గుడిసెల్లో నివసించకూడదని, ప్రతి ఒక్కరికీ గౌరవప్రదమైన సొంతిల్లు ఉండాలనేదే తమ ప్రభుత్వ ప్రధాన లక్ష్యమని ఈ సందర్భంగా ఆయన పునరుద్ఘాటించారు.

కేంద్రానికి సీఎం రేవంత్ రెడ్డి గట్టి వార్నింగ్

ఇదే బహిరంగ సభ వేదికగా సీఎం రేవంత్ రెడ్డి రైతుల పండించిన పంటల కొనుగోలుపై కేంద్ర ప్రభుత్వానికి గట్టి హెచ్చరికలు జారీ చేశారు. తెలంగాణ రాష్ట్ర ప్రభుత్వం సేకరించిన వడ్లు, జొన్నలు, మక్కలను కేంద్ర ప్రభుత్వం ఎటువంటి కొర్రీలు పెట్టకుండా వెంటనే కొనుగోలు చేయాలని డిమాండ్ చేశారు. ఒకవేళ కేంద్రం గనుక మన రాష్ట్ర రైతుల ధాన్యాన్ని కొనడానికి ముందుకు రాకపోతే, కేంద్ర ప్రభుత్వంపై రాజీలేని యుద్ధం చేస్తామని రేవంత్ హెచ్చరించారు.

జూన్ 15 నాటికి కొనుగోళ్లు పూర్తి

రాష్ట్రం నుంచి ధాన్యం సేకరించేలా కేంద్ర మంత్రి కిషన్ రెడ్డి ప్రత్యేక చొరవ తీసుకోవాలని రేవంత్ రెడ్డి కోరారు. తెలంగాణలో జూన్ 15వ తేదీ నాటికే పూర్తిస్థాయిలో ధాన్యం కొనుగోళ్లు పూర్తవుతాయని, కాబట్టి కేంద్రం అప్పటికల్లా రంగంలోకి దిగి కొనుగోలు ప్రక్రియను ముగించాలని సూచించారు. రాష్ట్రంలో ఇప్పటివరకు రికార్డు స్థాయిలో 62 లక్షల క్వింటాళ్ల వడ్లను ప్రభుత్వం కొనుగోలు చేసిందని సీఎం రేవంత్ రెడ్డి ఈ సందర్భంగా లెక్కలతో సహా స్పష్టం చేశారు.