Revanth Reddy: ఉద్యోగులే ప్రభుత్వ ప్రతినిధులు.. కరీంనగర్ కలెక్టరేట్ ప్రారంభోత్సవంలో సీఎం రేవంత్ రెడ్డి కీలక వ్యాఖ్యలు!

Revanth Reddy: సంక్షేమ పథకాలు అర్హులైన ప్రజలకు సక్రమంగా చేరాలంటే ప్రభుత్వ ఉద్యోగులే ప్రభుత్వ ప్రతినిధులుగా బాధ్యత వహించాలని ముఖ్యమంత్రి ఎనుముల రేవంత్‌రెడ్డి పిలుపునిచ్చారు. కరీంనగర్‌లో నూతనంగా నిర్మించిన కలెక్టరేట్ భవన సముదాయాన్ని ప్రారంభించిన అనంతరం, అధికారులతో ఆయన ప్రత్యేక సమీక్షా సమావేశం నిర్వహించారు. సహాయం కోసం కార్యాలయానికి వచ్చే ప్రతి ఒక్కరిని మన కుటుంబ సభ్యుల్లా భావించి సేవ చేయాలని అధికారులకు సూచించారు.

రాష్ట్రంలోని సుమారు 10.5 లక్షల మంది ప్రభుత్వ ఉద్యోగులు 4 కోట్ల మంది ప్రజలకు సేవలు అందిస్తున్నారని సీఎం తెలిపారు. కేవలం 3 శాతం మంది ఉద్యోగులు 97 శాతం ప్రజలకు సేవ చేయడం శ్రమతో కూడిన పని అయినప్పటికీ, ప్రభుత్వానికి మంచి పేరు గానీ చెడ్డ పేరు గానీ ఉద్యోగుల పనితీరు వల్లే వస్తుందని స్పష్టం చేశారు.

అధికారులు సమస్యల పట్ల నిర్లక్ష్యం వహిస్తే అది ప్రభుత్వంపై ప్రభావం చూపుతుందన్నారు. ప్రజల కోసం ఎన్ని చట్టాలు చేసినా, ఎంత నిధులు కేటాయించినా వాటిని చివరి స్థాయి వరకు చేరవేయాల్సిన బాధ్యత ఉద్యోగులదేనని, పేదల సమస్యల పరిష్కారానికి కలెక్టరేట్ కార్యాలయాలు వేదిక కావాలని పేర్కొన్నారు.

ఈ ప్రారంభోత్సవ వేడుక మరియు సమీక్షా సమావేశంలో కేంద్ర మంత్రి బండి సంజయ్ కుమార్, రాష్ట్ర మంత్రులు పొంగులేటి శ్రీనివాస్‌రెడ్డి, పొన్నం ప్రభాకర్, తుమ్మల నాగేశ్వరరావు తదితరులు పాల్గొన్నారు.