Crocodile: గోదావరి తీరంలో భారీ మొసలి కలకలం.. కార్తీక స్నానాలకు వెళ్లేవారు జాగ్రత్త

Crocodile: కార్తీక మాసం సందర్భంగా గోదావరిలో పుణ్యస్నానాలు ఆచరించేందుకు వెళ్తున్న భక్తులు అప్రమత్తంగా ఉండాలి. పోలవరం ప్రాజెక్టు సమీపంలో భారీ మొసలి కనిపించడం స్థానికంగా కలకలం రేపింది. ప్రాజెక్టు దిగువ కాఫర్ డ్యామ్ దగ్గర రహదారిపై మొసలి సంచరిస్తున్న దృశ్యాలు వెలుగులోకి వచ్చాయి. రాత్రి వేళ నిర్మాణ పనుల కోసం అటుగా వెళ్తున్న లారీ డ్రైవర్లు ఈ మొసలిని గుర్తించి వీడియోలు తీశారు. ప్రస్తుతం ఆ దృశ్యాలు సోషల్ మీడియాలో వైరల్ అవుతున్నాయి.

రోడ్డుపై కనిపించిన భారీ మొసలి

పోలవరం ప్రాజెక్టు దిగువ కాఫర్ డ్యామ్ సమీపంలోని రహదారిపై ఓ భారీ మొసలి నెమ్మదిగా కదులుతూ కనిపించింది. నిర్మాణ పనుల కోసం లారీల్లో వెళ్తున్న డ్రైవర్లు వాహనాల హెడ్‌లైట్ల వెలుతురులో రోడ్డును దాటుతున్న మొసలిని గుర్తించారు. వెంటనే తమ సెల్‌ఫోన్లలో ఆ దృశ్యాలను చిత్రీకరించి సోషల్ మీడియాలో పంచుకున్నారు. దీంతో మొసలి వీడియోలు, ఫొటోలు వైరల్‌గా మారాయి. రహదారిపై అంత పెద్ద మొసలి కనిపించడంతో స్థానికులు, అక్కడ పనిచేస్తున్న కార్మికులు భయాందోళనకు గురయ్యారు.

కార్తీక స్నానాలకు వెళ్లే భక్తులకు హెచ్చరిక

దిగువ కాఫర్ డ్యామ్ ప్రాంతంలో గోదావరి సహజ ప్రవాహం కొనసాగుతోంది. ఈ ప్రాంతం మీదుగా నిత్యం స్థానికులు రాకపోకలు సాగిస్తుంటారు. చుట్టుపక్కల గ్రామాల ప్రజలు మంచినీటి అవసరాల కోసం కూడా నదీ తీరానికి వస్తుంటారు. ప్రస్తుతం కార్తీక మాసం కావడంతో గోదావరిలో పుణ్యస్నానాలు ఆచరించేందుకు భక్తులు పెద్ద సంఖ్యలో తరలివస్తున్నారు. అయ్యప్ప, శివ, వేంకటేశ్వర స్వామి మాలలు ధరించిన దీక్షాపరులు తెల్లవారుజామునే నదీ తీరానికి చేరుకుంటున్నారు. ఇలాంటి సమయంలో జనసంచారం ఉండే ప్రాంతానికి సమీపంలోనే మొసలి కనిపించడం ఆందోళన కలిగిస్తోంది.

వరదల కారణంగా దిగువ ప్రాంతానికి వచ్చిందా?

ఈ ఘటనపై అటవీ క్షేత్రాధికారి(ఎఫ్‌ఆర్‌ఓ) ఎస్‌కే వలీ స్పందించారు. పోలవరం ముంపు గ్రామాల ప్రజల తరలింపు పూర్తయిన తర్వాత పాపికొండల అటవీ ప్రాంతంలో జనసంచారం తగ్గిందని తెలిపారు. ఈ కారణంగా గోదావరిలో మొసళ్ల సంఖ్య పెరిగిందని వివరించారు. సాధారణంగా మొసళ్లు నదిలో లోతైన ప్రాంతాలు, రాళ్లు, దట్టమైన అటవీ ప్రాంతాల్లో నివాసం ఏర్పరచుకుంటాయని చెప్పారు. ఇటీవల వచ్చిన వరదల ఉద్ధృతికి ఈ మొసలి దిగువ ప్రాంతానికి కొట్టుకొచ్చి ఉండవచ్చని ఆయన అభిప్రాయపడ్డారు. తిరిగి ఎగువన ఉన్న తన ఆవాసానికి వెళ్లే క్రమంలో కాఫర్ డ్యామ్ రహదారిపైకి వచ్చి ఉండొచ్చని అంచనా వేశారు.

నదిలోకి వెళ్లేవారు జాగ్రత్తలు పాటించాలి

మొసలి సంచారం నేపథ్యంలో భక్తులు, మత్స్యకారులు, నదీ తీర గ్రామాల ప్రజలు అప్రమత్తంగా ఉండాలని అటవీ శాఖ అధికారులు సూచించారు. ముఖ్యంగా నదిలో లోతైన ప్రాంతాలకు వెళ్లకూడదని, స్నానాలు చేసేటప్పుడు జాగ్రత్తలు పాటించాలని హెచ్చరించారు. మొసలి కనిపించిన ప్రాంతంలో నిర్లక్ష్యంగా వ్యవహరించవద్దని సూచించారు. కార్తీక మాసం సందర్భంగా గోదావరి తీరానికి వెళ్లేవారు స్థానిక అధికారుల సూచనలు పాటించడం మంచిది. మొసలి సంచారం పూర్తిగా తగ్గే వరకు నదిలోకి దిగే విషయంలో మరింత అప్రమత్తత అవసరం.